સોશિયલ મીડિયા પર બહારથી બધું ખૂબ સારું દેખાય છે, પરંતુ તેની પાછળની હકીકત ઘણી વખત અલગ હોય છે. કોલકાતાની કન્ટેન્ટ ક્રિએટર તિયાશા ગોસ્વામીએ આવો જ પોતાનો અનુભવ શેર કર્યો છે. તિયાશાએ એક વીડિયોમાં જણાવ્યું કે તેમણે ગયા મહિને ઇન્સ્ટાગ્રામથી ₹20 લાખ કમાયા હોવાનો દાવો કર્યો છે, છતાં અત્યારે તેઓ પોતાની પ્રગતિને લઈને નિરાશ છે.
16 વર્ષની ઉંમરે શરૂ કર્યો હતો બિઝનેસ
તિયાશાએ પોતાના વીડિયોમાં જણાવ્યું કે તેમણે માત્ર 16 વર્ષની ઉંમરે નવો બિઝનેસ શરૂ કર્યો હતો. તેમણે એવો પણ દાવો કર્યો કે આ વર્ષે તેઓ પોતાની 11મી આંતરરાષ્ટ્રીય યાત્રા પર જવાના છે. આટલી સફળતા હોવા છતાં તિયાશાને લાગે છે કે તેઓ પોતાની જિંદગીમાં જે હાંસલ કરવા માગે છે, તે હજુ કરી શક્યાં નથી. સોશિયલ મીડિયા પર અન્ય લોકોની સફળતા અને તેમની જિંદગી જોઈને તેમને પોતાની સાથે સરખામણી થવા લાગે છે.
‘હું દરરોજ રાત્રે રડતી સૂઈ જાઉં છું’
તિયાશાએ જણાવ્યું કે ઇન્સ્ટાગ્રામ પર જ્યારે તેઓ એવી રીલ્સ જુએ છે જેમાં લોકો પોતાની મોટી સફળતાઓ અને સિદ્ધિઓ બતાવે છે, ત્યારે તેમને પોતાની જિંદગી વિશે સવાલ થવા લાગે છે. તેમના કહેવા પ્રમાણે, આ પ્રકારની રીલ્સ જોઈને તેઓ ઘણી વખત રડતા રડતા સૂઈ જાય છે. તેમને લાગે છે કે તેઓ પૂરતું કામ નથી કરી રહ્યાં અને પોતાની ક્ષમતા પ્રમાણે આગળ વધી શક્યાં નથી. તિયાશાએ સ્પષ્ટ કર્યું કે અન્ય લોકો સફળ થઈ રહ્યા છે તે ખરાબ વાત નથી. પરંતુ તેમની સફળતા જોઈને તેમને પોતાને લઈને અસંતોષ થવા લાગે છે.
200K ફોલોઅર્સનું સપનું અધૂરું
તિયાશાએ પોતાના વીડિયોમાં એક વિઝન બોર્ડ પણ બતાવ્યું હતું. તેમાં ઇન્સ્ટાગ્રામ પર 200K ફોલોઅર્સનું લક્ષ્ય લખેલું હતું. તેમણે જણાવ્યું કે ગયા વર્ષે નવેમ્બર આસપાસ તેમના ઇન્સ્ટાગ્રામ પર 1 લાખ ફોલોઅર્સ થયા હતા. પરંતુ સપ્ટેમ્બર 2026 સુધીમાં તેમની સંખ્યા વધવાને બદલે ઘટીને લગભગ 109K રહી ગઈ છે. ફોલોઅર્સ સતત ઘટી રહ્યા હોવાથી તેઓ આ બાબતથી ખૂબ પરેશાન છે. તેમના માટે 200K સુધી પહોંચવાનું સપનું હવે દૂર જતું હોય એવું લાગી રહ્યું છે.
‘મને અનફોલો ન કરો’
વીડિયોમાં તિયાશાએ પોતાના ફોલોઅર્સને અપીલ પણ કરી હતી. તેમણે કહ્યું કે જો કોઈ તેમને પસંદ નથી કરતું તો ફોલો ન કરે, પરંતુ અનફોલો કરવાથી તેમને ખૂબ મુશ્કેલી થાય છે. તેમણે એ પણ કહ્યું કે આ વર્ષે તેઓ ઘણી વસ્તુઓ કરવા માગતા હતા. ખાસ કરીને તેઓ મુંબઈમાં શિફ્ટ થવા માગતા હતા, પરંતુ હજુ સુધી તેમનું આ સપનું પૂરું થયું નથી અને તેઓ કોલકાતામાં જ પોતાના રૂમમાં છે.
સોશિયલ મીડિયા અને વાસ્તવિક જીવન વચ્ચેનો તફાવત
તિયાશાની વાત ફરી એક વખત સોશિયલ મીડિયા પર દેખાતી સફળતા અને વાસ્તવિક જીવન વચ્ચેના તફાવત તરફ ધ્યાન ખેંચે છે. સોશિયલ મીડિયા પર કોઈ વ્યક્તિના પ્રવાસ, પૈસા, સફળતા અને ખુશીની તસવીરો દેખાય છે, પરંતુ તેની પાછળની મુશ્કેલીઓ હંમેશા દેખાતી નથી. તિયાશાએ પોતે પણ સ્વીકાર્યું કે અત્યારે તેઓ પોતાની જિંદગીના એવા તબક્કામાંથી પસાર થઈ રહ્યાં છે જ્યાં તેમને ખબર નથી કે આગળ શું કરવું.
તેમણે અંતમાં લોકોને પોતાના સપના માટે હિંમત ન હારવાની સલાહ આપી. તેમનું કહેવું હતું કે જો કોઈએ હજુ સુધી પોતાનું સપનું પૂરું ન કર્યું હોય તો પણ આશા છોડવી જોઈએ નહીં. તેમના વીડિયોને સોશિયલ મીડિયા પર સકારાત્મક પ્રતિસાદ પણ મળ્યો છે અને કેટલાક લોકોએ તેમને હિંમત રાખીને પોતાનું કામ ચાલુ રાખવાની સલાહ આપી છે.
