આજના ડિજિટલ યુગમાં સોશિયલ મીડિયા પરના ફોલોઅર્સ કોઈપણ સેલિબ્રિટીની લોકપ્રિયતાનું મોટું માપદંડ માનવામાં આવે છે. વિરાટ કોહલી, પ્રિયંકા ચોપરા અને ક્રિસ્ટિયાનો રોનાલ્ડો જેવી હસ્તીઓ માત્ર રમતગમત અથવા મનોરંજન જગત સુધી મર્યાદિત નથી રહી, પરંતુ વૈશ્વિક બ્રાન્ડ બની ગઈ છે. તેમની દરેક પોસ્ટ કરોડો લોકો સુધી પહોંચે છે અને કંપનીઓ પણ પ્રમોશન માટે તેમને મોટી રકમ ચૂકવે છે. પરંતુ હવે ઇન્સ્ટાગ્રામની પેરન્ટ કંપની મેટાએ લીધેલા મોટા પગલાં બાદ સોશિયલ મીડિયા પરની આ લોકપ્રિયતા અંગે ફરી ચર્ચા શરૂ થઈ ગઈ છે. મે 2026ની શરૂઆતમાં મેટાએ ફેક એકાઉન્ટ્સ, બોટ્સ અને લાંબા સમયથી નિષ્ક્રિય રહેલા પ્રોફાઇલ્સ સામે અત્યાર સુધીની સૌથી મોટી કાર્યવાહી હાથ ધરી હતી. સોશિયલ મીડિયા યુઝર્સ આ ઝુંબેશને ‘ગ્રેટ પર્જ ઓફ 2026’ તરીકે ઓળખાવી રહ્યા છે.
ઈન્સ્ટાગ્રામે નકલી એકાઉન્ટ્સ દૂર કરવાની પ્રક્રિયા શરૂ કરતાં જ દુનિયાભરના મોટા સેલિબ્રિટીઝના ફોલોઅર્સના આંકડામાં ભારે ઘટાડો નોંધાયો હતો. આ પગલાંથી સ્પષ્ટ થયું કે ઘણા એકાઉન્ટ્સમાં લાખો ફોલોઅર્સ એવા હતા, જે ખરેખર સક્રિય અથવા વાસ્તવિક યુઝર્સ નહોતા. વિરાટ કોહલીના ફોલોઅર્સમાં અંદાજે 20 લાખથી વધુનો ઘટાડો નોંધાયો છે. તેમના ફોલોઅર્સનો આંકડો 276 મિલિયનથી ઘટીને લગભગ 274 મિલિયન રહ્યો છે. બીજી તરફ, વિશ્વપ્રસિદ્ધ ફૂટબોલ સ્ટાર ક્રિસ્ટિયાનો રોનાલ્ડોએ સૌથી મોટો ફટકો સહન કર્યો છે. તેમના લગભગ 66 લાખથી વધુ ફોલોઅર્સ ઘટ્યા હોવાનું સામે આવ્યું છે. માત્ર આ બંને જ નહીં, પરંતુ પ્રિયંકા ચોપરા, કાઈલી જેનર અને અન્ય આંતરરાષ્ટ્રીય હસ્તીઓના ફોલોઅર્સમાં પણ નોંધપાત્ર ઘટાડો જોવા મળ્યો છે.
સોશિયલ મીડિયા પર ફોલોઅર્સ ખરીદવાનો મુદ્દો પહેલાથી જ ચર્ચામાં રહ્યો છે. વર્ષ 2019માં લંડનની ‘ઇન્સ્ટિટ્યૂટ ઓફ કન્ટેમ્પરરી મ્યુઝિક પર્ફોર્મન્સ’ દ્વારા કરવામાં આવેલા એક રિપોર્ટમાં ખુલાસો થયો હતો કે અનેક જાણીતી હસ્તીઓએ પોતાની લોકપ્રિયતા વધારવા માટે પૈસા આપીને ફોલોઅર્સ ખરીદ્યા હતા. ભારતમાં પણ આ મામલો ચર્ચામાં આવ્યો હતો, જ્યારે મુંબઈ પોલીસે ફેક ફોલોઅર્સ કૌભાંડની તપાસ દરમિયાન અભિનેત્રી પ્રિયંકા ચોપરાને સમન્સ પાઠવ્યું હતું. જોકે, મોટા ભાગના સેલિબ્રિટીઝ આ મુદ્દે જાહેરમાં બોલવાનું ટાળી રહ્યા છે. નિષ્ણાતોના મતે, સોશિયલ મીડિયા પર દેખાતી લોકપ્રિયતા હંમેશા વાસ્તવિક નથી હોતી. ઘણીવાર બ્રાન્ડ વેલ્યુ વધારવા અને વધુ પ્રભાવશાળી દેખાવા માટે ફેક ફોલોઅર્સનો સહારો લેવામાં આવે છે. જોકે, ઈન્સ્ટાગ્રામની આ તાજેતરની કાર્યવાહી એ દર્શાવે છે કે અંતે સાચા અને ઓર્ગેનિક ફેન્સ જ સૌથી વધુ મહત્વ ધરાવે છે.
