નવી દિલ્હીમાં ‘કોકરોચ જનતા પાર્ટી’ એટલે કે CJPને લઈને ચાલી રહેલો વિવાદ હવે વધુ ગંભીર બનતો જોવા મળી રહ્યો છે. સોશિયલ મીડિયા પર સંગઠનના સત્તાવાર એક્સ હેન્ડલ પર પ્રતિબંધ મૂકાયા બાદ હવે મામલો સુપ્રીમ કોર્ટ સુધી પહોંચ્યો છે. CJP સાથે જોડાયેલા કેટલાક લોકો સામે કેન્દ્રીય તપાસ બ્યુરો એટલે કે CBI દ્વારા તપાસ કરાવવામાં આવે તેવી માંગ સાથે સુપ્રીમ કોર્ટમાં અરજી દાખલ કરવામાં આવી છે. અરજીમાં સંગઠન સાથે સંકળાયેલા લોકો દ્વારા કથિત રીતે નકલી કાયદાકીય ડિગ્રીનો ઉપયોગ કરવામાં આવ્યો હોવાનો ગંભીર આક્ષેપ કરવામાં આવ્યો છે. અરજીકર્તાનો દાવો છે કે સંગઠન સાથે જોડાયેલા કેટલાક લોકોએ પોતાની ઓળખ વકીલ અથવા કાયદાકીય નિષ્ણાત તરીકે રજૂ કરીને લોકોને ગેરમાર્ગે દોર્યા છે. આ મામલે કથિત ગુનાહિત કાવતરાની તપાસ કરવા ઉપરાંત ન્યાયતંત્રની વિશ્વસનીયતાને નુકસાન પહોંચાડવાના આરોપોની પણ તપાસ કરવાની માંગ કરવામાં આવી છે. અરજીમાં આ કથિત પ્રવૃત્તિઓને લઈને FIR નોંધવાનો આદેશ આપવામાં આવે તેવી અપીલ પણ કરવામાં આવી છે. હવે આ મામલે સુપ્રીમ કોર્ટનું વલણ શું રહે છે તેના પર સૌની નજર છે.
CJPને લઈને વિવાદ માત્ર કોર્ટ સુધી મર્યાદિત નથી રહ્યો. સોશિયલ મીડિયા પર પણ આ સંગઠનને લઈને ભારે ચર્ચા ચાલી રહી છે. તાજેતરમાં મુખ્ય ન્યાયાધીશ સૂર્યકાંત દ્વારા વ્યવસ્થા પર હુમલો કરનારા તત્વોને લઈને કરવામાં આવેલી ટિપ્પણી બાદ આ મુદ્દો વધુ ચર્ચામાં આવ્યો હતો. ત્યારબાદ કેન્દ્ર સરકારે પણ CJP સામે કડક કાર્યવાહી કરી છે. કેન્દ્ર સરકારના ઇલેક્ટ્રોનિક્સ અને માહિતી ટેક્નોલોજી મંત્રાલયે માહિતી પ્રૌદ્યોગિકી કાયદાની કલમ 69A હેઠળ કાર્યવાહી કરીને ભારતમાં CJPના સત્તાવાર એક્સ હેન્ડલ પર પ્રતિબંધ મૂક્યો છે. આ કાર્યવાહી ગુપ્તચર બ્યુરો એટલે કે IBના અહેવાલના આધારે કરવામાં આવી હોવાનું જણાવવામાં આવ્યું છે. સરકાર તરફથી સંગઠન પર દેશની સંપ્રભુતા અને અખંડિતતાને પડકારતી તથા ભડકાઉ સામગ્રી ફેલાવતી પ્રવૃત્તિઓ સાથે જોડાયેલા ગંભીર આક્ષેપ કરવામાં આવ્યા છે.
જોકે, CJPની શરૂઆત કોઈ રાજકીય પક્ષ તરીકે થઈ નહોતી. આ સંગઠન મૂળભૂત રીતે ડિજિટલ અને વ્યંગાત્મક પ્રકારના આંદોલન તરીકે સામે આવ્યું હતું. બોસ્ટન યુનિવર્સિટીના વિદ્યાર્થી અભિજીત દીપકે દ્વારા શરૂ કરવામાં આવેલા આ અભિયાનને ‘બેરોજગાર યુવાનોનો અવાજ’ તરીકે રજૂ કરવામાં આવ્યું હતું. શરૂઆતમાં આ અભિયાનમાં રમૂજ, મીમ્સ અને સત્તા વિરોધી સામગ્રીનો ઉપયોગ કરવામાં આવતો હતો. ખાસ કરીને Gen-Z યુવાનોમાં તેને ઝડપથી લોકપ્રિયતા મળી હતી. ધીમે ધીમે આ ડિજિટલ અભિયાન સોશિયલ મીડિયા પર મોટા વિરોધના સ્વરૂપમાં જોવા મળ્યું અને તેના ફોલોઅર્સની સંખ્યા પણ ઝડપથી વધી. યુવાનોમાં બેરોજગારી, સિસ્ટમ સામેનો અસંતોષ અને અન્ય સામાજિક મુદ્દાઓને મીમ્સ અને વ્યંગના માધ્યમથી રજૂ કરવામાં આવતા હોવાથી CJPની ઓનલાઈન હાજરી મજબૂત બની હતી. જોકે, હવે સંગઠન સામે કાયદાકીય કાર્યવાહી અને સોશિયલ મીડિયા પ્રતિબંધ બાદ સમગ્ર મામલો નવી દિશામાં વળ્યો છે.
