ચેકીંગ સ્કવોર્ડની ટીમોના જુદાજુદા વિસ્તારોમાં વ્યાપક દરોડા :
43 વીજ જોડાણમાં વીજ ચોરીના અને 13 કિસ્સામાં ગેરરીતિના કેસ ઝડપાયા :
( પ્રતિનિધિ )વડોદરા,તા.19
એમજીવીસીએલની વિજિલન્સની જુદીજુદી ટીમો દ્વારા વહેલી સવારથી જ શહેરના જુદા જુદા વિસ્તારોમાં પોલીસ બંદોબસ્ત સાથે ત્રાટકી વીજ ચેકિંગની કાર્યવાહી કરી હતી. ચેકિંગની કાર્યવાહી દરમિયાન 43 વીજ જોડાણમાં વીજ ચોરીના અને 13 કિસ્સામાં ગેરરીતિના કેસ ઝડપાયા હતા.
મધ્ય ગુજરાત વીજ કંપની લિમિટેડના ચેકિંગ સ્ક્વોડ દ્વારા વડોદરા શહેરના સિટી સર્કલ હેઠળ આવતા વિશ્વામિત્રી ઈસ્ટ અને લાલબાગ વિભાગીય કચેરીના વિસ્તારોમાં વ્યાપક દરોડા પાડીને વીજ ચોરી સામે કડક કાર્યવાહી કરવામાં આવી હતી. આ દરોડામાં માંડવી, પાણીગેટ અને વાડી સબ ડિવિઝનના ભદ્રકચેરી, મહાવત ફળિયા, મીઠા ફળિયા સરસીયા તળાવ, યાકુતપુરા, શેખ ફરીદ મોહલ્લા, મટન માર્કેટ , કહાર મોહલ્લા, બાવામાનપુરા , મોગલવાડા, અજબડીમીલ, રામનાથ ચોક,હાથી ખાના, જેવા વિસ્તારોમાં કુલ 1090 વીજ જોડાણની તપાસણી હાથ ધરવામાં આવી હતી. આ કામગીરી દરમિયાન કુલ 43 વીજ જોડાણમાં વીજ ચોરીના અને 13 કિસ્સામાં ગેરરીતિના કેસ ઝડપાયા હતા. આ તમામ કેસમાંથી અંદાજિત 35.35 લાખ રૂપિયાનુ પુરવણી બીલ બનશે તેવું જાણવા મળ્યું હતું.
