બાંગ્લાદેશના ભૂતપૂર્વ વડા પ્રધાન શેખ હસીનાએ બે વર્ષના અંતરાલ પછી બુધવારે વર્ચ્યુઅલી જનતાને સંબોધન કર્યું. ભાષણ દરમિયાન તેમનો કેમેરા બંધ રહ્યો. તેમના 25 મિનિટના સંબોધનમાં તેમણે કહ્યું, “મને ખબર છે કે તેઓ મને કેદ કરી શકે છે અથવા મારી પણ શકે છે, છતાં હું બાંગ્લાદેશ પાછી ફરીશ. મારા માટે જાહેર સમર્થન ખૂબ જ મહત્વપૂર્ણ છે. મૃત્યુદંડ, ખોટા કેસ અને બનાવટી ટ્રાયલ મને ડરાવી શકતા નથી. મારી સામેની કાનૂની કાર્યવાહી ગેરકાયદેસર, ગેરબંધારણીય અને રાજકીય રીતે પ્રેરિત છે.”
બાંગ્લાદેશમાંથી હાંકી કાઢવામાં આવ્યા પછી પહેલી વાર મીડિયા સમક્ષ હાજર થતાં ભૂતપૂર્વ વડા પ્રધાન શેખ હસીનાએ સ્પષ્ટપણે વાત કરી. તેઓ તેમના પરિવારના સભ્યોને યાદ કરીને ભાવુક થઈ ગયા અને રડી પડ્યા. વીડિયો કોન્ફરન્સિંગ દ્વારા પત્રકાર પરિષદને સંબોધતા તેમણે ટિપ્પણી કરી કે આ એ બાંગ્લાદેશ નથી જેના માટે લાખો લોકોએ અંતિમ બલિદાન આપ્યું હતું.
બુધવાર ૫ ઓગસ્ટ, ૨૦૨૬ ના રોજ નવી દિલ્હીમાં એક પત્રકાર પરિષદમાં બોલતા શેખ હસીનાએ કહ્યું, “આજે, હું ફક્ત ભૂતપૂર્વ વડા પ્રધાન તરીકે નહીં પરંતુ રાષ્ટ્રપિતાની પુત્રી તરીકે બોલી રહી છું.” તેમના મૃત પરિવારના સભ્યોને યાદ કરતી વખતે તેઓ રડી પડ્યા. તેમણે નોંધ્યું કે તાજેતરના વર્ષોમાં બાંગ્લાદેશના દરેક ખૂણામાં ભય ફેલાયો છે. તેમણે ઉમેર્યું, “આ તે બાંગ્લાદેશ નથી જેના માટે લાખો લોકોએ પોતાનો જીવ આપ્યો. કેટલાક સમયથી અમુક સંગઠનો વિદ્યાર્થીઓની માંગણીઓને હિંસામાં ફેરવવાનું કામ કરી રહ્યા હતા; સંગઠિત જૂથોએ હિંસા ભડકાવવા અને સત્તા પરિવર્તન લાવવા માટે પરિસ્થિતિનો લાભ લીધો.”
હસીનાએ એમ પણ કહ્યું કે તેઓએ પોતાની મરજીથી બાંગ્લાદેશ છોડ્યું નથી. જ્યારે વિરોધીઓ વડા પ્રધાનના નિવાસસ્થાન તરફ આગળ વધ્યા ત્યારે તેમની પાસે ત્યાંથી નિકળવા માટે માત્ર ૩૦ થી ૪૦ મિનિટ હતી. તે ક્ષણે તેમને ખબર નહોતી કે તેઓ દેશ છોડી રહ્યાં છે; તે તેમના પૈતૃક ગામ તુંગીપારાની મુલાકાત લેવાની તૈયારી કરી રહ્યા હતા પરંતુ સંજોગોએ તેમને દેશ છોડવાની ફરજ પાડી.
ગુપ્ત સ્થળે રહે છે શેખ હસીના
તેઓ છેલ્લે 5 ઓગસ્ટ, 2024 ના રોજ ઢાકાથી ભારત આવ્યા ત્યારે જાહેરમાં જોવા મળ્યા હતા. ત્યારથી તે એક અજ્ઞાત સ્થળે રહે છે. તેમણે બે વર્ષ પછી વર્ચ્યુઅલ પ્રેસ કોન્ફરન્સ દ્વારા જનતાને સંબોધિત કરી હતી પરંતુ તેમનો ચહેરો બતાવ્યો ન હતો. મીડિયા અહેવાલો અનુસાર કેમેરા સામે દેખાવાથી તેમની પૃષ્ઠભૂમિ, સ્થાન અથવા સુરક્ષા વ્યવસ્થા વિશે વિગતો જાહેર થવાનું જોખમ રહેલું છે.
ભારત-બાંગ્લાદેશ તણાવ
બાંગ્લાદેશે ભારતને જણાવ્યું છે કે ભારતીય ભૂમિ પરથી શેખ હસીનાની રાજકીય પ્રવૃત્તિઓ બંને દેશો વચ્ચેના સંબંધોને અસર કરી શકે છે. પરિણામે ભારતનું વિદેશ મંત્રાલય (MEA) આ ખાનગી કાર્યક્રમથી સંપૂર્ણપણે દૂર રહ્યું. જો હસીનાએ વિડિઓ પર કોઈ મોટો રાજકીય સંદેશ આપ્યો હોત તો તેને ભારતે એક ખુલ્લું પ્લેટફોર્મ પૂરું પાડ્યું હોવાનું માનવામાં આવી શક્યું હોત. તેમને બાંગ્લાદેશમાં પહેલાથી જ દોષિત ઠેરવવામાં આવ્યા છે અને તેમના પ્રત્યાર્પણની માંગણીઓ કરવામાં આવી રહી છે. કેમેરા સામે દેખાવાથી કાનૂની અને રાજદ્વારી ગૂંચવણો વધુ વધી શકે છે. તેથી તેઓએ ફક્ત ઓડિયો દ્વારા પોતાનું સંબોધન કર્યું.
