ભારત અને ઇંગ્લેન્ડ વચ્ચે પાંચ મેચની ટી20 શ્રેણીની પ્રથમ મેચ વરસાદના કારણે કોઈ પરિણામ વિના સમાપ્ત થઈ હતી. બુધવારે 1 જુલાઈએ ડરહમના ચેસ્ટર-લે-સ્ટ્રીટ સ્થિત રિવરસાઇડ ગ્રાઉન્ડ પર રમાયેલી મેચમાં ભારતીય ટીમે પહેલા બેટિંગ કરીને 189 રનનો મજબૂત સ્કોર ઉભો કર્યો હતો. જોકે ઇંગ્લેન્ડ પોતાની ઇનિંગ્સ શરૂ કરે તે પહેલાં જ ભારે વરસાદ શરૂ થતાં મેચ રદ કરવાનો નિર્ણય લેવામાં આવ્યો હતો. આ સાથે ચેસ્ટર-લે-સ્ટ્રીટ ખાતે ભારત અને ઇંગ્લેન્ડ વચ્ચે વરસાદના કારણે મેચ રદ થવાનો ઇતિહાસ યથાવત રહ્યો. આ મેદાન પર બંને ટીમો વચ્ચે રમાયેલી સતત ત્રીજી આંતરરાષ્ટ્રીય મેચ વરસાદના કારણે અધૂરી રહી છે.
આ પહેલાં વર્ષ 2002 અને 2011માં અહીં ભારત અને ઇંગ્લેન્ડ વચ્ચે બે વન-ડે મેચ રમાઈ હતી. બંને વખતે ભારતે પ્રથમ બેટિંગ કરી હતી, પરંતુ ઇંગ્લેન્ડની ઇનિંગ્સ દરમિયાન વરસાદને કારણે મેચ પૂર્ણ થઈ શકી નહોતી. હવે પહેલી ટી20માં પણ એ જ દૃશ્ય જોવા મળ્યું. મેચની શરૂઆતથી જ વાતાવરણ વાદળછાયું હતું. ભારતીય ઇનિંગ્સ દરમિયાન અનેક વખત હળવો વરસાદ પડ્યો હતો, પરંતુ રમત ચાલુ રહી હતી. જોકે છેલ્લી ઓવર બાદ વરસાદ વધુ તીવ્ર બનતા ખેલાડીઓને મેદાન છોડવું પડ્યું. લાંબી રાહ બાદ પણ વરસાદ બંધ ન થતાં અમ્પાયરોએ મેચ રદ જાહેર કરી હતી. ભારતીય ટીમે ટોસ જીતીને પ્રથમ બેટિંગ કરવાનો નિર્ણય લીધો હતો. આ મેચમાં પણ 15 વર્ષીય વૈભવ સૂર્યવંશીને ડેબ્યૂ કરવાની તક આપવામાં આવી નહોતી, જેના કારણે ચાહકોમાં નિરાશા જોવા મળી હતી.
ઓપનિંગ બેટ્સમેન સંજુ સેમસન ફરી એકવાર નિષ્ફળ રહ્યો. તેણે માત્ર 1 રન બનાવ્યો અને આ પ્રવાસમાં સતત ત્રીજી વખત સસ્તામાં આઉટ થયો. બીજી તરફ ઈશાન કિશન પણ ખાતું ખોલાવ્યા વગર પેવેલિયન પરત ફર્યો. શરૂઆતના ઝટકાઓ બાદ અભિષેક શર્માએ આક્રમક બેટિંગ કરીને ભારતીય ઇનિંગ્સને સંભાળી હતી. તેણે માત્ર 20 બોલમાં અડધી સદી ફટકારી અને ઇંગ્લિશ બોલરો પર દબાણ બનાવ્યું. કેપ્ટન શ્રેયસ અય્યરે પણ જવાબદારીભરી ઇનિંગ્સ રમી હતી. તેણે 47 બોલમાં 68 રનની શાનદાર અડધી સદી ફટકારી હતી. શ્રેયસ અને શિવમ દુબે વચ્ચે મહત્વપૂર્ણ ભાગીદારી જોવા મળી હતી.
શિવમ દુબેએ પણ ઝડપી બેટિંગ કરીને 21 બોલમાં 42 રન નોંધાવ્યા હતા. અંતિમ ઓવરોમાં બંને બેટ્સમેનની આક્રમક રમતના કારણે ભારતનો સ્કોર 20 ઓવરમાં 189 રન સુધી પહોંચ્યો હતો, જે આ મેદાન પર પડકારજનક સ્કોર માનવામાં આવી રહ્યો હતો. ઇંગ્લેન્ડ તરફથી સાકિબ મહમૂદ સૌથી સફળ બોલર રહ્યો. તેણે ત્રણ વિકેટ ઝડપી હતી, જ્યારે અન્ય બોલરો ભારતીય બેટ્સમેનોને રોકવામાં ખાસ સફળ રહ્યા નહોતા. ભારતે મજબૂત સ્કોર બનાવ્યો હોવા છતાં વરસાદના કારણે ઇંગ્લેન્ડને એકપણ બોલ રમવાની તક મળી નહીં અને મેચનું કોઈ પરિણામ આવ્યું નહીં. બંને ટીમોને એક-એક પોઇન્ટથી સંતોષ માનવો પડ્યો. હવે બંને ટીમો શ્રેણીની બીજી મેચમાં જીત સાથે શરૂઆત કરવાની કોશિશ કરશે. ભારતીય ટીમની નજર ખાસ કરીને સંજુ સેમસનના ફોર્મ અને વૈભવ સૂર્યવંશીને તક મળે છે કે નહીં તેના પર રહેશે.
