ગુજરાતમાં છેલ્લા કેટલાક દિવસોથી સતત વરસી રહેલા ભારે વરસાદ વચ્ચે હવામાન વિભાગે આગામી દિવસો માટે પણ મહત્વની આગાહી કરી છે. રાજ્યના અનેક વિસ્તારોમાં હજુ પણ ભારેથી અતિભારે વરસાદની શક્યતા વ્યક્ત કરવામાં આવી છે. રાજ્ય પર સક્રિય રહેલી વરસાદી સિસ્ટમને કારણે આજે પણ અનેક જિલ્લાઓમાં રેડ અને ઓરેન્જ એલર્ટ જાહેર કરવામાં આવ્યા છે. હવામાન નિષ્ણાત અંબાલાલ પટેલે પણ આગામી 24 કલાક રાજ્યના મોટા ભાગના વિસ્તારોમાં વરસાદી માહોલ યથાવત રહેવાની શક્યતા વ્યક્ત કરી છે.
6 ઓગસ્ટ સુધી ભારે વરસાદની આગાહી
હવામાન વિભાગના જણાવ્યા અનુસાર અમદાવાદ સહિત સમગ્ર ગુજરાતમાં 6 ઓગસ્ટ સુધી ભારેથી અતિભારે વરસાદની શક્યતા છે. રાજ્ય પર સર્જાયેલું ડિપ્રેશન પશ્ચિમ-ઉત્તર પશ્ચિમ દિશામાં આગળ વધી રહ્યું છે. તેની તીવ્રતા થોડી ઘટી હોવા છતાં વરસાદી અસર હજુ પણ યથાવત રહેશે. હવામાન વિભાગના જણાવ્યા મુજબ વરસાદી સિસ્ટમ ધીમે ધીમે રાજસ્થાન તરફ આગળ વધી રહી હોવાથી 3 ઓગસ્ટ બાદ વરસાદનું જોર ધીમે ધીમે ઘટી શકે છે.
આ જિલ્લાઓમાં રેડ એલર્ટ
આજે અમદાવાદ, સુરેન્દ્રનગર, મોરબી, રાજકોટ, બોટાદ અને ભાવનગર જિલ્લામાં રેડ એલર્ટ જાહેર કરવામાં આવ્યું છે. આ વિસ્તારોમાં અત્યંત ભારે વરસાદ, નીચાણવાળા વિસ્તારોમાં પાણી ભરાવાની સ્થિતિ અને સ્થાનિક સ્તરે પૂર જેવી સ્થિતિ સર્જાવાની શક્યતા વ્યક્ત કરવામાં આવી છે. લોકોને જરૂરી કામ સિવાય બહાર ન નીકળવા અને વહીવટી તંત્રની સૂચનાઓનું પાલન કરવાની અપીલ કરવામાં આવી છે.
ઓરેન્જ અને યલો એલર્ટ ધરાવતા જિલ્લાઓ
કચ્છ, વાવ-થરાદ, પાટણ, બનાસકાંઠા, મહેસાણા, સાબરકાંઠા, અરવલ્લી, ગાંધીનગર, ખેડા, આણંદ, ભરૂચ, અમરેલી અને જામનગર જિલ્લામાં ઓરેન્જ એલર્ટ જાહેર કરવામાં આવ્યું છે. જ્યારે દેવભૂમિ દ્વારકા, પોરબંદર, જુનાગઢ, ગીર સોમનાથ, મહીસાગર, પંચમહાલ, દાહોદ, છોટાઉદેપુર, વડોદરા, નર્મદા, સુરત, નવસારી, વલસાડ, દમણ અને દાદરા નગર હવેલીમાં ભારે વરસાદની આગાહી કરવામાં આવી છે.
અંબાલાલ પટેલની આગાહી શું કહે છે?
હવામાન નિષ્ણાત અંબાલાલ પટેલના જણાવ્યા મુજબ આગામી 24 કલાક દરમિયાન રાજ્યમાં વરસાદી માહોલ યથાવત રહેશે. અમદાવાદ અને ગાંધીનગરમાં હળવાથી ભારે વરસાદી ઝાપટાં પડી શકે છે, જ્યારે રાજકોટમાં ભારેથી અતિભારે વરસાદની શક્યતા છે. ઉત્તર ગુજરાતના સાબરકાંઠા, અરવલ્લી, બનાસકાંઠા તેમજ રાજસ્થાનને અડીને આવેલા વિસ્તારોમાં પણ ભારે વરસાદની સંભાવના છે.
જામનગર, દેવભૂમિ દ્વારકા, પોરબંદર અને અમરેલીના કેટલાક વિસ્તારોમાં હળવાથી મધ્યમ વરસાદ પડી શકે છે. કચ્છ જિલ્લામાં પણ વરસાદી પ્રવૃત્તિ ચાલુ રહેવાની શક્યતા છે. દક્ષિણ ગુજરાત અને સૌરાષ્ટ્રના અનેક વિસ્તારોમાં પણ છૂટાછવાયા વરસાદી ઝાપટાં ચાલુ રહેશે.
વરસાદનું જોર ક્યારેથી ઘટશે?
હવામાન વિભાગના જણાવ્યા મુજબ હાલનું ડીપ ડિપ્રેશન હવે વેલમાર્ક લો પ્રેશરમાં ફેરવાઈને રાજસ્થાન તરફ આગળ વધી રહ્યું છે. જેના કારણે આવતીકાલથી વરસાદની તીવ્રતામાં ધીમે ધીમે ઘટાડો નોંધાઈ શકે છે. જોકે રાજ્યના કેટલાક વિસ્તારોમાં હજુ પણ ભારે વરસાદ ચાલુ રહેવાની શક્યતા યથાવત છે.
ખેડૂતો માટે ચિંતાનો વિષય
કૃષિ નિષ્ણાતોના જણાવ્યા મુજબ આશ્લેષા નક્ષત્ર દરમિયાન પડી રહેલો સતત વરસાદ તમામ પાક માટે અનુકૂળ માનવામાં આવતો નથી. ખાસ કરીને વધુ ભેજને કારણે ઊભા પાકને નુકસાન થવાની શક્યતા રહેતી હોવાથી ખેડૂતોમાં ચિંતા જોવા મળી રહી છે. સતત વરસાદને કારણે ખેતરોમાં પાણી ભરાવાની સમસ્યા પણ વધી શકે છે.
