PM મોદી (PM Modi) 5 વર્ષ બાદ રશિયા પહોંચ્યા છે. મોસ્કોના વનુકોવો-2 ઈન્ટરનેશનલ એરપોર્ટ (Airport) પર ગાર્ડ ઓફ ઓનર સાથે તેમનું સ્વાગત કરવામાં આવ્યું હતું. આ દરમિયાન રશિયન સેનાએ ભારતીય રાષ્ટ્રગીતની ધૂન વગાડી હતી. રશિયાના નાયબ વડા પ્રધાન ડેનિસ માંટુરોવે વડા પ્રધાનનું સ્વાગત કર્યું હતું. આ પછી માંટુરોવ પીએમ મોદીને તેમની કારમાં હોટલ લઈ ગયા હતા. મોદી 22મી ભારત-રશિયા વાર્ષિક સંમેલનમાં ભાગ લેશે. બેઠક બાદ તેઓ રાષ્ટ્રપતિ પુતિન સાથે ડિનરમાં હાજરી આપશે.
યુક્રેન યુદ્ધ બાદ વડાપ્રધાન મોદી રશિયાની મુલાકાતે જાય તેવો આ પ્રથમ પ્રસંગ હશે. આ પહેલા તે 2019માં રશિયા ગયા હતા. મોદી અને વ્લાદિમીર પુતિનની છેલ્લી મુલાકાત 2022માં ઉઝબેકિસ્તાનની રાજધાની સમરકંદમાં SCO સમિટ દરમિયાન થઈ હતી. 2023માં ભારતમાં આયોજિત G-20 સંમેલનમાં પુતિન આવ્યા ન હતા.
વડાપ્રધાન નરેન્દ્ર મોદી 8 જુલાઈથી 9 જુલાઈ સુધી રશિયાના પ્રવાસે છે. રશિયાના રાષ્ટ્રપતિ વ્લાદિમીર પુતિને પીએમ મોદીને આમંત્રણ આપ્યું છે. બંને નેતાઓ 22મી ભારત-રશિયા વાર્ષિક સમિટમાં ભાગ લેશે. સમિટ દરમિયાન દ્વિપક્ષીય મુદ્દાઓ પર ચર્ચા થશે. તેઓ રશિયાના રાષ્ટ્રપતિ વ્લાદિમીર પુતિન સાથે સંરક્ષણ અને ઉર્જા ક્ષેત્રે વેપાર વધારવા પર વાતચીત કરશે. રશિયાની મુલાકાત બાદ વડાપ્રધાન મોદી ઓસ્ટ્રિયાની પણ મુલાકાત લેશે.
દરમિયાન પીએમ મોદીએ X પર પોસ્ટ કર્યું છે. તેમણે લખ્યું કે ‘હું મોસ્કો પહોંચી ગયો છું. આશા છે કે બંને દેશો વચ્ચે વ્યૂહાત્મક ભાગીદારી વધુ મજબૂત બનશે. રશિયા અને મોસ્કો વચ્ચેના મજબૂત સંબંધોથી બંને દેશોના લોકોને ફાયદો થશે.
નાટો સમિટ દરમિયાન મોદીની રશિયાની મુલાકાત
મોદીની રશિયાની મુલાકાત એવા સમયે થઈ રહી છે જ્યારે અમેરિકામાં નાટો સમિટ શરૂ થવા જઈ રહી છે. વિદેશ મંત્રાલયે નિવેદન જારી કરીને સ્પષ્ટતા કરવી પડી હતી કે મોદીની રશિયાની મુલાકાતને નાટો સમિટ સાથે કોઈ લેવાદેવા નથી. હકીકતમાં યુક્રેન યુદ્ધ શરૂ થયા પછી રશિયા યુરોપમાં અલગ પડી ગયું. આ દરમિયાન તેને ચીન અને ભારતનું સમર્થન મળ્યું છે. જોકે ભારત રશિયાના મામલામાં પોતાનું વલણ તટસ્થ રાખવા માંગે છે. આમ છતાં મોદીની રશિયા મુલાકાત પર સમગ્ર વિશ્વની ખાસ કરીને પશ્ચિમી દેશોની નજર રહેશે.