સરકાર દ્વારા સત્તાવાર એક્સ હેન્ડલ પર પ્રતિબંધ મૂકવામાં આવ્યા બાદ પણ CJP સાથે જોડાયેલા લોકોએ પોતાનું ડિજિટલ અસ્તિત્વ જાળવી રાખવાનો પ્રયાસ કર્યો હોવાનું સામે આવ્યું છે. પ્રતિબંધ બાદ ‘કોકરોચ ઇઝ બેક’ નામે નવું હેન્ડલ શરૂ કરવામાં આવ્યું હોવાનો દાવો કરવામાં આવ્યો છે. આ કારણે સોશિયલ મીડિયા પર સંગઠનની પ્રવૃત્તિઓ સંપૂર્ણપણે બંધ થઈ છે કે નવા માધ્યમથી ચાલુ છે તે અંગે પણ ચર્ચા થઈ રહી છે. બીજી તરફ, CJPના સ્થાપક અભિજીત દીપકેએ પોતાના સંગઠન સામે થઈ રહેલી કાર્યવાહીનો વિરોધ કર્યો છે. તેમણે આ સમગ્ર કાર્યવાહી અન્યાયી હોવાનો દાવો કર્યો છે. દીપકે એવો પણ આક્ષેપ કર્યો છે કે તેમનું ઇન્સ્ટાગ્રામ અને એક્સ એકાઉન્ટ હેક કરવામાં આવ્યું છે. આ ઉપરાંત સંગઠનની સત્તાવાર વેબસાઇટ પણ બંધ કરી દેવામાં આવી હોવાનું તેમણે જણાવ્યું છે.
દીપકે પોતાના સમર્થકોને ખાસ સાવચેત રહેવાની અપીલ કરી છે. તેમના જણાવ્યા પ્રમાણે હાલમાં તેઓ પોતાના કોઈપણ સત્તાવાર સોશિયલ મીડિયા એકાઉન્ટનો ઉપયોગ કરી શકતા નથી. તેથી CJPના નામે સોશિયલ મીડિયા પર કરવામાં આવતી કોઈપણ પોસ્ટને સત્તાવાર નિવેદન માનવામાં ન આવે તેવી સૂચના તેમણે આપી છે. આ દાવાઓને કારણે હવે સંગઠન સામેની સરકારી કાર્યવાહી ઉપરાંત તેના ડિજિટલ એકાઉન્ટ્સ સાથે શું થયું તે અંગે પણ સવાલો ઊભા થયા છે. હવે આ સમગ્ર વિવાદમાં સુપ્રીમ કોર્ટમાં દાખલ થયેલી CBI તપાસની અરજી સૌથી મહત્વપૂર્ણ બની છે. જો કોર્ટ આ મામલે તપાસનો આદેશ આપે છે તો CJP સાથે જોડાયેલા લોકો સામે કરવામાં આવેલા નકલી કાયદાકીય ડિગ્રી અને લોકોને કથિત રીતે ગેરમાર્ગે દોરવાના આરોપોની તપાસ થઈ શકે છે. સાથે જ કથિત ગુનાહિત કાવતરું અને ન્યાયતંત્રની પ્રતિષ્ઠાને નુકસાન પહોંચાડવાના આરોપો પણ તપાસના દાયરામાં આવી શકે છે. એક તરફ સરકાર CJP સામે રાષ્ટ્રીય સુરક્ષા અને ભડકાઉ સામગ્રી જેવા ગંભીર આરોપોને ધ્યાનમાં રાખીને કાર્યવાહી કરી રહી છે, તો બીજી તરફ સંગઠનના સ્થાપક આ કાર્યવાહીને અન્યાયી ગણાવી રહ્યા છે. હવે સુપ્રીમ કોર્ટમાં થયેલી અરજી બાદ આ વિવાદ માત્ર સોશિયલ મીડિયા અથવા રાજકીય ચર્ચા પૂરતો નહીં રહે, પરંતુ કાયદાકીય તપાસના સ્તરે પણ પહોંચી ગયો છે. આગામી સમયમાં કોર્ટનું વલણ અને તપાસ અંગે લેવાતા નિર્ણયથી આ સમગ્ર મામલાની દિશા વધુ સ્પષ્ટ થઈ શકે છે.
