મુંબઈ: તારક મહેતા કા ઉલ્ટા ચશ્મામાં જેઠાલાલની ભૂમિકા ભજવનાર અભિનેતા દિલીપ જોશીને લઈને ચોંકાવનારા સમાચાર સામે આવ્યા છે. દિલીપ જોશી અંગે નાગપુર પોલીસ કંટ્રોલ રૂમ પર એક કોલ આવ્યો હતો. કોલ કરનારે એવું કહ્યું હતું કે, જેઠાલાલ એટલે કે અભિનેતા દિલીપ જોશીના ઘરની બહાર 25 લોકો બંદૂક અને બોમ્બ સાથે ઉભા છે.
અજાણ્યા વ્યક્તિએ નાગપુર કંટ્રોલ રૂમને કટકે નામથી ફોન કર્યો હતો. કટકે નામના આ વ્યક્તિએ કહ્યું હતું કે તારક મહેતા કા ઉલ્ટા ચશ્મામાં કામ કરતા દિલીપ જોશીના ઘરની બહાર 25 લોકો બંદૂક અને હથિયારો સાથે ઉભા છે. આ સાથે તે કોલમાં કહેવામાં આવ્યું હતું કે મુકેશ અંબાણી, અમિતાભ બચ્ચન અને ધર્મેન્દ્રના ઘરો પર પણ બોમ્બથી હુમલો કરવામાં આવશે.
ફોન કરનારે કહ્યું કે તેણે કેટલાક લોકોને વાત કરતા સાંભળ્યા કે આ 25 લોકો મુંબઈમાં આવી પ્રવૃત્તિઓ કરવા માટે શહેરમાં પહોંચ્યા છે. નાગપુર કંટ્રોલ રૂમમાં શિવાજી પાર્ક પોલીસ સ્ટેશનને એલર્ટ કરવામાં આવ્યું હતું અને મુંબઈના શિવાજી પાર્ક પોલીસ સ્ટેશનમાં કેસ નોંધ્યા બાદ તપાસ શરૂ કરવામાં આવી હતી.
તપાસમાં જાણવા મળ્યું કે નાગપુર પોલીસ કંટ્રોલ રૂમમાં જે નંબર પરથી કોલ આવ્યો હતો તે દિલ્હીની સિમ કાર્ડ કંપનીમાં કામ કરતા છોકરાનો હતો. છોકરાનો નંબર તેની જાણ વગર જ સ્પુફ કરવામાં આવ્યો હતો અને એક ખાસ એપનો ઉપયોગ કરીને કોલ કરવામાં આવ્યો હતો. પોલીસ હવે આ કેસમાં કોલ કરનાર અસલી વ્યક્તિને શોધી રહી છે.
આ અગાઉ મંગળવારે કોઈ અજાણ્યા વ્યક્તિએ મુકેશ અંબાણી, અમિતાભ બચ્ચન અને ધર્મેન્દ્રના ઘરને બોમ્બથી ઉડાવી દેવાની વાત કરી હતી. એક અજાણ્યા વ્યક્તિએ નાગપુર પોલીસ કંટ્રોલ રૂમને ફોન કરીને કહ્યું હતું કે તે અંબાણીના ઘરને ઉડાવી દેવાનો છે. આ સાથે વ્યક્તિએ અમિતાભ બચ્ચન અને ધર્મેન્દ્રના ઘરને બોમ્બથી ઉડાવી દેવાની વાત પણ કરી હતી. અંબાણી પરિવારને આપવામાં આવી સુરક્ષા આ કોલ પછી સુપ્રીમ કોર્ટે મુકેશ અંબાણી અને તેમના પરિવારના તમામ સભ્યોને ભારત અને વિદેશમાં Z+ સુરક્ષા આપી હતી. Z+ સુરક્ષા એ સર્વોચ્ચ સુરક્ષા છે. કોર્ટે જાહેરાત કરી હતી કે અંબાણીની સુરક્ષા માટે, તે ભારત અને વિદેશમાં આ Z+ સુરક્ષાની વ્યવસ્થા કરવાનો ખર્ચ ઉઠાવશે.
