ગુજરાતમાં રોકાણની તકોને વધુ વેગ આપવા માટે રાજ્ય સરકાર દ્વારા આગામી વાઈબ્રન્ટ ગુજરાત સમિટ-2027ને લઈને તૈયારીઓ શરૂ કરી દેવામાં આવી છે. આ અંતર્ગત મુખ્યમંત્રી ભૂપેન્દ્ર પટેલે મુંબઈ ખાતે ઉદ્યોગ જગતના અગ્રણી ઉદ્યોગપતિઓ સાથે વન-ટુ-વન બેઠકો યોજી હતી. બેઠકો દરમિયાન મુખ્યમંત્રીએ ઉદ્યોગપતિઓને વાઈબ્રન્ટ ગુજરાત સમિટ-2027માં ભાગીદાર બનવા માટે આમંત્રણ આપ્યું હતું. આ દરમિયાન ગુજરાતમાં ચાલી રહેલા વિવિધ ઔદ્યોગિક પ્રોજેક્ટ, ભવિષ્યના રોકાણ, ઉદ્યોગોના વિસ્તરણ અને નવી ટેક્નોલોજી સાથે જોડાયેલી તકો અંગે પણ ચર્ચા થઈ હતી. ઉદ્યોગપતિઓએ ગુજરાતમાં રોકાણને લઈને પોતાના અનુભવો શેર કર્યા હતા અને રાજ્યની ઉદ્યોગલક્ષી નીતિઓ તથા માળખાકીય સુવિધાઓની પ્રશંસા કરી હતી.
મહિન્દ્રા ગ્રુપના ઉદ્યોગપતિ આનંદ મહિન્દ્રાએ ગુજરાત સાથેના પોતાના જૂના જોડાણને યાદ કરતાં જણાવ્યું હતું કે, ગુજરાતમાં રોકાણ અંગે તેમની પ્રથમ મહત્વપૂર્ણ બેઠક આ જ રૂમમાં તે સમયના મુખ્યમંત્રી અને હાલના વડાપ્રધાન નરેન્દ્ર મોદી સાથે થઈ હતી. તે સમયે નરેન્દ્ર મોદીની દુરંદેશીથી તેઓ પ્રભાવિત થયા હતા. હવે મુખ્યમંત્રી ભૂપેન્દ્ર પટેલ સાથેની મુલાકાત દરમિયાન ગુજરાતમાં મહિન્દ્રા ગ્રુપના ભવિષ્યના રોકાણ અને વિકાસની યોજનાઓ અંગે આત્મીય વાતચીત થઈ હોવાનું તેમણે જણાવ્યું હતું. ખાસ કરીને ઇલેક્ટ્રિક વાહન એટલે કે EV ક્ષેત્ર અને GIFT સિટી સાથે જોડાયેલી નવી તકો અંગે ફળદાયી ચર્ચા કરવામાં આવી હતી. ગુજરાતમાં રોકાણ, સહયોગ અને વિકાસ માટે નવા રસ્તા શોધવા અંગે પણ વિચારવિમર્શ થયો હતો. ગુજરાતમાં ઉદ્યોગો માટે ઊભું કરવામાં આવેલું વાતાવરણ રાજ્યને દેશના અગ્રણી રોકાણ સ્થળ તરીકે વધુ મજબૂત બનાવે છે તેવો વિશ્વાસ પણ વ્યક્ત કરવામાં આવ્યો હતો.
સ્વાન કોર્પોરેશનના મેનેજિંગ ડિરેક્ટર નિખિલ મર્ચન્ટે પણ ગુજરાતમાં કંપનીના વિસ્તરણ અને આધુનિકીકરણની યોજનાઓ અંગે ચર્ચા થઈ હોવાનું જણાવ્યું હતું. મુખ્યમંત્રી સાથેની બેઠકમાં સ્વાન એનર્જીના વધતા આંતરરાષ્ટ્રીય વ્યવસાયને વધુ મજબૂત બનાવવા માટે જરૂરી કનેક્ટિવિટી અને નજીકના એરપોર્ટના માળખાકીય વિકાસ અંગે પણ ચર્ચા કરવામાં આવી હતી. નિખિલ મર્ચન્ટે ગુજરાતની શિપિંગ પોલિસીની પ્રશંસા કરતાં જણાવ્યું હતું કે, રાજ્ય ઉદ્યોગ આધારિત વિકાસ અને નવા રોકાણને પ્રોત્સાહન આપવા માટે સતત પ્રતિબદ્ધ છે. ગુજરાતમાં ઉપલબ્ધ બંદરો, કનેક્ટિવિટી અને ઔદ્યોગિક સુવિધાઓને કારણે કંપનીઓ માટે લાંબા ગાળાના વિસ્તરણની સારી તકો ઊભી થઈ રહી છે.
