પાંચ રાજ્યોમાં યોજાનારી ચૂંટણીની તારીખોની ઘોષણા બાદ ચૂંટણી પંચે ચૂંટણી પ્રચારને લઈને કડકાઈ વધારી દીધી છે. ચૂંટણી પંચે કેન્દ્રીય આરોગ્ય મંત્રાલયને કહ્યું છે કે, જે રાજ્યોમાં ચૂંટણીઓ યોજાવાની છે તે રાજ્યોમાં કોરોના રસીના પ્રમાણપત્રોથી પીએમ મોદીના ફોટોગ્રાફને દૂર કરવા. કેરળ, પુડુચેરી, તામિલનાડુ, પશ્ચિમ બંગાળ અને આસામમાં યોજાનારી વિધાનસભાની ચૂંટણીને ધ્યાનમાં રાખીને ચૂંટણી પંચે આ નિર્ણય લીધો છે. આ રાજ્યોમાં 27 માર્ચથી 29 એપ્રિલ સુધી વિધાનસભાની ચૂંટણીઓ યોજાવાની છે.
કોરોના રસીકરણ પછી લાભાર્થીઓને કોરોના રસીકરણનું પ્રમાણપત્ર આપવામાં આવે છે. આ સર્ટિફિકેટ પર મોદીના ફોટાને લઈને ચૂંટણી પંચે આરોગ્ય મંત્રાલયને આ તસવીરો વિધાનસભાની ચૂંટણીના જે રાજ્યોમાં નજીક આવી રહી છે તે રાજ્યોમાંથી કાઢવાનો આદેશ આપ્યો છે. અને કહ્યું છે કે દૂર કરે અથવા કોઈ અન્ય વિકલ્પ તપાસે.
ટીએમસી સાંસદે કરી હતી ફરિયાદ
ટીએમસીના સાંસદ ડેરેક ઓ બ્રાયનની ફરિયાદ બાદ ચૂંટણી પંચનો આ આદેશ આવ્યો છે. તેમણે રસીકરણના પ્રમાણપત્ર પર વડા પ્રધાન મોદીના ફોટા, નામ અને સંદેશ અંગે મુખ્ય ચૂંટણી કમિશનર સુનિલ અરોરા સામે વાંધો નોંધાવ્યો હતો. તેમણે કહ્યું હતું કે ચૂંટણી પદ્ધતિઓની ઘોષણા પછી, પીએમ મોદીને સરકારના પ્લેટફોર્મ કોવિન એપ દ્વારા આ રીતે ક્રેડિટ લેવામાં અને તેમના નામના પ્રમોશન પર પ્રતિબંધ મૂકવો જોઈએ.
ટીએમસી અને ભાજપ વચ્ચે ટકરાર
રસીકરણના પ્રમાણપત્ર પર પીએમ મોદીના ફોટાને લઈને ટીએમસીએ ભાજપ પર નિશાન સાધ્યું હતું. ટીએમસીના સાંસદ સાંતનું સેને કહ્યું હતું કે અમને જન્મથી જ રસી આપવામાં આવી છે, શું આ પહેલા પણ આવું બન્યું છે? એવું ક્યારેય બન્યું નથી કે રસીકરણના પ્રમાણપત્ર પર વડા પ્રધાનનો ફોટો હોય. ટીએમસીના આ નિવેદન પર ભાજપ નેતા દિલીપ ઘોષે કહ્યું કે આક્ષેપો પાયાવિહોણા છે. જો સરકાર ચૂંટણી પૂર્વે કોઈ પ્રોજેક્ટ શરૂ કરે તો તે તે જ રીતે આગળ વધે છે. પશ્ચિમ બંગાળના 27 માર્ચથી 29 એપ્રિલ દરમિયાન આઠ તબક્કામાં ચૂંટણી યોજાવાની છે.
આરોગ્ય પ્રમાણપત્રો પર આરોગ્ય કર્મચારીઓનું ચિત્ર હોવું જોઈએ – કોંગ્રેસ
કોરોના રસીના પ્રમાણપત્ર પર પીએમ મોદીના ફોટા અંગે કોંગ્રેસના નેતા કપિલ સિબ્બલે કહ્યું હતું કે, જો પ્રમાણપત્ર પર કોઈની તસવીર હોવી જોઈએ, તો તે દેશના ડોકટરો અને આરોગ્ય કાર્યકરો હોવા જોઈએ. રસીકરણ માટેની કોઈ સુવિધા ન હોવા છતાં પણ આ લોકો રોગચાળાના સંકટ વચ્ચે લોકોની મદદ માટે ઉભા હતા.
