કેન્દ્રશાસિત પ્રદેશ લક્ષદ્વીપમાં લગભગ 47 વર્ષથી અમલમાં રહેલી દારૂબંધી નીતિમાં મહત્વપૂર્ણ ફેરફાર કરવામાં આવ્યો છે. પ્રવાસન ઉદ્યોગને નવી દિશા આપવા અને આંતરરાષ્ટ્રીય ટૂરિસ્ટોને આકર્ષવા માટે પ્રશાસને પસંદગીના ટાપુઓ પર નિયંત્રિત રીતે દારૂના વેચાણ અને સેવનની મંજૂરી આપવાનો નિર્ણય લીધો છે. આ સાથે સરકાર દ્વારા દારૂ પર 400 ટકા સુધીનો વિશેષ ટેક્સ પણ વસૂલવામાં આવશે.
માહિતી અનુસાર, લક્ષદ્વીપને વૈશ્વિક પ્રવાસન નકશા પર વધુ મજબૂત સ્થાન અપાવવા માટે આ નિર્ણય લેવામાં આવ્યો છે. છેલ્લા કેટલાક વર્ષોમાં માલદીવ્સ આંતરરાષ્ટ્રીય પ્રવાસીઓ માટે લોકપ્રિય સ્થળ તરીકે ઉભરી આવ્યું છે. સાથે જ લક્ષદ્વીપને સ્પર્ધાત્મક બનાવવા માટે કેન્દ્ર સરકાર અને સ્થાનિક પ્રશાસન વિવિધ પગલાં લઈ રહ્યા છે. દારૂબંધીમાં આંશિક છૂટ પણ તે જ દિશામાં એક મહત્વપૂર્ણ પહેલ માનવામાં આવી રહી છે.
પ્રશાસનના નવા નિયમો અનુસાર તમામ ટાપુઓમાં નહીં પરંતુ ચોક્કસ પ્રવાસન કેન્દ્રો અને રિસોર્ટ વિસ્તારોમાં જ દારૂની ઉપલબ્ધતા રહેશે. સ્થાનિક રહેણાંક વિસ્તારોમાં દારૂના વેચાણ અને ઉપયોગ પર નિયંત્રણ યથાવત રહેશે. સરકારનું કહેવું છે કે આ નિર્ણયથી સ્થાનિક સંસ્કૃતિ અને સામાજિક માળખાને નુકસાન ન પહોંચે તે માટે કાળજી લેવામાં આવશે. દારૂના વેચાણ પર ભારે ટેક્સ લગાવવાનો મુખ્ય હેતુ એક તરફ સરકારી આવકમાં વધારો કરવાનો છે તો બીજી તરફ બિનજરૂરી ઉપયોગ અટકાવવાનો પણ છે. અધિકારીઓના જણાવ્યા મુજબ વિવિધ પ્રકારના આલ્કોહોલિક પીણાં પર 100 ટકાથી લઈને 400 ટકા સુધીનો ટેક્સ લાગુ થઈ શકે છે. જેના કારણે સરકારને નોંધપાત્ર આવક મળશે, જેનો ઉપયોગ પ્રવાસન સુવિધાઓ અને ઈન્ફ્રાસ્ટ્રક્ચરના વિકાસ માટે કરવામાં આવશે.
પ્રવાસન ક્ષેત્ર સાથે જોડાયેલા ઉદ્યોગકારો અને રિસોર્ટ સંચાલકો આ નિર્ણયને આવકાર આપી રહ્યા છે. તેમનું માનવું છે કે આંતરરાષ્ટ્રીય પ્રવાસીઓની પસંદગીને ધ્યાનમાં રાખીને લેવામાં આવેલો આ નિર્ણય લક્ષદ્વીપમાં પર્યટકોની સંખ્યામાં વધારો કરી શકે છે. ખાસ કરીને વિદેશી પ્રવાસીઓ માટે આ એક મહત્વપૂર્ણ સુવિધા બની શકે છે.જોકે, કેટલાક સામાજિક સંગઠનો અને સ્થાનિક લોકો દ્વારા આ નિર્ણય અંગે ચિંતા પણ વ્યક્ત કરવામાં આવી છે. તેઓનું કહેવું છે કે વિકાસ સાથે સ્થાનિક પરંપરા, સંસ્કૃતિ અને સામાજિક મૂલ્યોનું સંરક્ષણ પણ એટલું જ જરૂરી છે.
લક્ષદ્વીપ પ્રશાસન હવે પ્રવાસન વિકાસ અને સામાજિક સંતુલન વચ્ચે સમન્વય સાધવાનો પ્રયાસ કરી રહ્યું છે. આગામી સમયમાં આ નિર્ણયનો પ્રદેશના પ્રવાસન ઉદ્યોગ અને અર્થતંત્ર પર કેટલો પ્રભાવ પડે છે તેના પર સૌની નજર રહેશે.
