₹6.06 લાખનો નશીલા પ્રદાથ નો જથ્થો ઝડપાયો, 3308 બોટલ-ટીન પણ જપ્ત
બલેશ્વર ગામના ઇસરોલી ફળિયામાં છુપાવાયો હતો જથ્થો; એક મહિલાની અટકાયત, બે ફરાર થતાં વોન્ટેડ જાહેર, સમગ્ર સપ્લાય ચેઇનની તપાસ શરૂ
સુરત ગ્રામ્ય લોકલ ક્રાઇમ બ્રાન્ચ (LCB)એ નશા ના ગેરકાયદેસર વેપાર સામે વધુ એક સફળ કાર્યવાહી હાથ ધરી છે. પલસાણા તાલુકાના બલેશ્વર ગામમાં ચોક્કસ બાતમીના આધારે પાડવામાં આવેલા દરોડામાં પોલીસે ભારતીય બનાવટના વિદેશી દારૂ અને ટીન બિયરના મોટા જથ્થાનો પર્દાફાશ કર્યો છે. દરોડા દરમિયાન પોલીસે કુલ 3308 બોટલ અને ટીન બિયર કબજે કર્યા છે, જેની અંદાજિત કિંમત ₹6,06,273 હોવાનું સામે આવ્યું છે. આ કેસમાં એક મહિલાની અટકાયત કરવામાં આવી છે, જ્યારે બે મુખ્ય આરોપીઓ સ્થળ પરથી ફરાર થઈ જતા પોલીસે તેમને વોન્ટેડ જાહેર કરીને શોધખોળ શરૂ કરી છે.
પોલીસના જણાવ્યા મુજબ સુરત ગ્રામ્ય LCBને વિશ્વસનીય બાતમી મળી હતી કે પલસાણા તાલુકાના બલેશ્વર ગામના ઇસરોલી ફળિયામાં રહેતી લિસ્ટેડ બુટલેગર નીતાબેન પ્રભુભાઈ કોળી પટેલ તથા તેનો ભત્રીજો જિજ્ઞેશ ઉર્ફે લાલુ ધીરુભાઈ કોળી પટેલ ગેરકાયદેસર રીતે મોટા પ્રમાણમાં વિદેશી દારૂનો જથ્થો મંગાવી પોતાના વિસ્તારમાં સંતાડી રહ્યા છે. આ દારૂનો જથ્થો બાદમાં અલગ-અલગ સ્થળોએ વેચાણ માટે સપ્લાય કરવામાં આવતો હોવાની માહિતી પણ પોલીસને મળી હતી.
બાતમીના આધારે સુરત ગ્રામ્ય LCBની ટીમે બલેશ્વર ગામમાં પહોંચી સઘન તપાસ શરૂ કરી હતી. પોલીસ દ્વારા મકાન અને તેની આસપાસના વિસ્તારની તપાસ દરમિયાન નીતાબેનના મકાન સામે આવેલા વાડામાં મોટી સંખ્યામાં વિદેશી દારૂ અને ટીન બિયરનો જથ્થો છુપાવી રાખવામાં આવ્યો હોવાનું સામે આવ્યું હતું.
પોલીસે સ્થળ પરથી ભારતીય બનાવટની વિદેશી દારૂની વ્હીસ્કી તેમજ ટીન બિયરની કુલ 3308 બોટલ અને ટીન જપ્ત કર્યા હતા.પોલીસના જણાવ્યા મુજબ જપ્ત કરાયેલા મુદ્દામાલની કુલ કિંમત ₹6,06,273 થાય છે. તેમજ દારૂના જથ્થાને કાયદેસરની કાર્યવાહી હેઠળ કબજે કરવામાં આવ્યો છે. પોલીસ દ્વારા સ્થળનું પંચનામું તૈયાર કરીને સમગ્ર મુદ્દામાલને સીલ કરવામાં આવ્યો હતો.
