ભારત અને અફઘાનિસ્તાન વચ્ચે રમાનારી ત્રણ મેચોની વન-ડે શ્રેણીની પ્રથમ મેચ વરસાદના કારણે વિલંબથી શરૂ થવાની સ્થિતિમાં આવી છે. ધર્મશાલાના હિમાચલ પ્રદેશ ક્રિકેટ એસોસિએશન (HPCA) સ્ટેડિયમમાં શનિવારે સતત હળવો વરસાદ પડતા ટૉસ સમયસર થઈ શક્યો નહોતો. હવામાન વિભાગે અગાઉથી જ આ વિસ્તારમાં લગભગ 55 ટકા વરસાદની સંભાવના વ્યક્ત કરી હતી અને મેચના દિવસે પણ આ આગાહી સાચી સાબિત થઈ રહી છે. મેદાન પર વરસાદને કારણે કવર ઢાંકી દેવામાં આવ્યા હતા અને ગ્રાઉન્ડ સ્ટાફ દ્વારા મેદાનને રમવા લાયક બનાવવા સતત પ્રયાસ કરવામાં આવી રહ્યા હતા. સુપર સોપર મશીનો દ્વારા આઉટફિલ્ડને સૂકવવાનું કામ શરૂ કરવામાં આવ્યું હતું, પરંતુ ફરી વરસાદ શરૂ થતાં આ પ્રક્રિયા અટકાવવી પડી હતી. સ્ટેડિયમમાં હાજર હજારો ક્રિકેટપ્રેમીઓ છત્રી અને રેઇનકોટ સાથે વરસાદ બંધ થવાની રાહ જોઈ રહ્યા છે.
ભારત અને અફઘાનિસ્તાન વચ્ચે દ્વિપક્ષીય વન-ડે શ્રેણી પ્રથમ વખત રમાઈ રહી છે. અત્યાર સુધી બંને ટીમો વર્લ્ડ કપ અને એશિયા કપ જેવા મોટા ટૂર્નામેન્ટોમાં આમને-સામને આવી છે, પરંતુ દ્વિપક્ષીય વન-ડે શ્રેણીનો આ પ્રથમ પ્રસંગ છે. બંને દેશો માટે આ શ્રેણી ખાસ મહત્વ ધરાવે છે કારણ કે આગામી આંતરરાષ્ટ્રીય ટૂર્નામેન્ટોને ધ્યાનમાં રાખીને ટીમો પોતાના સંયોજનને વધુ મજબૂત બનાવવા માંગે છે. ભારતીય ટીમ આ શ્રેણીમાં કેટલાક મહત્વના ખેલાડીઓ વિના મેદાનમાં ઉતરી રહી છે. વિરાટ કોહલી અને હાર્દિક પંડ્યા ઈજાના કારણે ઉપલબ્ધ નથી, જ્યારે જસપ્રીત બુમરાહ અને મોહમ્મદ સિરાજને આરામ આપવામાં આવ્યો છે. જેના કારણે યુવા ખેલાડીઓને પોતાની પ્રતિભા સાબિત કરવાની તક મળી શકે છે. ખાસ કરીને પ્રિન્સ યાદવ અને ગુરનૂર બ્રારમાંથી કોઈ એક ખેલાડીને આંતરરાષ્ટ્રીય ક્રિકેટમાં ડેબ્યૂ કરવાની તક મળવાની સંભાવના છે. આ મેચ રોહિત શર્મા માટે પણ ખાસ બની શકે છે. ભારતીય ક્રિકેટના અનુભવી ઓપનર તરીકે તે વધુ એક મહત્વપૂર્ણ સીમાચિહ્ન સર કરવા જઈ રહ્યો છે. બીજી તરફ કેપ્ટન શુભમન ગિલ પર ટીમની બેટિંગની મોટી જવાબદારી રહેશે. વિરાટ કોહલીની ગેરહાજરીમાં ગિલ, રોહિત શર્મા, શ્રેયસ અય્યર અને કેએલ રાહુલ ભારતીય બેટિંગના મુખ્ય આધારસ્તંભ રહેશે.
