નિધિ તિવારી કેસમાં માતાના ખુલાસાથી રહસ્ય ઘેરાયું
સિંગરૌલીની સોશિયલ મીડિયા ઇન્ફ્લુએન્સર નિધિ તિવારીના મોત બાદ કેસમાં એક પછી એક નવા ખુલાસા સામે આવી રહ્યા છે.માતા હેમલતા તિવારીએ નિધિ અને પંજાબના એન્જિનિયર સોનુ સિંહ વચ્ચેના સંબંધો તથા ઘટનાના દિવસોની કેટલીક મહત્વની વાતો જણાવી છે. પોલીસ પણ ફોન કોલ અને અન્ય પુરાવાઓની તપાસ કરી રહી છે.મધ્યપ્રદેશના સિંગરૌલીમાં સોશિયલ મીડિયા ઇન્ફ્લુએન્સર નિધિ તિવારીના મોતનો મામલો સતત ચર્ચામાં છે. નિધિનું મોત મોરવા પોલીસ સ્ટેશન વિસ્તારમાં થયું હતું. પરિવારજનોના જણાવ્યા અનુસાર, ઘટના પહેલાં તે પોતાના ઉપરના રૂમમાં હતી અને પંજાબના રહેવાસી સોનુ સિંહ સાથે ફોન પર વાત કરી રહી હતી. વાતચીત દરમિયાન બંને વચ્ચે કોઈ બાબતે બોલાચાલી થઈ હોવાનો પરિવારનો દાવો છે. ત્યારબાદ રૂમનો દરવાજો અંદરથી બંધ મળી આવ્યો હતો. થોડા સમય બાદ સોનુ સિંહે નિધિની માતાને ફોન કરીને નિધિ આત્મહત્યા કરવા જઈ રહી હોવાની જાણકારી આપી હતી.
હોટલમાં નોકરી દરમિયાન થઈ હતી ઓળખાણ
નિધિની માતા હેમલતા તિવારીના જણાવ્યા પ્રમાણે, નિધિ મોરવાના જી.એસ. ગ્રાન્ડ હોટલમાં રિસેપ્શનિસ્ટ તરીકે કામ કરતી હતી. આ દરમિયાન એનસીએલ સાથે સંકળાયેલી આઉટસોર્સિંગ કંપનીમાં એન્જિનિયર તરીકે કામ કરતો સોનુ સિંહ પણ વારંવાર સિંગરૌલી આવતો અને આ જ હોટલમાં રોકાતો હતો. આ દરમિયાન બંનેની ઓળખાણ થઈ હતી અને બાદમાં તેમની વચ્ચે નજીકના સંબંધો બન્યા હતા. સોનુ પંજાબનો રહેવાસી હોવાનું અને તે પરિણીત હોવા ઉપરાંત બે બાળકોનો પિતા હોવાનું પરિવાર તરફથી જણાવાયું છે.માતાનો આરોપ છે કે સોનુ નિધિ પર સતત નજર રાખતો હતો. નિધિના કાનમાં ઘણીવાર બ્લૂટૂથ ઇયરફોન રહેતો હતો અને તે સોનુના સંપર્કમાં રહેતી હતી. પરિવારના જણાવ્યા પ્રમાણે, જો કોઈ સંબંધી ઘરે આવે તો પણ સોનુ શંકા વ્યક્ત કરતો હતો.પરિવારજનોએ આ સંબંધથી નિધિને દૂર રહેવા સમજાવવાનો પ્રયાસ કર્યો હતો, પરંતુ બંને વચ્ચેનો સંપર્ક ચાલુ રહ્યો હતો.
નિધિ બનાવી રહી હતી મોટું ઘર
હેમલતા તિવારીએ વધુમાં જણાવ્યું કે પરિવારની જવાબદારી નિધિ સંભાળતી હતી અને સિંગરૌલીના બૈઢનમાં તે એક મોટું ઘર પણ બનાવી રહી હતી. પરિવારના જણાવ્યા પ્રમાણે છેલ્લા કેટલાક સમયથી તે તણાવમાં રહેતી હતી. ઘટનાના દિવસે નિધિ નીચે પૂજા કર્યા બાદ ઉપરના રૂમમાં ગઈ હતી. ત્યારબાદ સોનુનો ફોન આવ્યો અને પરિવારને ઉપર જવા માટે કહેવામાં આવ્યું. રૂમનો દરવાજો તોડવામાં આવ્યો ત્યારે નિધિ પંખા સાથે દુપટ્ટાથી લટકતી મળી આવી હતી. પરિવાર તેને તાત્કાલિક હોસ્પિટલ લઈ ગયો, પરંતુ તબીબોએ મૃત જાહેર કરી હતી.
સોનુનો ફોન બંધ, પોલીસ તપાસમાં અનેક સવાલ
નિધિના મોત બાદ સોનુ સિંહનો મોબાઇલ બંધ હોવાનું અને તે પોલીસની પહોંચથી બહાર હોવાનું અહેવાલોમાં જણાવાયું છે. નિધિ અને સોનુ વચ્ચે ઘટનાના થોડા સમય પહેલાં શું વાતચીત થઈ હતી, બંને વચ્ચેની બોલાચાલીનું કારણ શું હતું અને સોનુને નિધિની સ્થિતિ અંગે અગાઉથી કેવી રીતે જાણ થઈ—આ સહિતના સવાલોની તપાસ ચાલી રહી છે. મોરવા પોલીસનું કહેવું છે કે કેસના તમામ પાસાં તપાસવામાં આવી રહ્યા છે અને ફોન કોલ સહિતના પુરાવાઓ પણ તપાસ હેઠળ છે.નિધિ સોશિયલ મીડિયા પર પણ ખૂબ લોકપ્રિય હતી. તેના ફેસબુક અને ઇન્સ્ટાગ્રામ પર મળીને લાખો ફોલોઅર્સ હોવાનું અહેવાલોમાં જણાવાયું છે. તેના મોત બાદ તેનો છેલ્લો સોશિયલ મીડિયા સ્ટેટસ પણ ચર્ચામાં આવ્યો છે. જોકે તેના મોતનું ચોક્કસ કારણ અને આ સમગ્ર ઘટનામાં અન્ય કોઈની ભૂમિકા છે કે નહીં, તે પોલીસ તપાસ પૂર્ણ થયા બાદ જ સ્પષ્ટ થશે.
