2026 એશિયન ગેમ્સ 19 સપ્ટેમ્બરથી 4 ઓક્ટોબર દરમિયાન જાપાનના આઈચી-નાગોયામાં યોજાશે. એશિયન ગેમ્સ માટે ભારતના ટોચના મેડલ દાવેદારોમાંના એક નીરજ ચોપરા આ વખતે પોતાના ખિતાબનો બચાવ કરતા જોવા મળશે નહીં. તેમણે ઈજાને કારણે એશિયન ગેમ્સમાંથી નામ પાછું ખેંચી લીધું છે. તેમના સ્થાને એથ્લેટિક્સ ફેડરેશન ઓફ ઈન્ડિયાએ ગ્લાસગો કોમનવેલ્થ ગેમ્સના બ્રોન્ઝ મેડલ વિજેતા ભાલા ફેંકનાર યશવીર સિંહનો ટીમમાં સમાવેશ કર્યો છે.
એથ્લેટિક્સ ફેડરેશન દ્વારા જાહેર કરાયેલી ટીમ
એથ્લેટિક્સ ફેડરેશન ઓફ ઈન્ડિયા (AFI) એ ગુરુવારે આગામી એશિયન ગેમ્સ માટે 77 સભ્યોની ટ્રેક એન્ડ ફિલ્ડ ટીમની જાહેરાત કરી. યશવીર સિંહને પુરુષોની ભાલા ફેંક સ્પર્ધામાં સામેલ કરવામાં આવ્યો છે. રોહિત યાદવ પણ તેમની સાથે ભારતનું પ્રતિનિધિત્વ કરશે. બે વખતના ઓલિમ્પિક મેડલ વિજેતા નીરજ ચોપરાને શરૂઆતમાં 73 સભ્યોની ટીમમાં સ્થાન આપવામાં આવ્યું હતું. તે જકાર્તા (2018) અને હાંગઝોઉ (2023) માં જીતેલા એશિયન ગેમ્સના ટાઇટલનો બચાવ કરવા માટે તૈયાર હતો પરંતુ ઈજાને કારણે તે હવે જાપાનમાં રમતોમાં ભાગ લેશે નહીં. યશવીરે તાજેતરના ગ્લાસગો કોમનવેલ્થ ગેમ્સમાં બ્રોન્ઝ મેડલ જીતીને પોતાનો દાવો મજબૂત બનાવ્યો પરિણામે નીરજની ગેરહાજરીમાં ભારત ભાલા ફેંકમાં મેડલ માટે તેની તરફ ઉમ્મીદ લગાવી રહ્યું છે.
તેજસ શિરસેને ટીમમાંથી કેમ બહાર કરવામાં આવ્યો?
ભારતને પુરુષોની 110 મીટર હર્ડલ્સ ઇવેન્ટમાં વધુ એક આંચકો લાગ્યો છે. ગ્લાસગો કોમનવેલ્થ ગેમ્સ દરમિયાન પગમાં બે સ્ટ્રેસ ફ્રેક્ચર થયેલા તેજસ શિરસેને ટીમમાંથી બહાર કરવામાં આવ્યો છે. દરમિયાન શરૂઆતની ટીમમાં છ નવા ખેલાડીઓનો સમાવેશ કરવામાં આવ્યો છે. આમાં 200 મીટર દોડવીર હરિતા ભદ્ર, 400 મીટર દોડવીર કિરણ પહલ, પોલ વોલ્ટર સિંધુશ્રી જી, ટ્રિપલ જમ્પર આઈ આશા ઇલાંગો, ડિસ્કસ થ્રોઅર સાન્યા યાદવ અને હેમર થ્રોઅર પ્રવીણ કુમારનો સમાવેશ થાય છે.
કયા ચાર ચેમ્પિયન તેમના ટાઇટલનો બચાવ કરશે?
ભારતીય એથ્લેટિક્સ ટીમમાં હાંગઝોઉ એશિયન ગેમ્સના 15 મેડલ વિજેતા અને ચેમ્પિયનનો સમાવેશ થાય છે. તેમાં 2023 માં વ્યક્તિગત ગોલ્ડ મેડલ જીતનારા ચાર એથ્લેટનો સમાવેશ થાય છે અને હવે તેઓ જાપાનમાં પોતાના ટાઇટલનું રક્ષણ કરશે. જેમાં અવિનાશ સાબલે, તજિન્દરપાલ સિંહ તૂર, પારુલ ચૌધરી અને અન્નુ રાનીનો સમાવેશ થાય છે. સાબલેએ હાંગઝોઉમાં 3000 મીટર સ્ટીપલચેઝમાં ગોલ્ડ અને 5000 મીટરમાં સિલ્વર મેડલ જીત્યો હતો. દરમિયાન તજિન્દરપાલ સિંહ તૂર સતત ત્રીજી વખત એશિયન ગેમ્સમાં શોટ પુટ ગોલ્ડ જીતવાનું લક્ષ્ય રાખશે. પારુલ ચૌધરીની 1500 મીટર, 3000 મીટર સ્ટીપલચેઝ અને 5000 મીટર ઇવેન્ટ માટે પસંદગી કરવામાં આવી છે. અન્નુ રાની પોતાના ભાલા ફેંક ટાઇટલનો બચાવ કરવા માટે મેદાનમાં ઉતરશે.
100 મીટર હર્ડલ્સ સ્ટાર જ્યોતિ યારાજી પણ ટીમમાં છે. હાંગઝોઉમાં સિલ્વર મેડલ જીતનાર જ્યોતિ આ વખતે ગોલ્ડ મેડલ પર નજર રાખશે. મુરલી શ્રીશંકર લાંબા કૂદકામાં ભારત માટે એક મોટી આશા રહેશે, તેણે ગ્લાસગો કોમનવેલ્થ ગેમ્સમાં પોતાનો બીજો સિલ્વર મેડલ જીત્યો હતો અને તે પાછલી એશિયન ગેમ્સમાં પણ સિલ્વર મેડલ વિજેતા હતો. વધુમાં તેજસ્વિન શંકર, ગુલવીર સિંહ, મોહમ્મદ અફઝલ, એન્સી સોજન, પ્રવીણ ચિત્રવેલ અને વિથ્યા રામરાજ જેવા હાંગઝોઉ મેડલ વિજેતાઓ ટીમનો ભાગ છે.
