મુંબઇ: નાગ અશ્વિનની ફિલ્મ ‘કલ્કી 2898 AD’માં (Kalki 2898 AD) પીઢ બોલિવૂડ અભિનેતા અમિતાભ બચ્ચનના (Amitabh Bachchan) દમદાર પાત્રને લઈને છેલ્લા કેટલાક મહિનાઓથી લોકોમાં ઘણી ચર્ચા થઈ રહી હતી. આ મોસ્ટ અવેટેડ ફિલ્મમાં (Most Awaited Film) અમિતાભ બચ્ચન ઉપરાંત દીપિકા પાદુકોણ અને પ્રભાસ લીડ રોલમાં જોવા મળશે, પરંતુ ફિલ્મમાં બિગ બીનો રોલ સૌથી મહત્વનો હોવાનું કહેવાય છે.
બોલિવૂડના મેગાસ્ટાર અમિતાભ બચ્ચન 80 વર્ષથી વધુ ઉંમરમાં પણ પોતાના ચાહકોને એવી રીતે આશ્ચર્યમાં મૂકી રહ્યા છે જે ઘણા નવા કલાકારો પણ કરી શકતા નથી. આ વર્ષની સૌથી મોટી ફિલ્મોમાંની એક માનવામાં આવતી ફિલ્મ ‘કલ્કી 2898 AD’નો એક નવો ટીઝર વીડિયો સામે આવ્યો છે. આ ટીઝર વીડિયોમાં અમિતાભનું પાત્ર અને ફિલ્મનો તેમનો ફર્સ્ટ લુક સામે આવ્યો છે. વીડિયોમાં અમિતાભનો એક યુવા અવતાર પણ જોવા મળી રહ્યો છે.
RCB vs KKR ની લાઈવ IPL મેચ દરમિયાન ‘Kalki 2898 AD’ નો નવો પ્રોમો શેર કરવામાં આવ્યો હતો. નિર્માતાઓએ બિગ બીનો લુક પણ શેર કર્યો હતો, જેમાં તેઓ એકદમ અલગ અને નવા પાત્રમાં જોવા મળ્યા હતા. 1 મિનિટના આ ટીઝરમાં અમિતાભ ગુરુ દ્રોણાચાર્યના પુત્ર અશ્વત્થામાના રોલમાં જોવા મળે છે.
અમિતાભ અશ્વત્થામા બન્યા
નિર્માતાઓએ ફિલ્મના નવા ફૂટેજ શેર કર્યા છે, જેને ‘ઇન્ટ્રોડ્યુસિંગ અશ્વત્થામા’ નામ આપવામાં આવ્યું છે. વીડિયોમાં અમિતાભનું પાત્ર એક જૂના મંદિરમાં જોવા મળે છે. આ કોઈ પ્રાચીન મંદિર છે જ્યાં એક બાળકે આવીને પૂછ્યું કે તે કોણ છે? અમિતાભ તેને કહી રહ્યા છે કે કેવી રીતે તેઓ સદીઓથી આ ધરતી પર છે.
અહીં અમિતાભના ચહેરા પર પટ્ટી બાંધવામાં આવી છે અને માટી લગાવવામાં આવી છે. તેની દાઢી પણ ઘણી લાંબી છે. તેમજ વિડિયોની મધ્યમાં તેમની યુવાનીનો એક નાનકડો ભાગ પણ જોવા મળે છે, જેમાં અમિતાભ બચ્ચન બિલકુલ એવા જ દેખાય છે જે રીતે આપણે તેમને તેમની જૂની ફિલ્મોમાં જોયા છે.
ડી-એજિંગ ટેક્નોલોજીના કારણે અમિતાભ યંગ જોવા મળ્યા
આ એક મિનિટના ટીઝરનો સૌથી ખાસ સીન એ છે જેમાં અમિતાભ બચ્ચનનો યંગ લૂક બતાવવામાં આવ્યો છે. આ સીન ડી-એજિંગ ટેક્નોલોજી દ્વારા શૂટ કરવામાં આવ્યો છે. જેનાથી સ્પષ્ટ છે કે ફિલ્મમાં અમિતાભના પાત્ર અશ્વત્થામાની પાછળની વાર્તા પણ બતાવવામાં આવશે.
