સુરત: શહેરના પાલ વિસ્તારમાં આવેલા વોક વે ઉપર સહેલી સાથે નાઈટ વોકમાં નીકળેલી યુવતીને એક અજાણ્યા યુવકે ગુપ્તાંગ બતાવી અશ્લીલ હરકત કરી હતી. યુવતીએ બૂમાબૂમ કરતાં લોકોએ યુવકને પકડી મેથીપાક ચખાડ્યો હતો. રીતેશ મિશ્રા નામનો આ યુવાન દ્વારા આ હરકત કરવામાં આવતા પોલીસે તેની સામે ગુનો દાખલ કર્યો છે.
શહેરના એલ.પી.સવાણી રોડ પર આવેલી સોસાયટીમાં રહેતી 19 વર્ષીય આરાધના (નામ બદલ્યું છે) કોલેજમાં અભ્યાસ કરે છે. તેની 21 વર્ષીય ફ્રેન્ડ પ્રિતી (નામ બદલ્યું છે) તથા માતા સાથે પાલ રોડ ખાતે આવેલા વોક વે ઉપર નાઈટ વોકિંગમાં ગઈ હતી. માતા બાકડા પર બેઠી હતી અને બંને યુવતી વોકિંગ કરવા નીકળી હતી. દરમિયાન અચાનક અંધારામાંથી એક યુવક ધસી આવ્યો હતો અને પેન્ટ ઉતારી ગુપ્તાંગ બતાવી અશ્લીલ હરકત કરવા લાગ્યો હતો.
એકાએક ધસી આવેલા યુવકને જોઈને બંને યુવતી ડરી જતાં બૂમાબૂમ કરવા લાગી હતી. યુવતીઓની બૂમો સાંભળી વોક વે ઉપર વોકિંગ કરવા આવેલા લોકો દોડી આવ્યા હતા. લોકોની ભીડ જોઈ યુવકે ભાગવાનો પ્રયાસ કરતાં લોકોએ તેને ઝડપી પાડી મેથીપાક આપ્યો હતો. આ અંગે પોલીસ કંટ્રોલ રૂમમાં ફોન કરતાં અડાજણ પોલીસની ટીમ તાત્કાલિક ઘટના સ્થળે પહોંચી ગઈ હતી. પોલીસે યુવકને પકડી પૂછપરછ કરતાં તેણે પોતાનું નામ રીતેશ ઉમેશ મિશ્રા (ઉં.વ.31) (રહે., સુમનઘટા એપાર્ટમેન્ટ, પરશુરામ ગાર્ડન પાસે, એલ.પી.સવાણી રોડ, અડાજણ) હોવાનું જણાવ્યું હતું. પોલીસે યુવકની સામે ફરિયાદ દાખલ કરી વધારે તપાસ હાથ ધરી છે.