વેલ્સપન ઇન્ડિયા લિમિટેડનાં સીઈઓ દીપાલી ગોએન્કાએ ગુજરાતના ટેક્સટાઇલ ક્ષેત્રની તકો અંગે પોતાના વિચારો રજૂ કર્યા હતા. તેમના જણાવ્યા અનુસાર, વૈશ્વિક કાપડ ઉદ્યોગમાં ગુજરાતનું નેતૃત્વ વધુ મજબૂત બને તે દિશામાં વેલ્સપન ગ્રુપ સાથે મહત્વપૂર્ણ ચર્ચા થઈ હતી. ગુજરાતમાં મજબૂત ટેક્સટાઇલ ઇકોસિસ્ટમ અને ઉદ્યોગલક્ષી નીતિઓનો લાભ લઈને નવા રોકાણ અને કંપનીના વિસ્તરણની શક્યતાઓ અંગે વિચારણા કરવામાં આવી હતી. ટેક્સટાઇલ ક્ષેત્રમાં ઉત્પાદન વધારવા સાથે નિકાસ અને રોજગારીની તકોને પણ વેગ મળી શકે તેવા મુદ્દાઓ પર ચર્ચા થઈ હતી. વૈશ્વિક સ્તરે ગુજરાતને ટેક્સટાઇલ ક્ષેત્રના મહત્વના કેન્દ્ર તરીકે વધુ આગળ લઈ જવા માટે નવી યોજનાઓ પર વિચાર કરવામાં આવ્યો હતો.
હિન્ડાલ્કોના મેનેજિંગ ડિરેક્ટર સતિષ પાઈ સાથેની બેઠકમાં ગુજરાતના ઉત્પાદન અને ઔદ્યોગિક ક્ષેત્રમાં રહેલી તકો પર ખાસ ભાર મૂકાયો હતો. કોપર રિસાયક્લિંગ, ઈ-વેસ્ટ મેનેજમેન્ટ અને સર્ક્યુલર ઇકોનોમી જેવી નવી અને ટકાઉ ઔદ્યોગિક પહેલ અંગે ચર્ચા કરવામાં આવી હતી. સતિષ પાઈએ જણાવ્યું હતું કે, ગુજરાતમાં ઔદ્યોગિક અને ઉત્પાદન ક્ષેત્ર માટે ઘણી મોટી સંભાવનાઓ છે. ખાસ કરીને પર્યાવરણને અનુકૂળ અને સંસાધનોના પુનઃઉપયોગ સાથે જોડાયેલા ક્ષેત્રોમાં રોકાણની સારી તકો છે. આ ઉપરાંત ડિસેમ્બર મહિનામાં કોપર રિસાયક્લિંગ પ્લાન્ટના ઉદ્ઘાટન અંગે પણ ચર્ચા થઈ હતી. ગુજરાતમાં સંભવિત નવા રોકાણ, ટકાઉ ઔદ્યોગિક પદ્ધતિઓ અને રાજ્યને દેશના અગ્રણી કોપર ડેસ્ટિનેશન તરીકે વિકસાવવાના મુદ્દાઓ પર પણ વિચારવિમર્શ કરવામાં આવ્યો હતો.
