ભારતીય ટીમે દક્ષિણ કોરિયાને 4-1થી હરાવીને હોકી એશિયા કપ 2025નો ખિતાબ જીતી લીધો છે. કોરિયન ટીમ ભારત સામે ટકી શકી નહીં. ટાઇટલ જીતવાની સાથે ભારત આગામી વર્ષે યોજાનારા હોકી વર્લ્ડ કપ 2026 માટે પણ ક્વોલિફાય થઈ ગયું છે. ભારતીય ટીમે સમગ્ર ટુર્નામેન્ટ દરમિયાન જોરદાર પ્રદર્શન કર્યું અને એક પણ મેચ હાર્યો નહીં. ફાઇનલમાં ભારતીય બહાદુરોએ કોરિયન ટીમને એકતરફી રીતે હરાવી.
ભારતીય ટીમે મેચમાં શાનદાર શરૂઆત કરી જ્યારે સુખજીત સિંહે મેચ શરૂ થયાની થોડીક સેકન્ડમાં ગોલ કરીને ભારતીય ટીમને 1-0ની લીડ અપાવી. આ પછી ભારતીય ખેલાડીઓએ આક્રમક વલણ અપનાવ્યું અને મોટાભાગે બોલ પોતાની પાસે રાખ્યો. અનુભવી દક્ષિણ કોરિયન ટીમ પણ ભારત સામે દબાણમાં દેખાતી હતી. જુગરાજ સિંહ પાસે પેનલ્ટી કોર્નરથી ગોલ કરવાની તક હતી પરંતુ તે ચૂકી ગયો.
દિલપ્રીતે લીડ બમણી કરી
બીજા ક્વાર્ટરમાં દિલપ્રીત સિંહે 27મી મિનિટે ગોલ કર્યો. આનાથી ભારતીય ટીમમાં નવી ઉર્જાનો સંચાર થયો અને તેની લીડ બમણી થઈ ગઈ. આ ગોલ પછી પણ ભારતે આક્રામક વલણ ચાલુ રાખ્યું. બીજી તરફ દક્ષિણ કોરિયાના ખેલાડીઓએ ગોલ કરવાની તકો બનાવી પરંતુ તેઓ સફળ ન થયા.
ભારતીય ખેલાડી સંજયને ગ્રીન કાર્ડ મળ્યું હતું. આના કારણે ભારતીય હોકી ટીમ ત્રીજા ક્વાર્ટરમાં 10 ખેલાડીઓ સાથે મેદાનમાં ઉતરી. ત્યારબાદ આ ક્વાર્ટરના અંતે દિલપ્રીત સિંહે ભારત માટે ગોલ કર્યો, જે મેચમાં તેનો બીજો ગોલ હતો. ત્યારબાદ ચોથા ક્વાર્ટરમાં અમિત રોહિદાસે 49મી મિનિટે ભારત માટે ગોલ કર્યો અને ભારતની લીડ 4-0 સુધી વધારી દીધી. કોરિયન ખેલાડીઓ મેચમાં સંપૂર્ણપણે થાકેલા દેખાતા હતા અને સારું પ્રદર્શન કરી શક્યા ન હતા. 50મી મિનિટે સોન ડાયને તેમના માટે એકમાત્ર ગોલ કર્યો. અંતે ભારતે મેચ 4-1થી જીતી લીધી અને વર્લ્ડ કપ માટે ટિકિટ પણ બુક કરાવી.
પાકિસ્તાનને પાછળ મુક્યું
ભારતીય હોકી ટીમે ચોથી વખત એશિયા કપનો ખિતાબ જીત્યો છે. ભારતે અગાઉ 2017, 2007, 2003 માં હોકી એશિયા કપ ટ્રોફી જીતી હતી. ભારતે પાકિસ્તાનને પાછળ મુકી દીધું છે. પાકિસ્તાને ત્રણ વાર (1982, 1985, 1989) હોકી એશિયા કપનો ખિતાબ જીત્યો હતો.
