દેશના સોશિયલ મીડિયા અને ડિજિટલ સ્પેસમાં છેલ્લા કેટલાક દિવસોથી ભારે ચર્ચામાં રહેલી ‘કોકરોચ જનતા પાર્ટી’ (CJP) હવે માત્ર મજાક કે મીમ પૂરતી સીમિત રહી નથી. સોશિયલ મીડિયા પર વ્યંગાત્મક રીતે શરૂ થયેલી આ મુવમેન્ટ હવે રાજકીય ચર્ચાનો મહત્વનો વિષય બની ગઈ છે. ખાસ કરીને યુવાનોમાં આ પ્લેટફોર્મને ભારે સમર્થન મળી રહ્યું છે. હાલ સ્થિતિ એવી બની છે કે CJPના ઇન્સ્ટાગ્રામ ફોલોઅર્સ દેશની બે સૌથી મોટી રાષ્ટ્રીય પાર્ટી ભાજપ અને કોંગ્રેસ કરતાં પણ વધારે થઈ ગયા છે. આ સમગ્ર મુદ્દે હવે કોંગ્રેસના વરિષ્ઠ નેતા અને સાંસદ શશી થરૂરે પણ ખુલ્લેઆમ પ્રતિક્રિયા આપી છે. એક ઈન્ટરવ્યૂ દરમિયાન થરૂરે કહ્યું કે સોશિયલ મીડિયા પર ચાલી રહેલું આ આંદોલન દેશના યુવાનોની અંદર રહેલી હતાશા અને ગુસ્સાને બહાર લાવવાનું એક મોટું માધ્યમ બની ગયું છે. થરૂરે ખાસ કરીને NEET પરીક્ષાના પેપર લીક મામલાનો ઉલ્લેખ કરતા કહ્યું કે લાખો વિદ્યાર્થીઓ વર્ષો સુધી મહેનત કરે છે, દિવસ-રાત તૈયારી કરે છે, પરંતુ જ્યારે પેપર લીક જેવી ઘટનાઓ બને છે ત્યારે તેમની આશા અને વિશ્વાસ બંને તૂટી જાય છે. તેમણે કહ્યું કે યુવાનો હવે સ્પષ્ટ રીતે કહી રહ્યા છે કે ‘હવે બહુ થયું’.
કોંગ્રેસ નેતાએ સરકાર પર નિશાન સાધતા કહ્યું કે કોકરોચ જનતા પાર્ટીનું X હેન્ડલ બંધ કરવું એ સરકારની મોટી ભૂલ હતી. તેમના જણાવ્યા પ્રમાણે, કોઈપણ અવાજને દબાવવાનો પ્રયાસ કરવાથી લોકોમાં અસંતોષ વધુ વધી શકે છે. સોશિયલ મીડિયા યુવાનો માટે પોતાની વાત વ્યક્ત કરવાનો સૌથી મોટો પ્લેટફોર્મ બની ગયું છે અને આવા સમયમાં એકાઉન્ટ બ્લોક કરવું યોગ્ય નથી. શશી થરૂરે આગળ કહ્યું કે દેશની નવી પેઢી હવે પરંપરાગત રાજકારણથી અલગ વિકલ્પો શોધી રહી છે. તેમણે તમિલનાડુમાં અભિનેતા વિજયની પાર્ટીની સફળતાનું ઉદાહરણ આપ્યું અને કહ્યું કે તેને Gen Zની જીત કહેવી ખોટું નથી. તેમના મતદારોમાં મોટા ભાગના લોકો 30 વર્ષથી ઓછી ઉંમરના હતા. આથી સ્પષ્ટ થાય છે કે દેશના યુવાનોમાં હવે બદલાવની માંગ વધી રહી છે. થરૂરના મતે આજનો યુવાન માત્ર સત્તાધારી પક્ષથી જ નહીં, પરંતુ સમગ્ર રાજકીય વ્યવસ્થાથી નારાજ છે. તેમણે સ્વીકાર્યું કે આ અસંતોષમાં વિપક્ષ પ્રત્યેની નિરાશા પણ સામેલ છે. પરંતુ તેમણે કહ્યું કે જો આ ગુસ્સો માત્ર સોશિયલ મીડિયા સુધી જ સીમિત રહેશે, તો વાસ્તવિક જીવનમાં કોઈ મોટો ફેરફાર નહીં આવે.
તેમણે કહ્યું કે હાલ વિપક્ષ સામે સૌથી મોટો પડકાર અને તક બંને એક જ છે. યુવાનોના આ અસંતોષને મતપેટી સુધી પહોંચાડવાનો. આ ગુસ્સાને ચૂંટણીલક્ષી પરિવર્તનમાં ફેરવવું હવે જરૂરી બની ગયું છે. જો વિપક્ષ યુવાનોને યોગ્ય સંદેશ આપી શકશે, તો તેઓ ફરી રાજકારણમાં વિશ્વાસ મૂકી શકે છે. શશી થરૂરે એ પણ કહ્યું કે કોકરોચ જનતા પાર્ટીની વેબસાઇટ પર જે મુદ્દાઓ અને મેનિફેસ્ટો રજૂ કરવામાં આવ્યા છે, તેમાંથી ઘણા મુદ્દાઓ એવા છે જેને વિપક્ષ સમર્થન આપવા તૈયાર છે. તેમણે સંકેત આપ્યો કે રોજગાર, પારદર્શિતા, શિક્ષણ અને યુવાનોના હકો જેવા મુદ્દાઓ હવે રાજકારણના કેન્દ્રમાં આવવાના છે. હાલ માટે સ્પષ્ટ છે કે કોકરોચ જનતા પાર્ટી માત્ર સોશિયલ મીડિયા ટ્રેન્ડ નથી રહી, પરંતુ યુવાનોના મનમાં ચાલી રહેલી નારાજગી અને બદલાવની માંગનું પ્રતિક બની ગઈ છે. હવે જોવાનું એ રહેશે કે આ ડિજિટલ અસંતોષ વાસ્તવિક રાજકીય બદલાવમાં ફેરવાઈ શકે છે કે નહીં.
