વહેલી સવારથી ગાજવીજ સાથે વરસ્યો વરસાદ, તાપમાનમાં ઘટાડા સાથે ખેતી માટે આશાનું કિરણ
દાહોદ, તા. 19 : દાહોદ શહેર સહિત જિલ્લાના વિવિધ ગ્રામ્ય વિસ્તારોમાં આજે વહેલી સવારથી મેઘરાજાની ધમાકેદાર એન્ટ્રી થતાં વાતાવરણમાં અચાનક પલટો આવ્યો હતો. છેલ્લા ઘણા દિવસોથી અસહ્ય ગરમી અને ઉકળાટનો સામનો કરી રહેલા લોકોને ગાજવીજ સાથે પડેલા વરસાદે મોટી રાહત આપી છે, જ્યારે ખેડૂતોમાં પણ ખુશીનો માહોલ છવાયો છે.
આજે સવારથી જ આકાશમાં ઘેરા વાદળો છવાઈ ગયા હતા અને થોડા સમય બાદ ગાજવીજ સાથે વરસાદ શરૂ થયો હતો. દાહોદ શહેર સહિત આસપાસના અનેક ગામોમાં વરસાદી ઝાપટાં વરસતાં વાતાવરણમાં ઠંડક પ્રસરી ગઈ હતી. છેલ્લા કેટલાક દિવસોથી ઊંચા તાપમાન અને ઉકળાટથી પરેશાન બનેલા લોકો માટે આ વરસાદ રાહતરૂપ સાબિત થયો છે. વરસાદના પગલે તાપમાનમાં નોંધપાત્ર ઘટાડો નોંધાયો હતો અને માર્ગો તેમજ ખુલ્લા વિસ્તારોમાં ઠંડકનો અનુભવ થતાં લોકોમાં આનંદ જોવા મળ્યો હતો.
વરસાદના આગમનથી ખેડૂતોમાં પણ નવી આશા જાગી છે. ખેતી માટે અનુકૂળ વાતાવરણ સર્જાતા તેમજ જમીનમાં ભેજનું પ્રમાણ વધતાં આગામી વાવણી અને ખેતી કાર્યોને લાભ મળશે તેવી આશા ખેડૂતો વ્યક્ત કરી રહ્યા છે. આમ, એક તરફ વરસાદે લોકોને ગરમીમાંથી રાહત આપી છે તો બીજી તરફ ખેડૂતો માટે પણ મેઘરાજાનું આગમન આશીર્વાદરૂપ સાબિત થયું છે.
રિપોર્ટર: વિનોદ પંચાલ
