પ્રેમિકા સિયા ગોયલ અને તેના પ્રેમી ચેતન ચૌધરીને લઈને પોલીસે ક્રાઇમ સીન પર પહોંચીને ઘટનાની એક-એક ક્ષણ ફરી જીવંત કરી; હત્યાના કાવતરાના વધુ પુરાવા એકત્ર કરવાની કાર્યવાહી તેજ
મહારાષ્ટ્રના પુણેમાં કરોડો રૂપિયાના રિયલ એસ્ટેટ વ્યવસાયી કેતન અગ્રવાલની હત્યાના કેસમાં તપાસ હવે અત્યંત નિર્ણાયક તબક્કે પહોંચી ગઈ છે. પોલીસ આ કેસમાં આરોપી સિયા ગોયલ અને તેના કથિત પ્રેમી ચેતન ચૌધરીને લઈને આજે વહેલી સવારે લોનાવળા નજીક આવેલા લોહગઢ કિલ્લા પર પહોંચી હતી, જ્યાં સમગ્ર ઘટનાનું સીન રિક્રિએશન (Crime Scene Recreation) કરવામાં આવ્યું. ઘટનાના દિવસે શું બન્યું હતું, આરોપીઓએ કેવી રીતે યોજના બનાવી હતી અને કેતનને કઈ રીતે ખીણમાં ધકેલી દેવામાં આવ્યો હતો તે તમામ બાબતોની પોલીસ દ્વારા સ્થળ પર ફરી તપાસ કરવામાં આવી.
પોલીસ અધિકારીઓના જણાવ્યા અનુસાર સીન રિક્રિએશનનો મુખ્ય હેતુ આરોપીઓના નિવેદનો અને અત્યાર સુધી એકત્ર કરાયેલા ટેક્નિકલ તથા ફોરેન્સિક પુરાવાઓની ચકાસણી કરવાનો હતો. બંને આરોપીઓને ઘટનાસ્થળે લઈ જઈને પૂછવામાં આવ્યું કે તેઓ કયા માર્ગે કિલ્લા પર પહોંચ્યા, કેતન ક્યાં ઊભો હતો, ચેતન ક્યાં છુપાયો હતો અને આખરે કેવી રીતે તેને ખીણમાં ધકેલી દેવામાં આવ્યો. આ સમગ્ર કાર્યવાહીનું વિડિયો રેકોર્ડિંગ પણ કરવામાં આવ્યું છે.તપાસમાં અત્યાર સુધી સામે આવેલા પુરાવા મુજબ આ હત્યા કોઈ અચાનક બનેલી ઘટના નહોતી, પરંતુ ઘણા દિવસોથી રચાયેલું કાવતરું હતું. પોલીસના દાવા પ્રમાણે સિયા ગોયલ અને ચેતન ચૌધરીએ કેતનની હત્યા કરવા માટે અનેક વખત યોજના બનાવી હતી. તેઓએ ઇન્ટરનેટ પર ઝેર આપવાથી લઈને અકસ્માત જેવી ઘટના સર્જવાના રસ્તાઓ વિશે પણ માહિતી શોધી હતી. એટલું જ નહીં, લોહગઢ કિલ્લા પર અગાઉ પણ જઈને ઘટનાની “રિહર્સલ” કરી હોવાનું તપાસમાં સામે આવ્યું છે.
પોલીસના જણાવ્યા મુજબ આ કેસમાં લોહગઢ કિલ્લો અગાઉ પણ અનેક વખત પસંદ કરવામાં આવ્યો હતો. આરોપીઓએ ખીણની ઊંડાઈ, પ્રવાસીઓની અવરજવર અને CCTV કવરેજ સહિતની બાબતોનું નિરીક્ષણ કર્યું હતું જેથી હત્યાને અકસ્માત તરીકે રજૂ કરી શકાય. પરંતુ ટેક્નિકલ તપાસ, મોબાઇલ લોકેશન અને CCTV ફૂટેજે આખું કાવતરું બહાર લાવી દીધું.સાથે જ
તપાસમાં સામે આવ્યું છે કે કેતન અગ્રવાલ અને સિયા ગોયલની સગાઈ થઈ ચૂકી હતી અને થોડા મહિનાઓમાં બંનેના ભવ્ય લગ્ન થવાના હતા. પરંતુ આ દરમિયાન સિયા ગોયલનો ચેતન ચૌધરી સાથે પ્રેમસંબંધ શરૂ થયો હતો. પોલીસના જણાવ્યા મુજબ બંનેએ કેતનને પોતાના સંબંધમાં સૌથી મોટો અવરોધ માન્યો અને તેને રસ્તામાંથી હટાવવાનું નક્કી કર્યું.
