ખોડિયારનગર ચાર રસ્તા પાસે નવનિર્મિત કલવર્ટ અને માર્ગમાં મોટા ગાબડાં પડતાં કોન્ટ્રાક્ટરની કામગીરી સામે ઉઠ્યા સવાલો
વડોદરા: ચોમાસાની હજુ તો સત્તાવાર શરૂઆત પણ થઈ નથી અને વરસાદનો એક ટીપો પડ્યો નથી, ત્યાં જ તંત્રની નબળી કામગીરી અને ભ્રષ્ટાચારના જીવતા જાગતા નમૂના સમાન કિસ્સો વડોદરાના ખોડિયારનગર વિસ્તારમાંથી સામે આવ્યો છે. ખોડિયારનગર પાસે કરોડોના ખર્ચે નવનિર્મિત રોડ અને નાળું સત્તાવાર રીતે ખુલ્લા મુકાય તે પહેલાં જ અચાનક મોટા પાયે ધસી જતાં તંત્રની ભારે ફજેતી થવા પામી છે. આ ઘટનાને સ્થાનિક નાગરિકોમાં પાલિકાની કામગીરી સામે ભારોભાર આક્રોશ જોવા મળી રહ્યો છે.
સ્થાનિક સૂત્રો પાસેથી મળતી વિગતો અનુસાર, વાહનવ્યવહારની સુવિધા અને ચોમાસામાં પાણીના નિકાલ માટે તંત્ર દ્વારા ખોડિયારનગર ચાર રસ્તા પાસે નવીનતમ બોક્સ કલવર્ટ અને તેની આસપાસ પાકા રોડનું નિર્માણ કરવામાં આવ્યું હતું. આ પ્રોજેક્ટ હજુ ગણતરીના દિવસો પહેલાં જ પૂર્ણ થયો હતો અને તેને જનતા માટે સત્તાવાર રીતે ખુલ્લો મૂકવાની તૈયારીઓ ચાલી રહી હતી. જો કે, તંત્ર લોકાર્પણની રિબન કાપે તે પહેલાં જ આખો માર્ગ પત્તાના મહેલની જેમ બેસી ગયો હતો અને કલવર્ટની દીવાલો તેમજ રોડ પર મોટા-મોટા ગાબડાં પડી ગયા હતા.
વરસાદ વગર જ આ પ્રકારે આખેઆખો નવો રોડ ધસી જવાની ઘટનાએ કોન્ટ્રાક્ટર અને મોનિટરિંગ કરતા સરકારી એન્જિનિયરોની મિલીભગતની પોલ ખોલી નાખી છે. સ્થાનિક રહીશોએ આક્ષેપ કર્યો છે કે કામમાં અત્યંત હલકી ગુણવત્તાનું મટીરિયલ વાપરવામાં આવ્યું હોવાથી જ આ પરિસ્થિતિ સર્જાઈ છે. જો સામાન્ય દિવસોમાં જ આ હાલત હોય, તો ભારે વરસાદમાં આ માર્ગ પરથી પસાર થવું કોઈ મોટી દુર્ઘટનાને આમંત્રણ આપવા સમાન બની શકત. હાલમાં આ મામલે લોકો દ્વારા જવાબદાર અધિકારીઓ અને કોન્ટ્રાક્ટર સામે કડક કાનૂની પગલાં લેવાની અને તટસ્થ તપાસ કરવાની માંગ પ્રબળ બની છે. તંત્ર દ્વારા મામલો થાળે પાડવા સમારકામની તજવીજ હાથ ધરાઈ છે, પરંતુ પ્રજાના ટેક્સના પૈસાનો આ રીતે વેડફાટ થતાં લોકોમાં ભારે નારાજગી છે.
