રાજ્ય સરકારનો મહત્વનો નિર્ણય, જિલ્લા નિરીક્ષક જમીન દફતર કચેરીઓનું વિકેન્દ્રીકરણ
૧૨ જૂન ૨૦૨૬થી નવી વ્યવસ્થા અમલી બનતા અરજદારોના સમય અને નાણાંની મોટી બચત થશે
(પ્રતિનિધિ), વડોદરા. તા.૧૮
વડોદરા જિલ્લાના ગ્રામ્ય વિસ્તારોમાં રહેતા હજારો અરજદારો અને ખેડૂતો માટે રાજ્ય સરકાર દ્વારા એક અત્યંત મહત્વપૂર્ણ અને ખુશખબર આપતો નિર્ણય લેવામાં આવ્યો છે. વર્ષોથી જમીન માપણી, સીમાંકન કે નકશા મેળવવા જેવા નાના-મોટા કામો માટે ગ્રામ્ય પ્રજાને પોતાના તાલુકા મથકેથી છેક વડોદરા જિલ્લા મુખ્ય મથક સુધી લાંબા ધક્કા ખાવા પડતા હતા. પરંતુ હવે આ હાલાકીનો કાયમી અંત આવી ગયો છે. રાજ્ય સરકાર દ્વારા જિલ્લા નિરીક્ષક જમીન દફતર કચેરીઓનું વહીવટી વિકેન્દ્રીકરણ કરવામાં આવ્યું છે, જેના કારણે જમીનને લગતી અનેક મહત્વની સેવાઓ હવે સીધી તાલુકા કક્ષાએ જ ઉપલબ્ધ કરાવી દેવામાં આવી છે.
સરકારના સત્તાવાર અહેવાલ મુજબ, આ નવી પ્રજાલક્ષી વ્યવસ્થા ગત તારીખ ૧૨ જૂન, ૨૦૨૬થી સમગ્ર જિલ્લામાં સંપૂર્ણપણે અમલમાં મૂકી દેવામાં આવી છે. આ વ્યવસ્થાને સુચારૂ રૂપે ચલાવવા માટે જે-તે તાલુકા મથકો પર સંબંધિત જવાબદાર અધિકારીઓની નિમણૂક પણ તાત્કાલિક અસરથી કરી દેવામાં આવી છે, જેથી વહીવટી કામગીરીમાં કોઈ વિલંબ ન થાય અને સ્થાનિક સ્તરે જ ફાઈલોનો ઝડપી નિકાલ લાવી શકાય.
નવી વ્યવસ્થા હેઠળ હવે અરજદારોને જમીન સીમાંકન અને માપણીની કામગીરી, પ્રોપર્ટી કાર્ડ અને સત્તાવાર નકશા મેળવવા, બિનખેતી માટેના જરૂરી અભિપ્રાયો તેમજ સ્વામિત્વ યોજના અંતર્ગત થતી તમામ પ્રકારની મહત્વની કામગીરીઓ માટે છેક વડોદરા સુધી જવાની જરૂર રહેશે નહીં. આ તમામ વહીવટી સેવાઓ હવે ગણતરીના દિવસોમાં તાલુકા મથકેથી જ ઓનલાઇન અને ઓફલાઇન માધ્યમથી સહેલાઈથી મળી રહેશે.
આ ઐતિહાસિક નિર્ણયથી વડોદરા જિલ્લાના કુલ સાત મોટા તાલુકાઓના ગ્રામીણ નાગરિકોને સીધો અને મોટો લાભ મળવા જઈ રહ્યો છે. જેમાં પાદરા, કરજણ, ડભોઈ, શિનોર, વાઘોડિયા, સાવલી અને ડેસર તાલુકાના અરજદારોનો સમાવેશ થાય છે. આ વિસ્તારોના અંતરિયાળ ગામડાઓમાં રહેતા લોકોને અગાઉ સામાન્ય નકશા કે માપણી માટે પણ આખો દિવસ બગાડીને, આર્થિક નુકસાન વેઠીને વડોદરા સુધી આવવું પડતું હતું, જેમાંથી હવે કાયમી મુક્તિ મળી છે.
નવી વ્યવસ્થા અંગે સ્થાનિક વહીવટી તંત્રના જણાવ્યા અનુસાર, તાલુકા કક્ષાએ જ તમામ સત્તાઓ અને રેકોર્ડ ઉપલબ્ધ કરાવાતા કામગીરી અત્યંત ઝડપી અને પારદર્શક બનશે. વડોદરા સુધી જવા-આવવાનો વાહનવ્યવહારનો ખર્ચ અને આખો દિવસ કચેરીઓમાં લાઈનોમાં ઊભા રહેવાનો સમય બંનેની મોટી બચત થશે. ભ્રષ્ટાચાર મુક્ત અને ડિજિટલ વહીવટ તરફ આ એક મોટું કદમ સાબિત થશે. એક અંદાજ મુજબ આ નિર્ણયથી આ સાતેય તાલુકાના લાખો ગ્રામીણ પરિવારોને સીધી રાહત થશે. સ્થાનિક આગેવાનો, ખેડૂત સંગઠનો અને ગ્રામજનો દ્વારા સરકારના આ પ્રજાભિમુખ નિર્ણયને ઉત્સાહભેર વધાવી લેવામાં આવ્યો છે. આ નવીન વ્યવસ્થાથી વહીવટી ક્ષેત્રે ‘ગામડાનું કામ ગામડામાં જ’ થાય તે સૂત્ર ખરા અર્થમાં સાર્થક થતું જોવા મળી રહ્યું છે.
