સુપ્રીમ કોર્ટના પૂર્વ ન્યાયાધીશ માર્કંડેય કાત્જુએ દેશની રાજનીતિમાં એક અનોખી એન્ટ્રી કરી છે. તેમણે ‘ઈશ્ક કરો પાર્ટી’ નામની નવી રાજકીય પાર્ટીની જાહેરાત કરી છે. સોશિયલ મીડિયા પર આ અંગે માહિતી આપતાં કાત્જુએ જણાવ્યું કે તેમની પાર્ટી દેશની વિવિધ સમસ્યાઓ સામે લડશે અને લોકોને પ્રેમ, ભાઈચારો અને એકતાનો સંદેશ આપશે. તેમણે સ્પષ્ટ કર્યું કે તેમની પાર્ટી નફરતની રાજનીતિમાં વિશ્વાસ રાખતી નથી. કાત્જુએ જણાવ્યું કે પાર્ટી માટે હોદ્દેદારોની નિમણૂકની પ્રક્રિયા પણ શરૂ થઈ ગઈ છે. સાથે જ તેમણે વિવિધ રાજકીય પક્ષોના નેતાઓ, સામાજિક કાર્યકરો અને જાહેર જીવન સાથે જોડાયેલા લોકોને પાર્ટીમાં જોડાવાનું આમંત્રણ આપ્યું છે. તાજેતરમાં ચર્ચામાં આવેલી કોકરોચ જનતા પાર્ટી અને તેના સ્થાપક અભિજીત દીપક પર પણ કાત્જુએ નિશાન સાધ્યું છે. તેમણે સોશિયલ મીડિયા પોસ્ટમાં અભિજીત દીપકની ટીકા કરતાં કહ્યું કે માત્ર શિક્ષણ મંત્રીના રાજીનામાની માંગણીથી દેશની સમસ્યાઓનો ઉકેલ આવી શકે નહીં. તેમણે લખ્યું કે કોકરોચ જનતા પાર્ટીનો વિરોધ અને તેની રાજનીતિ કોઈ મજબૂત તર્ક પર આધારિત નથી. તેમના મતે, એક શિક્ષણ મંત્રી જશે તો બીજો આવી જશે, પરંતુ દેશની મૂળભૂત સમસ્યાઓ યથાવત્ રહેશે. કાત્જુએ વ્યંગાત્મક અંદાજમાં કહ્યું કે પેપર લીકની વાત થાય છે, પરંતુ હકીકતમાં તો આખો દેશ જ ‘લીક’ થઈ ગયો છે.
કાત્જુના જણાવ્યા અનુસાર ઈશ્ક કરો પાર્ટીનો મુખ્ય હેતુ સમાજમાં વધતી નફરત અને વિભાજનકારી રાજનીતિનો વિરોધ કરવાનો છે. તેમણે કહ્યું કે પાર્ટી પ્રેમની રાજનીતિ કરશે અને લોકોને એકબીજા પ્રત્યે સકારાત્મક ભાવના રાખવા પ્રોત્સાહિત કરશે. જોકે તેમણે સ્પષ્ટ કર્યું કે અહીં પ્રેમનો અર્થ માત્ર વેલેન્ટાઈન ડે અથવા વ્યક્તિગત સંબંધો પૂરતો સીમિત નથી. પાર્ટી બેરોજગારી, ગરીબી, ભૂખમરો અને અન્ય સામાજિક-આર્થિક પડકારો જેવા મુદ્દાઓ પર પણ કામ કરવાની વાત કરી રહી છે. કાત્જુની પાર્ટીની જાહેરાત બાદ સોશિયલ મીડિયા પર વિવિધ પ્રકારની પ્રતિક્રિયાઓ જોવા મળી છે. કેટલાક લોકોએ તેને દેશની હાલની રાજકીય અને વહીવટી વ્યવસ્થાની ટીકા કરવા માટેનું વ્યંગાત્મક પગલું ગણાવ્યું છે. ઘણા યુઝર્સે ટિપ્પણી કરી કે વિશ્વના અનેક દેશોમાં આવી વ્યંગાત્મક અથવા પ્રતીકાત્મક પાર્ટીઓ બનતી રહે છે, જે સિસ્ટમની ખામીઓ તરફ લોકોનું ધ્યાન દોરવાનું કામ કરે છે. કાત્જુની ‘ઈશ્ક કરો પાર્ટી’ વાસ્તવિક રાજકીય વિકલ્પ તરીકે ઉભરી આવશે કે માત્ર એક સામાજિક-રાજકીય સંદેશ પૂરતી જ રહેશે, તે આવનારા સમયમાં સ્પષ્ટ થશે. પરંતુ તેની અનોખી નામકરણ અને વિચારધારાને કારણે આ પાર્ટી હાલ ચર્ચાનું કેન્દ્ર બની છે.
