બોલિવુડ અભિનેત્રી શિલ્પા શેટ્ટીના પતિ અને ઉદ્યોગપતિ રાજ કુન્દ્રાને બિટકોઈન કૌભાંડ કેસમાં જામીન મળી ગયા છે. મુંબઈની ખાસ પીએમએલએ કોર્ટએ એન્ફોર્સમેન્ટ ડિરેક્ટોરેટ દ્વારા દાખલ કરાયેલી ચાર્જશીટની નોંધ લીધા બાદ તેમને રાહત આપી છે. આ કેસ અંદાજે ₹150 કરોડના બિટકોઈન વ્યવહારો સાથે જોડાયેલો હોવાનું કહેવાઈ રહ્યું છે. કોર્ટએ એક દિવસ પહેલા જ રાજ કુન્દ્રા સામે સમન્સ જારી કર્યા હતા. આ જ કેસમાં દુબઈ સ્થિત ઉદ્યોગપતિ રાજેશ સતીજાને પણ સમન્સ પાઠવવામાં આવ્યા છે. બંને આરોપીઓને 19 જાન્યુઆરીએ કોર્ટમાં હાજર રહેવાનો નિર્દેશ આપવામાં આવ્યો હતો. સપ્ટેમ્બર 2025માં ઈડીએ પીએમએલએ હેઠળ નોંધાયેલા કેસમાં પૂરક ચાર્જશીટ દાખલ કરી હતી, જેમાં રાજ કુન્દ્રા અને રાજેશ સતીજાનું નામ આરોપી તરીકે સામેલ કરવામાં આવ્યું હતું. તપાસ એજન્સીના દાવા મુજબ, રાજ કુન્દ્રાએ યુક્રેનમાં બિટકોઈન માઇનિંગ ફાર્મ સ્થાપવા માટે કથિત “ગેઇન બિટકોઈન પોન્ઝી કૌભાંડ”ના મુખ્ય આરોપી અને પ્રમોટર અમિત ભારદ્વાજ પાસેથી 285 બિટકોઇન મેળવ્યા હતા. જોકે પ્રોજેક્ટ સાકાર થયો નહોતો, ઇડીનો દાવો છે કે આ 285 બિટકોઇન હજુ પણ રાજ કુન્દ્રા પાસે જ છે, જેમની હાલની બજાર કિંમત ₹150 કરોડથી વધુ હોવાનું અનુમાન છે.
ચાર્જશીટમાં જણાવાયું છે કે રાજ કુન્દ્રાએ પોતાને ફક્ત મધ્યસ્થી તરીકે રજૂ કરવાનો પ્રયાસ કર્યો હતો, પરંતુ પોતાના દાવાને સમર્થન આપતા પૂરતા દસ્તાવેજી પુરાવા રજૂ કરી શક્યા નહોતા. ઈડીએ ટર્મ શીટ નામના કરારનો ઉલ્લેખ કર્યો છે, જે રાજ કુન્દ્રા અને મહેન્દ્ર ભારદ્વાજ વચ્ચે થયો હોવાનું જણાવાયું છે. તપાસ એજન્સી અનુસાર, આ કરારથી સ્પષ્ટ થાય છે કે વાસ્તવિક સોદો રાજ કુન્દ્રા અને અમિત ભારદ્વાજ વચ્ચે થયો હતો. ઇડીએ વધુમાં દાવો કર્યો છે કે રાજ કુન્દ્રાને પાંચ અલગ-અલગ હપ્તામાં મળેલા બિટકોઇનની ચોક્કસ વિગતો યાદ હોવાનો મુદ્દો એ દર્શાવે છે કે તેઓ માત્ર મધ્યસ્થી નહોતા, પરંતુ વાસ્તવિક લાભાર્થી હતા. હાલ કોર્ટ દ્વારા જામીન મળ્યા બાદ કેસની આગળની સુનાવણીમાં વધુ વિગતો સામે આવવાની શક્યતા છે.
