પશ્ચિમ બંગાળમાં ભાજપની ઐતિહાસિક જીત બાદ નવી સરકારનું ગઠન થઈ ગયું છે. ભાજપના દિગ્ગજ નેતા Suvendu Adhikariએ મુખ્યમંત્રી તરીકે શપથ લીધા બાદ હવે તેમના મંત્રીમંડળે પણ સત્તાવાર રીતે કાર્યભાર સંભાળી લીધો છે. કોલકાતાના બ્રિગેડ પરેડ ગ્રાઉન્ડ ખાતે યોજાયેલા ભવ્ય શપથવિધિ સમારંભમાં અનેક દિગ્ગજ નેતાઓ હાજર રહ્યા હતા. દેશના વડાપ્રધાન Narendra Modi, કેન્દ્રીય ગૃહમંત્રી Amit Shah, રક્ષામંત્રી Rajnath Singh અને ઉત્તર પ્રદેશના મુખ્યમંત્રી Yogi Adityanath સહિત ભાજપના અનેક વરિષ્ઠ નેતાઓની હાજરીમાં મંત્રીમંડળે શપથ લીધા હતા.
શપથવિધિ સમારંભ દરમિયાન સૌથી પહેલા શુભેંદુ અધિકારીએ મુખ્યમંત્રી તરીકે શપથ લીધા હતા. ત્યારબાદ એક પછી એક નવા મંત્રીઓએ શપથ ગ્રહણ કર્યા હતા. સમગ્ર કાર્યક્રમ દરમિયાન ભાજપના કાર્યકરોમાં ભારે ઉત્સાહ જોવા મળ્યો હતો અને મેદાન ભાજપના ઝંડા અને સૂત્રોચ્ચારથી ગુંજી ઉઠ્યું હતું.
દિલીપ ઘોષે લીધા મંત્રીપદના શપથ
ભાજપના વરિષ્ઠ નેતા અને પશ્ચિમ બંગાળ ભાજપના પૂર્વ અધ્યક્ષ Dilip Ghoshએ મંત્રીપદની શપથ લીધી હતી. રાજ્યમાં ભાજપના સંગઠનને મજબૂત બનાવવામાં દિલીપ ઘોષનું મહત્વપૂર્ણ યોગદાન માનવામાં આવે છે. તેઓ લાંબા સમયથી ભાજપના મુખ્ય ચહેરા તરીકે ઓળખાતા રહ્યા છે. શપથ લીધા બાદ તેમણે વડાપ્રધાન મોદી અને અન્ય વરિષ્ઠ નેતાઓના આશીર્વાદ લીધા હતા.
અગ્નિમિત્રા પૉલ બન્યા મંત્રીમંડળનો ભાગ
ફેશન ડિઝાઇનરથી રાજકારણી બનેલી Agnimitra Paulએ પણ મંત્રીપદની શપથ લીધી હતી. આસનસોલ દક્ષિણ બેઠક પરથી જીતેલા અગ્નિમિત્રા પૉલ ભાજપના મજબૂત મહિલા ચહેરા તરીકે સામે આવ્યા છે. તેમણે રાજ્યમાં મહિલાઓના પ્રશ્નો અને યુવા મતદારો વચ્ચે ખાસ લોકપ્રિયતા મેળવી છે. સમારંભ દરમિયાન તેમની હાજરીએ ખાસ ધ્યાન ખેંચ્યું હતું.
નિશિથ પ્રામાણિકને પણ મળી મહત્વની જવાબદારી
ભાજપના યુવા નેતા Nisith Pramanikએ પણ મંત્રી તરીકે શપથ લીધા હતા. ઉત્તર બંગાળ વિસ્તારમાં તેમનો પ્રભાવ માનવામાં આવે છે અને ચૂંટણી દરમિયાન તેમણે પાર્ટી માટે જોરદાર પ્રચાર કર્યો હતો. પાર્ટીએ તેમને યુવા ચહેરા તરીકે મહત્વપૂર્ણ સ્થાન આપ્યું છે.
શંકર ઘોષે પણ લીધા શપથ
Shankar Ghoshને પણ નવા મંત્રીમંડળમાં સ્થાન મળ્યું છે. તેઓ ભાજપના સક્રિય નેતા તરીકે જાણીતા છે અને સંગઠનમાં લાંબા સમયથી કાર્યરત રહ્યા છે. શપથ લીધા બાદ તેમણે રાજ્યના વિકાસ માટે પ્રતિબદ્ધતા વ્યક્ત કરી હતી.
અશોક કીર્તનિયાની પણ એન્ટ્રી: બનગાંવ ઉત્તર બેઠક પરથી ચૂંટાયેલા Ashok Kirtaniyaએ પણ શપથ લીધા હતા. તેઓ મતુઆ સમુદાયમાં મજબૂત પકડ ધરાવે છે અને સતત બીજી વખત ધારાસભ્ય બન્યા છે. મતુઆ સમાજના વિકાસ માટે તેઓ સતત કાર્ય કરતા રહ્યા છે.
પીએમ મોદી રહ્યા સમારંભનું કેન્દ્ર
શપથવિધિ દરમિયાન વડાપ્રધાન Narendra Modi ખાસ આકર્ષણનું કેન્દ્ર રહ્યા હતા. મુખ્યમંત્રી તરીકે શપથ લીધા બાદ શુભેંદુ અધિકારીએ પીએમ મોદીના ચરણ સ્પર્શ કરીને આશીર્વાદ લીધા હતા. ત્યારબાદ મોદીએ તેમને ગળે લગાવી અભિનંદન પાઠવ્યા હતા. આ દૃશ્ય સોશિયલ મીડિયા પર ઝડપથી વાયરલ થયું હતું. સમારંભ દરમિયાન શુભેંદુ અધિકારીએ મંચ પર હાજર તમામ દિગ્ગજ નેતાઓ સાથે મુલાકાત કરી હતી. જ્યારે તેઓ Yogi Adityanathને મળ્યા ત્યારે યોગીએ તેમને પોતાનો પરંપરાગત ગમછો પહેરાવી અભિવાદન કર્યું હતું.
ભાજપ માટે ઐતિહાસિક ક્ષણ
પશ્ચિમ બંગાળમાં ભાજપે 207 બેઠકો જીતતા ઐતિહાસિક વિજય મેળવ્યો હતો. બીજી તરફ Mamata Banerjeeની તૃણમૂલ કોંગ્રેસ માત્ર 80 બેઠકો સુધી સીમિત રહી હતી. આ સાથે રાજ્યમાં 15 વર્ષ જૂના ટીએમસી શાસનનો અંત આવ્યો હતો.નવી સરકાર સામે હવે રાજ્યના વિકાસ, કાયદો-વ્યવસ્થા, રોજગાર અને ઔદ્યોગિક રોકાણ જેવા અનેક પડકારો છે.જોકે ભાજપના નેતાઓએ વિશ્વાસ વ્યક્ત કર્યો છે કે નવી સરકાર બંગાળને વિકાસના નવા માર્ગ પર લઈ જશે.
શપથવિધિ સમારંભ બાદ સમગ્ર રાજ્યમાં ભાજપના કાર્યકરો દ્વારા ઉજવણી કરવામાં આવી હતી. અનેક સ્થળોએ ફટાકડા ફોડવામાં આવ્યા અને મીઠાઈ વહેંચવામાં આવી હતી. પશ્ચિમ બંગાળની રાજનીતિમાં હવે નવા અધ્યાયની શરૂઆત થઈ ગઈ છે.