AMNS ઈન્ડિયાના સીઈઓ અમિત હરલાલકાએ ગુજરાતમાં કંપનીની મહત્વાકાંક્ષી રોકાણ યોજનાઓ અંગે મુખ્યમંત્રી સાથે થયેલી બેઠકને મહત્વપૂર્ણ ગણાવી હતી. તેમણે જણાવ્યું હતું કે, કંપની ગુજરાતમાં મોટા પાયે રોકાણ કરી રહી છે અને જૂન સુધીમાં આશરે રૂ. 80,000 કરોડનું રોકાણ પૂર્ણ કરવાની દિશામાં આગળ વધી રહી છે. આ ઉપરાંત હજીરા ખાતે વધારાના રૂ. 10,000 કરોડનું રોકાણ કરવાની પણ યોજના છે. આ રોકાણમાં મુખ્યત્વે પુનઃપ્રાપ્ય ઊર્જા અને બેટરી સ્ટોરેજ જેવા ક્ષેત્રોનો સમાવેશ થાય છે. કંપની ગુજરાતમાં 25 મિલિયન ટનની વાર્ષિક ક્ષમતા ધરાવતો વિશ્વનો સૌથી મોટો સ્ટીલ પ્લાન્ટ વિકસાવવાના પોતાના વિઝન સાથે આગળ વધી રહી છે. આ પ્રોજેક્ટ ગુજરાતના ઔદ્યોગિક વિકાસ માટે મહત્વપૂર્ણ બની શકે છે અને રાજ્યમાં રોજગારી તથા આનુષંગિક ઉદ્યોગોની નવી તકો ઊભી કરી શકે છે.
મુંબઈ ખાતે યોજાયેલી આ વન-ટુ-વન બેઠકોમાં અલગ-અલગ ક્ષેત્રોના ઉદ્યોગપતિઓ સાથે થયેલી ચર્ચાથી ગુજરાતમાં નવા રોકાણ અને ઔદ્યોગિક વિસ્તરણ માટેની સંભાવનાઓ વધુ સ્પષ્ટ થઈ છે. ઇલેક્ટ્રિક વાહનોથી લઈને GIFT સિટી, શિપિંગ, ટેક્સટાઇલ, કોપર રિસાયક્લિંગ, ઈ-વેસ્ટ, સર્ક્યુલર ઇકોનોમી, સ્ટીલ, રિન્યુએબલ એનર્જી અને બેટરી સ્ટોરેજ જેવા વિવિધ ક્ષેત્રોમાં ઉદ્યોગ જગતની નજર ગુજરાત પર છે. રાજ્ય સરકાર પણ ઉદ્યોગોને જરૂરી માળખાકીય સુવિધાઓ, નીતિગત સહયોગ અને રોકાણ માટે અનુકૂળ વાતાવરણ પૂરું પાડવાની દિશામાં આગળ વધી રહી છે.
વાઈબ્રન્ટ ગુજરાત સમિટની શરૂઆતથી જ રાજ્યને દેશ-વિદેશના રોકાણકારો સાથે જોડવાનું અને ગુજરાતમાં નવા ઉદ્યોગો તથા રોકાણ લાવવાનું મહત્વનું માધ્યમ બન્યું છે. હવે વાઈબ્રન્ટ ગુજરાત સમિટ-2027ને લઈને મુંબઈમાં થયેલી બેઠકોમાં ઉદ્યોગ જગત તરફથી મળેલો પ્રતિસાદ ગુજરાત માટે મહત્વપૂર્ણ માનવામાં આવી રહ્યો છે. વિવિધ ઉદ્યોગપતિઓ દ્વારા ગુજરાતમાં ચાલી રહેલા પ્રોજેક્ટ અને ભવિષ્યની યોજનાઓ અંગે વ્યક્ત કરવામાં આવેલા વિચારો દર્શાવે છે કે રાજ્યમાં ઔદ્યોગિક વિકાસ માટે અનેક નવા ક્ષેત્રોમાં રોકાણની શક્યતાઓ ઊભી થઈ રહી છે. મુખ્યમંત્રી ભૂપેન્દ્ર પટેલે ઉદ્યોગપતિઓને આગામી વાઈબ્રન્ટ ગુજરાત સમિટ-2027માં જોડાવા અને ગુજરાતના વિકાસમાં ભાગીદાર બનવા માટે આહવાન કર્યું છે.