પોલીસનું કહેવું છે કે હત્યાના દિવસે સિયાએ પોતાના જન્મદિવસની ઉજવણીના બહાને કેતનને લોહગઢ કિલ્લા પર ટ્રેકિંગ માટે બોલાવ્યો હતો. બંને કિલ્લા પર પહોંચ્યા બાદ ચેતન પહેલાથી જ ત્યાં છુપાઈને બેઠો હતો. યોગ્ય તક મળતાં બંનેએ મળીને કેતનને ઊંડી ખીણમાં ધકેલી દીધો. ત્યારબાદ સિયાએ સમગ્ર ઘટનાને અકસ્માત ગણાવી પોલીસને ભ્રમિત કરવાનો પ્રયાસ કર્યો હતો.શરૂઆતમાં આ ઘટના ટ્રેકિંગ દરમિયાન થયેલા અકસ્માત તરીકે નોંધાઈ હતી. જોકે કેતનના પરિવારને શરૂઆતથી જ શંકા હતી કે આ સામાન્ય અકસ્માત નથી. પરિવારના આગ્રહ બાદ પોલીસે મોબાઇલ ડેટા, CCTV ફૂટેજ, કોલ ડિટેઇલ્સ અને અન્ય ડિજિટલ પુરાવાઓની તપાસ શરૂ કરી હતી. ત્યારબાદ સમગ્ર કેસમાં ચોંકાવનારા ખુલાસા થયા અને પોલીસે સિયા ગોયલ તથા ચેતન ચૌધરીની ધરપકડ કરી હતી.
તપાસ દરમિયાન વધુ એક મહત્વનો ખુલાસો એ થયો કે આ હત્યાનો પ્રયાસ અગાઉ પણ અનેક વખત કરવામાં આવ્યો હતો. પોલીસના જણાવ્યા મુજબ એક પ્રસંગે સિયાએ કેતનને ખીણ તરફ ધકેલવાનો પ્રયાસ કર્યો હતો, પરંતુ તે બચી ગયો હતો. ત્યારબાદ તેણે “સાપ દેખાયો હતો એટલે ધક્કો લાગ્યો” એવી વાત કહીને શંકા દૂર કરી હતી. બીજી વખત પણ યોજના બનાવી હતી પરંતુ સફળ થઈ શકી નહોતી. આખરે 18 જૂનના રોજ આરોપીઓ પોતાની યોજનામાં સફળ થયા હોવાનું પોલીસનું કહેવું છે.સીન રિક્રિએશન દરમિયાન પોલીસે ઘટનાસ્થળના દરેક ખૂણાની ફરી તપાસ કરી હતી. આરોપીઓ પાસેથી સ્થળ પર ઊભા રહીને સમગ્ર ઘટનાક્રમ સમજાવવામાં આવ્યો હતો. ફોરેન્સિક નિષ્ણાતોની ટીમે પણ સ્થળ પરથી વધારાના નમૂનાઓ અને અન્ય સંભવિત પુરાવાઓ એકત્ર કર્યા છે. પોલીસનું માનવું છે કે આ પ્રક્રિયાથી ચાર્જશીટ વધુ મજબૂત બનશે.
આ કેસે સમગ્ર મહારાષ્ટ્રમાં ભારે ચર્ચા જગાવી છે. કેતન અગ્રવાલના પરિવારજનો અને રહેણાંક સોસાયટીના લોકોએ ન્યાયની માંગ સાથે કેન્ડલ માર્ચ પણ યોજી હતી. પરિવારનું કહેવું છે કે આરોપીઓને કડકમાં કડક સજા મળવી જોઈએ કારણ કે આ હત્યા સંપૂર્ણપણે પૂર્વનિયોજિત હતી.આ કેસની ગંભીરતાને ધ્યાનમાં રાખીને મહારાષ્ટ્રના મુખ્યમંત્રી દેવેન્દ્ર ફડણવીસે પણ પીડિત પરિવાર સાથે મુલાકાત કરી હતી. તેમણે કેસની ઝડપી સુનાવણી માટે ફાસ્ટ-ટ્રેક કોર્ટમાં કાર્યવાહી કરવાના નિર્દેશ આપ્યા છે અને જાણીતા વકીલ ઉજ્જ્વલ નિકમને વિશેષ સરકારી વકીલ તરીકે નિયુક્ત કરવાની જાહેરાત કરી છે, જેથી કેસનો ઝડપથી નિકાલ આવી શકે.
હાલ પોલીસે આરોપીઓની પૂછપરછ ચાલુ રાખી છે અને ડિજિટલ પુરાવા, મોબાઇલ ચેટ, લોકેશન ડેટા તથા ફોરેન્સિક માહિતીના આધારે સમગ્ર ષડ્યંત્રની કડી જોડવાનો પ્રયાસ કરી રહી છે. સીન રિક્રિએશન બાદ તપાસ વધુ મજબૂત બની છે અને આગામી દિવસોમાં આ કેસમાં વધુ મહત્વના ખુલાસા થવાની શક્યતા વ્યક્ત કરવામાં આવી રહી છે.
