બિહારના નવા મુખ્યમંત્રી સમ્રાટ ચૌધરીએ તાજેતરમાં દિલ્હીમાં પ્રધાનમંત્રી નરેન્દ્ર મોદીની મુલાકાત લીધી, જે તેમની પદભાર સંભાળ્યા પછીની પહેલી સત્તાવાર મુલાકાત માનવામાં આવે છે. આ મુલાકાતને ભલે સૌજન્ય મુલાકાત તરીકે રજૂ કરવામાં આવી હોય, પરંતુ રાજકીય દ્રષ્ટિએ તેની ખાસ મહત્વતા છે. ખાસ કરીને રાજ્યમાં મંત્રીમંડળના સંભવિત વિસ્તરણને લઈને ચર્ચાઓ તેજ બની છે. મુખ્યમંત્રી સમ્રાટ ચૌધરીએ દિલ્હીમાં માત્ર પીએમ મોદી જ નહીં, પરંતુ સંભવિત રીતે કેન્દ્રીય ગૃહમંત્રી અમિત શાહ સાથે પણ મુલાકાત કરી શકે છે એવી અટકળો છે. રાજકીય નિષ્ણાતો માને છે કે આ મુલાકાતો પાછળનું મુખ્ય હેતુ બિહારમાં મજબૂત અને પૂર્ણ મંત્રીમંડળ રચવાની પ્રક્રિયાને અંતિમ સ્વરૂપ આપવાનું હોઈ શકે છે. હાલની સ્થિતિમાં બિહાર સરકાર અધૂરી ગણાય છે, કારણ કે હજુ સુધી સંપૂર્ણ મંત્રીમંડળ રચાયું નથી. અત્યાર સુધી માત્ર મુખ્યમંત્રી સમ્રાટ ચૌધરી અને બે નાયબ મુખ્યમંત્રીઓએ જ શપથ લીધા છે. જનતા દળ (યુનાઇટેડ)ના બિજેન્દ્ર પ્રસાદ યાદવ અને વિજય ચૌધરીને ડેપ્યુટી CM તરીકે નિયુક્ત કરવામાં આવ્યા છે. આશ્ચર્યજનક રીતે ભાજપના ક્વોટામાંથી હજુ સુધી કોઈ મંત્રીની નિમણૂક કરવામાં આવી નથી, જેના કારણે સરકારના કાર્યમાં ધીમી ગતિ જોવા મળી રહી છે.
બિહારમાં બંધારણીય રીતે કુલ 33 મંત્રીઓ સુધી મંત્રીમંડળ રચી શકાય છે, પરંતુ હાલ આ સંખ્યા શૂન્યના નજીક છે. પરિણામે, રાજ્યના વહીવટ અને નીતિ અમલીકરણમાં મુશ્કેલીઓ ઉભી થઈ શકે છે. આવી સ્થિતિમાં, નવી સરકાર માટે સૌથી મોટી પ્રાથમિકતા ઝડપથી મંત્રીમંડળનું વિસ્તરણ કરીને વહીવટી મશીનરીને ગતિ આપવાની છે.રાજકીય વિશ્લેષકોનું માનવું છે કે દિલ્હીમાં થયેલી આ બેઠકો મંત્રીમંડળ રચનાની પ્રક્રિયાને ઝડપ આપી શકે છે. ખાસ કરીને NDA ગઠબંધન હેઠળ BJP અને JDU વચ્ચે સંતુલન સાધીને મંત્રીઓની પસંદગી કરવામાં આવશે. આ પ્રક્રિયા સફળ થાય તો રાજ્યમાં શાસન વધુ અસરકારક બની શકે છે. આ દરમિયાન, બિહારમાં 24 એપ્રિલે વિધાનસભાનું વિશેષ સત્ર બોલાવવામાં આવ્યું છે. આ સત્ર દરમિયાન મુખ્યમંત્રી સમ્રાટ ચૌધરી ગૃહમાં વિશ્વાસ મત (ફ્લોર ટેસ્ટ) રજૂ કરશે. તેઓ પોતાની સરકારની બહુમતી સાબિત કરવાનો પ્રયાસ કરશે, જે તેમની રાજકીય સ્થિરતા માટે અત્યંત મહત્વપૂર્ણ રહેશે.
વિશેષ નોંધનીય વાત એ છે કે બિહારમાં આ વખતનું રાજકીય સમીકરણ થોડું જુદું છે. અગાઉ NDA સરકારમાં નીતિશ કુમાર મુખ્યમંત્રી હતા અને ભાજપના નેતાઓ નાયબ મુખ્યમંત્રી પદ પર રહેતા હતા. પરંતુ હવે પરિસ્થિતિ બદલાઈ ગઈ છે. પ્રથમ વખત BJPના નેતા સમ્રાટ ચૌધરી મુખ્યમંત્રી બન્યા છે, જ્યારે JDUના બે નેતાઓ નાયબ મુખ્યમંત્રી તરીકે કામ કરી રહ્યા છે.આ નવી વ્યવસ્થા બિહારની રાજનીતિમાં એક મહત્વપૂર્ણ ફેરફાર દર્શાવે છે. હવે નજર રહેશે કે સમ્રાટ ચૌધરી કેટલી ઝડપથી પોતાનું મંત્રીમંડળ વિસ્તારી શકે છે અને રાજ્યમાં મજબૂત શાસન સ્થાપિત કરી શકે છે.
