ઉત્તરાખંડના ચમોલી જિલ્લામાં ગુરુવારે સાંજે હાઈડ્રોઇલેક્ટ્રિક પ્રોજેક્ટની બાંધકામ હેઠળની સુરંગમાં અચાનક પાણી અને કાટમાળ ઘૂસી જતાં મોટો અકસ્માત સર્જાયો હતો. આ દુર્ઘટનામાં 7 કામદારોનાં મોત થયા છે, જ્યારે 11 અન્ય કામદારો ઘાયલ થયા હોવાનું પ્રાથમિક અહેવાલોમાં જણાવાયું છે. કેટલાક કામદારો હજુ લાપતા હોવાથી બચાવ કામગીરી ચાલુ છે.
આ અકસ્માત ચમોલીના પીપલકોટી વિસ્તારમાં આવેલા વિષ્ણુગઢ-પીપલકોટી જળવિદ્યુત પ્રોજેક્ટની બાંધકામ હેઠળની ટનલમાં થયો હતો. અધિકારીઓના જણાવ્યા અનુસાર, ટનલમાં અચાનક મોટી માત્રામાં પાણી અને કાટમાળ ઘૂસી ગયો હતો, જેના કારણે અંદર કામ કરી રહેલા કામદારો ફસાઈ ગયા હતા.
ટનલમાં અચાનક ઘૂસ્યું પાણી અને કાટમાળ
પ્રાથમિક માહિતી અનુસાર, ભારે વરસાદ બાદ વિસ્તારમાં ભૂસ્ખલન થતાં ટનલની અંદર અચાનક પાણી અને કાટમાળનો પ્રવાહ આવ્યો હતો. ઘટના સમયે કામદારો ટનલમાં ખોદકામ સહિતની કામગીરી કરી રહ્યા હતા. કેટલાક અહેવાલોમાં જણાવાયું છે કે ટનલની અંદર પાણી અને કાટમાળ છાતી સુધી ભરાઈ ગયા હતા, જેના કારણે બચાવ ટીમો માટે અંદર પહોંચવું મુશ્કેલ બન્યું હતું.
7નાં મોત, ઘાયલોને હોસ્પિટલ ખસેડાયા
અકસ્મિક પાણી અને કાટમાળના પ્રવાહમાં અનેક કામદારો ફસાઈ ગયા હતા. બચાવ ટીમોએ કામગીરી કરીને લોકોને બહાર કાઢ્યા હતા. સત્તાવાર માહિતીના અલગ-અલગ તબક્કામાં આંકડામાં ફેરફાર જોવા મળ્યો છે, પરંતુ 14 ઓગસ્ટની સવારે મળેલા અહેવાલોમાં 7 મોતની પુષ્ટિ કરવામાં આવી હતી. ઘાયલ કામદારોને સારવાર માટે હોસ્પિટલમાં ખસેડવામાં આવ્યા છે. બીજી તરફ લાપતા કામદારોની શોધ માટે બચાવ કામગીરી હજુ ચાલુ છે.
ટનલની અંદર પાણી અને કાટમાળના કારણે બચાવ કામગીરી પડકારજનક બની છે. ટીમો કાટમાળ હટાવીને અંદર ફસાયેલા અથવા લાપતા કામદારો સુધી પહોંચવાનો પ્રયાસ કરી રહી છે.
પ્રોજેક્ટનું કામ કોણ કરી રહ્યું છે?
આ અકસ્માત ટિહરી હાઈડ્રો ડેવલપમેન્ટ કોર્પોરેશન એટલે કે THDCના વિષ્ણુગઢ-પીપલકોટી હાઈડ્રોઇલેક્ટ્રિક પ્રોજેક્ટમાં થયો હતો. પ્રોજેક્ટના બાંધકામનું કામ હિન્દુસ્તાન કન્સ્ટ્રક્શન કંપની એટલે કે HCC દ્વારા કરવામાં આવી રહ્યું હોવાનું અધિકારીઓએ જણાવ્યું છે.
મુખ્યમંત્રી ધામીએ તાત્કાલિક બેઠક બોલાવી
અકસ્માનની ગંભીરતાને ધ્યાનમાં રાખીને ઉત્તરાખંડના મુખ્યમંત્રી પુષ્કર સિંહ ધામીએ તાત્કાલિક રાહત અને બચાવ કામગીરી ઝડપી બનાવવા અધિકારીઓને સૂચના આપી હતી. સરકારનું સમગ્ર ધ્યાન હાલમાં લાપતા કામદારોને શોધવા અને ઘાયલોને તાત્કાલિક સારવાર આપવાની કામગીરી પર છે.
સુરક્ષાને લઈને ફરી ઊભા થયા સવાલો
ચમોલી જેવા પહાડી અને ભૌગોલિક રીતે સંવેદનશીલ વિસ્તારમાં મોટા બાંધકામ પ્રોજેક્ટ દરમિયાન સુરક્ષાનો મુદ્દો ફરી ચર્ચામાં આવ્યો છે. ટનલની અંદર અચાનક પાણી અને કાટમાળ ઘૂસવાથી થયેલી આ દુર્ઘટનાએ બાંધકામ દરમિયાન કામદારોની સુરક્ષા વ્યવસ્થા, આપત્તિની સ્થિતિમાં બહાર નીકળવાના રસ્તા અને તાત્કાલિક બચાવ વ્યવસ્થાને લઈને સવાલો ઊભા કર્યા છે. હાલ પ્રાથમિકતા લાપતા કામદારોને શોધવાની છે. ત્યારબાદ અકસ્માતનું ચોક્કસ કારણ અને સુરક્ષા વ્યવસ્થામાં કોઈ ખામી હતી કે નહીં તેની તપાસ મહત્વની બનશે.
રેસ્ક્યુ ઓપરેશન વચ્ચે દરેકની નજર લાપતા કામદારો પર
હાલ ટનલની અંદર સ્થિતિ મુશ્કેલ છે. પાણી, કાંપ અને કાટમાળ વચ્ચે બચાવ ટીમો સતત કામગીરી કરી રહી છે. 7 કામદારોનાં મોત બાદ હવે સૌથી મોટો પડકાર લાપતા કામદારોને શોધીને સુરક્ષિત બહાર કાઢવાનો છે. ઘટનાએ સમગ્ર વિસ્તારમાં શોકનું વાતાવરણ સર્જ્યું છે અને કામદારોના પરિવારજનો બચાવ કામગીરીના પરિણામની રાહ જોઈ રહ્યા છે.
