વારાણસી: વારાણસીના BHU IITમાં વિદ્યાર્થીની છેડતી બાદ વાતાવરણ ગરમાયું છે. હજારો વિદ્યાર્થીઓ છેડતી સામે અવાજ ઉઠાવી રહ્યા છે. વિદ્યાર્થીઓ (Students) વિવિધ માંગણીઓ અંગે સતત અવાજ ઉઠાવી રહ્યા છે. હવે આ કેસમાં પીડિતા વિદ્યાર્થીનીએ કલમ 161 હેઠળ મેજિસ્ટ્રેટ સમક્ષ પોતાનું નિવેદન નોંધ્યું છે. નિવેદનમાં પીડિતાએ કહ્યું કે આરોપીઓએ માત્ર તેની છેડતી જ નથી કરી પરંતુ બંદૂકની અણી પર તેના કપડાં કઢાવીને તેની સાથે સામૂહિક બળાત્કાર (Gang Rape) કરવાનો પ્રયાસ પણ કર્યો હતો. જેમાં હવે વિદ્યાર્થીઓ દ્વારા CBI તપાસની માંગ કરવામાં આવી રહી છે.
આ નિવેદનમાં પોલીસે (Police) હવે તપાસ આગળ વધારી છે અને ક્રાઈમ ઈન્સ્પેક્ટર સહજાનંદ શ્રીવાસ્તવ પાસેથી લંકા પોલીસ સ્ટેશનના ઈન્ચાર્જ શિવકાંત મિશ્રાને તપાસ સોંપી છે. ઈન્સ્પેક્ટર લંકા શિવકાંત મિશ્રા હવે આ મામલાની તપાસ કરશે અને સંબંધિત ઉચ્ચ અધિકારીઓને પોતાનો રિપોર્ટ સોંપશે. પોલીસ કડક વલણ અપનાવી રહી છે અને 6 જેટલી ટીમો બનાવીને સતત દરોડા પાડી રહી છે.
આ પહેલા બુધવારે સાંજે આઈઆઈટીના વિદ્યાર્થીઓએ ડાયરેક્ટરની ઓફિસ સામે રેલી કાઢી હતી. આંદોલનકારી વિદ્યાર્થીઓનું કહેવું છે કે વહીવટીતંત્ર અને યુનિવર્સિટી દ્વારા આપવામાં આવેલા સમયની અંદર આરોપીઓની ધરપકડ કરવામાં આવી ન હતી, જેના કારણે તેઓ વિરોધ કરી રહ્યા છે અને જ્યાં સુધી તેમની ધરપકડ નહીં થાય ત્યાં સુધી તેમનો વિરોધ ચાલુ રહેશે. વિરોધ કરી રહેલા વિદ્યાર્થીઓનું કહેવું છે કે તેમને લાગે છે કે પોલીસની કેટલીક ખામીઓ છે, જેના કારણે આરોપીઓની ધરપકડ કરવામાં આવી રહી નથી. તેમનો પોલીસ પરનો વિશ્વાસ ઓછો થઇ રહ્યો છે. તેમણે કહ્યું કે, પોલીસે જણાવવું જોઈએ કે શું તેમની પાસે આ કેસ ઉકેલવાની ક્ષમતા છે? જો આ કેસ તેમના દ્વારા ઉકેલવામાં ન આવે તો તેને CBIને ટ્રાન્સફર કરો.
1 નવેમ્બરની રાત્રે, BHU IIT ની એક વિદ્યાર્થીનીને મોટરસાઇકલ પર સવાર ત્રણ બદમાશો એક ખૂણામાં લઈ ગયા, જેમણે તેના કપડાં કાઢી નાખ્યા અને તેનો વિડિયો અને ફોટો પણ લીધો હતો. આરોપ છે કે બદમાશોએ વિદ્યાર્થીનીને લગભગ 15 મિનિટ સુધી બંધક બનાવી રાખી હતી. જે બાદ તેઓ તેનો મોબાઈલ નંબર લઈ ભાગી ગયા હતા.