આ કાર્યવાહી દરમિયાન પોલીસે વાસંતીબેન ધીરુભાઈ કોળી પટેલને સ્થળ પરથી ઝડપી પાડી કાયદેસરની કાર્યવાહી હાથ ધરી છે. જ્યારે સમગ્ર દારૂના જથ્થાના મુખ્ય સૂત્રધાર માનવામાં આવતા નીતાબેન પ્રભુભાઈ કોળી પટેલ અને જિજ્ઞેશ ઉર્ફે લાલુ ધીરુભાઈ કોળી પટેલ પોલીસ પહોંચે તે પહેલાં જ સ્થળ પરથી ફરાર થઈ ગયા હતા. બંને આરોપીઓને પોલીસે વોન્ટેડ જાહેર કરીને તેમની શોધખોળ શરૂ કરી છે.
પ્રાથમિક તપાસમાં પોલીસને એવી પણ શંકા છે કે આ માત્ર એક જ સ્થળનો જથ્થો નહીં પરંતુ દારૂના મોટા સપ્લાય નેટવર્કનો ભાગ હોઈ શકે છે. આરોપીઓ લાંબા સમયથી ગેરકાયદેસર રીતે દારૂનો વેપાર કરતા હોવાની આશંકાને આધારે પોલીસ હવે સમગ્ર નેટવર્કની તપાસ કરી રહી છે. દારૂ ક્યાંથી મંગાવવામાં આવતો હતો, કોણ તેના સપ્લાયર હતા, કયા વાહનો મારફતે દારૂ પહોંચાડવામાં આવતો હતો અને કોને તેનો સપ્લાય કરવામાં આવતો હતો તે સહિતના તમામ મુદ્દાઓની તપાસ શરૂ કરવામાં આવી છે.
સુરત ગ્રામ્ય LCBના અધિકારીઓએ જણાવ્યું છે કે જિલ્લામાં દારૂના ગેરકાયદે વેપાર સામે સતત અભિયાન ચલાવવામાં આવી રહ્યું છે. અગાઉ પણ અનેક સ્થળોએ દરોડા પાડી લાખો રૂપિયાનો દારૂ જપ્ત કરવામાં આવ્યો છે અને બુટલેગરો સામે કડક કાર્યવાહી કરવામાં આવી છે. આ કેસમાં પણ ઝડપાયેલા મુદ્દામાલના આધારે વધુ મોટા ખુલાસા થવાની શક્યતા નકારી શકાય તેમ નથી.
પોલીસ હવે ફરાર આરોપીઓની ધરપકડ માટે અલગ-અલગ ટીમો બનાવીને સંભવિત ઠેકાણાઓ પર દરોડા પાડી રહી છે. ઉપરાંત આરોપીઓના મોબાઇલ ફોન, સંપર્કો અને આર્થિક વ્યવહારોની પણ તપાસ કરવામાં આવી રહી છે, જેથી સમગ્ર દારૂ સપ્લાય ચેઇનનો ભેદ ઉકેલી શકાય.અધિકારીઓએ લોકોને પણ અપીલ કરી છે કે તેમના વિસ્તારમાં દારૂનું ગેરકાયદેસર વેચાણ, સંગ્રહ અથવા હેરફેર અંગે કોઈપણ માહિતી મળે તો તાત્કાલિક પોલીસને જાણ કરે. લોકોના સહયોગથી આવા ગેરકાયદેસર ધંધા પર વધુ અસરકારક રીતે નિયંત્રણ મેળવી શકાય છે.
હાલ પોલીસે સંબંધિત કલમો હેઠળ ગુનો નોંધી વધુ તપાસ હાથ ધરી છે. ફરાર બંને આરોપીઓને ઝડપવા માટે પ્રયાસો તેજ કરવામાં આવ્યા છે. પોલીસનું માનવું છે કે તેમની ધરપકડ બાદ દારૂના ગેરકાયદેસર વેપાર સાથે જોડાયેલા અન્ય લોકો અને સમગ્ર સપ્લાય નેટવર્ક અંગે પણ મહત્વપૂર્ણ માહિતી બહાર આવી શકે છે. આ કાર્યવાહી સુરત ગ્રામ્ય વિસ્તારમાં દારૂના ગેરકાયદેસર ધંધા સામે પોલીસની કડક કામગીરીનું વધુ એક મહત્વપૂર્ણ ઉદાહરણ બની છે.
