Latest News

અમદાવાદ,તા.1
નાર્કોટિક્સ કંટ્રોલ બ્યુરો (NCB), અમદાવાદ ઝોનલ યુનિટ દ્વારા વર્ષ ૨૦૨૩માં પકડાયેલા ડ્રગ્સની હેરાફેરીના કેસમાં અમદાવાદની સ્પે.કોર્ટે મહત્વપૂર્ણ ચુકાદો આપ્યો છે. સ્પે. કોર્ટે આ ગુનામાં સંડોવાયેલા આરોપીને ૧૫ વર્ષની સખત કેદની સજા ફટકારી છે.

NCB અમદાવાદ ઝોનલ યુનિટે વિશ્વસનીય બાતમીના આધારે 30 જાન્યુઆરી 2023ના રોજ કાંકરિયા રોડ સ્થિત હિરાભાઈ માર્કેટ નજીક બોર્ડી મિલ કમ્પાઉન્ડ પાર્કિંગમાંથી મંડસૌરથી અમદાવાદ આવી રહેલી બસ નંબર AR-01S-6786ને રોકી તપાસ હાથ ધરી હતી. આ દરમિયાન બસ ચલાવતા આરોપી દશરથસિંહ ખુમાનસિંહ રાજપૂત (રહે. પ્રતાપગઢ, રાજસ્થાન) પાસેથી 185 ગ્રામ પ્રતિબંધિત સાયકોટ્રોપિક પદાર્થ 4-મેથાઇલેથકેથિનોન (4-MEC) જપ્ત કરવામાં આવ્યો હતો. આરોપીની 31 જાન્યુઆરી 2023ના રોજ ધરપકડ કરવામાં આવી હતી.તપાસ પૂર્ણ થયા બાદ 25 જુલાઈ 2023ના રોજ અમદાવાદ સિટી સિવિલ અને સેશન્સ કોર્ટમાં NDPS અધિનિયમ, 1985ની કલમ 8(c), 22(c) અને 29 હેઠળ ફરિયાદ દાખલ કરવામાં આવી હતી.કેસની સુનાવણી પૂર્ણ થયા બાદ 1 મે 2026ના રોજ સ્પે જ્જે આરોપી દશરથસિંહ રાજપૂતને દોષિત જાહેર કર્યો હતો. કોર્ટે તેને 15 વર્ષની કઠોર કેદની સજા સાથે ₹2,00,000નો દંડ ફટકાર્યો છે.

શું છે ‘4-MEC’ ડ્રગ્સ?
આ એક સિન્થેટિક ઉત્તેજક પદાર્થ છે જે ‘ડિઝાઈનર ડ્રગ્સ’ તરીકે પણ ઓળખાય છે. પાવડર અથવા સ્ફટિક સ્વરૂપે મળતા આ નશાના સેવનથી ચિંતા, બેચેની, હૃદયના ધબકારા વધવા અને બ્લડ પ્રેશર જેવી ગંભીર સમસ્યાઓ સર્જાય છે. નશાની ઊંચી ક્ષમતા અને સ્વાસ્થ્ય પર હાનિકારક અસરને કારણે તેને એનડીપીએસ (NDPS) એક્ટ હેઠળ ખતરનાક ડ્રગ્સ માનવામાં આવે છે.