વન-ડે ક્રિકેટમાં છેલ્લા કેટલાક સમયથી શુભમન ગિલ શાનદાર ફોર્મમાં છે. તેણે 2025 પછી 625 રન બનાવ્યા છે, જ્યારે રોહિત શર્માએ 17 મેચમાં 711 રન ફટકાર્યા છે. શ્રેયસ અય્યર પણ એક મહત્વપૂર્ણ સિદ્ધિની નજીક છે. તેને વન-ડે ક્રિકેટમાં 3000 રન પૂર્ણ કરવા માટે માત્ર 23 રનની જરૂર છે, જ્યારે શુભમન ગિલને આ આંકડા સુધી પહોંચવા માટે 47 રનની જરૂર પડશે. ભારતીય બોલિંગ આક્રમણમાં કુલદીપ યાદવ મહત્વની ભૂમિકા ભજવશે. તેણે 2025 પછી 22 વિકેટ ઝડપી છે અને મધ્ય ઓવરોમાં વિરોધી બેટિંગ પર દબાણ ઊભું કરવાની જવાબદારી તેના ખભા પર રહેશે. નવા બોલ સાથે અર્શદીપ સિંહ અને પ્રસિદ્ધ કૃષ્ણા પર સારી શરૂઆત અપાવવાનો ભાર રહેશે.
અફઘાનિસ્તાનની ટીમ પણ આત્મવિશ્વાસથી ભરપૂર છે. ટીમે પોતાની છેલ્લી ચાર વન-ડે મેચ જીતી છે અને ભારત સામે પડકાર ઉભો કરવા માટે તૈયાર છે. બેટિંગમાં ઇબ્રાહિમ ઝદરાન, રહમાનુલ્લાહ ગુરબાઝ, રહમત શાહ અને અઝમતુલ્લાહ ઓમરઝઈ મહત્વની ભૂમિકા ભજવશે. ઝદરાન છેલ્લા કેટલાક સમયથી શાનદાર ફોર્મમાં છે અને તેણે માત્ર છ વન-ડેમાં 429 રન બનાવ્યા છે. અઝમતુલ્લાહ ઓમરઝઈ અફઘાનિસ્તાન માટે સૌથી વિશ્વસનીય ઓલરાઉન્ડર તરીકે ઉભર્યો છે. તેણે છેલ્લી 10 વન-ડે મેચમાં 24 વિકેટ ઝડપી છે અને બેટથી પણ સતત યોગદાન આપ્યું છે. બીજી તરફ સ્ટાર લેગ સ્પિનર રાશિદ ખાનના પુનરાગમનથી અફઘાનિસ્તાનને મોટી મજબૂતી મળી છે. રાશિદ ભારત સામે અગાઉ પણ અસરકારક પ્રદર્શન કરી ચૂક્યો છે અને તેની સ્પિન ભારતીય બેટર્સ માટે પડકાર બની શકે છે.
ધર્મશાલાનું HPCA સ્ટેડિયમ બેટર્સ અને ફાસ્ટ બોલરો બંને માટે અનુકૂળ માનવામાં આવે છે. ઊંચાઈ પર સ્થિત આ મેદાનમાં બોલ ઝડપથી બેટ પર આવે છે અને શરૂઆતની ઓવરોમાં સ્વિંગ તથા વધારાનો બાઉન્સ જોવા મળે છે. ત્યારબાદ બેટર્સ માટે રન બનાવવાનું સરળ બની જાય છે. આ મેદાન પર અત્યાર સુધી રમાયેલી નવ વન-ડેમાંથી પાંચ વખત લક્ષ્યાંકનો પીછો કરનારી ટીમે જીત મેળવી છે. ફિલહાલ તમામની નજર હવામાન પર ટકેલી છે. વરસાદ બંધ થયા બાદ મેદાનની સ્થિતિનું મૂલ્યાંકન કરવામાં આવશે અને ત્યારબાદ ટૉસ તથા મેચ શરૂ કરવા અંગે નિર્ણય લેવામાં આવશે. ક્રિકેટપ્રેમીઓ આશા રાખી રહ્યા છે કે હવામાન જલ્દી સુધરે અને ભારત તથા અફઘાનિસ્તાન વચ્ચેની આ રસપ્રદ ટક્કર સંપૂર્ણ રીતે જોવા મળે.
