ટ્રમ્પે H-1B વિઝા પરની પાબંદી વધુ એક વર્ષ લંબાવી, $1 લાખનો નિયમ પણ યથાવત
અમેરિકામાં નોકરી કરવાની ઈચ્છા રાખતા વિદેશી પ્રોફેશનલ્સ, ખાસ કરીને ભારતીય IT પ્રોફેશનલ્સ માટે H-1B વિઝાને લઈને મહત્વપૂર્ણ સમાચાર સામે આવ્યા છે. અમેરિકી રાષ્ટ્રપતિ ડોનાલ્ડ ટ્રમ્પે H-1B વિઝા કાર્યક્રમ અંગેની વર્તમાન પાબંદીઓને વધુ એક વર્ષ માટે લંબાવવાનો નિર્ણય લીધો છે. આ સાથે ચોક્કસ નવા H-1B અરજદારો માટે લાગુ કરવામાં આવેલી 1 લાખ અમેરિકી ડોલરની ચુકવણીની શરત પણ ચાલુ રહેશે.
વ્હાઇટ હાઉસ દ્વારા જાહેર કરવામાં આવેલી નવી જાહેરાત મુજબ, અગાઉ સપ્ટેમ્બર 2025માં લાગુ કરવામાં આવેલી H-1B પ્રવેશ પાબંદી હવે 21 સપ્ટેમ્બર 2027 સુધી ચાલુ રહેશે. નિયમ મુજબ અમેરિકાની બહાર રહેલા કેટલાક વિદેશી કર્મચારીઓ માટે H-1B પિટિશન સાથે $100,000ની ચુકવણી જરૂરી રહેશે. જોકે આ નિયમમાં મર્યાદિત અપવાદની જોગવાઈ પણ રાખવામાં આવી છે. હોમલેન્ડ સિક્યુરિટી વિભાગ કોઈ વ્યક્તિ અથવા ચોક્કસ વર્ગના કર્મચારીઓની ભરતીને અમેરિકાના રાષ્ટ્રીય હિતમાં જરૂરી માને તો અપવાદ આપી શકે છે.ટ્રમ્પ પ્રશાસનનું કહેવું છે કે H-1B કાર્યક્રમનો ઉપયોગ કેટલાક IT સ્ટાફિંગ અને આઉટસોર્સિંગ વ્યવસાયો દ્વારા ઓછા વેતનવાળા વિદેશી કર્મચારીઓને નોકરી આપવા માટે કરવામાં આવતો હતો.
વ્હાઇટ હાઉસ અનુસાર, 2025માં $1 લાખની ચુકવણીની શરત અને ત્યારબાદની નીતિઓ લાગુ થયા પછી મોટી IT આઉટસોર્સિંગ કંપનીઓના H-1B રજિસ્ટ્રેશનમાં 92 ટકાનો ઘટાડો નોંધાયો છે. પ્રશાસનનું કહેવું છે કે આ નીતિથી વધુ કુશળ અને વધુ વેતનવાળા કર્મચારીઓ તરફ H-1B પસંદગીમાં ફેરફાર થયો છે.આ નિર્ણયની કાનૂની સ્થિતિ પણ મહત્વપૂર્ણ છે. $100,000 ફીની નીતિને અમેરિકાની અદાલતોમાં પડકારવામાં આવી છે અને તેના અંગે કાનૂની કાર્યવાહી ચાલી રહી છે. રોઇટર્સના અહેવાલ મુજબ અગાઉ એક ફેડરલ કોર્ટે ફીમાં વધારો ગેરકાયદેસર ગણાવ્યો હતો અને આ મામલો અપીલ કોર્ટમાં પણ ચર્ચા હેઠળ રહ્યો છે. તેથી નિયમ લંબાવવામાં આવ્યો હોવા છતાં તેની કાનૂની સ્થિતિ અંગે આગળના અદાલતી નિર્ણય મહત્વપૂર્ણ રહેશે.સાથે જ ટ્રમ્પે H-1B અરજીઓની વધુ કડક તપાસ માટે અલગ જાહેરાત પણ કરી છે.
અમેરિકી કંપની કોઈ કર્મચારીની છટણી કરે અથવા સમાન પદ પર અમેરિકન કર્મચારીઓને હટાવવાની સ્થિતિ હોય તો H-1B અરજીની તપાસ કરતી વખતે આ બાબતોને ધ્યાનમાં લેવાનો નિર્દેશ આપવામાં આવ્યો છે. શ્રમ વિભાગને અગાઉ દાખલ કરાયેલા Labour Condition Applicationsના આંકડાઓની સમીક્ષા કરીને જરૂર પડે તો સ્પોન્સર કંપનીઓ સામે આગળની કાર્યવાહી અંગે વિચારવાનું પણ કહેવામાં આવ્યું છે.ભારતીયો માટે આ નિર્ણય ખાસ મહત્વનો છે, કારણ કે H-1B કાર્યક્રમના સૌથી મોટા લાભાર્થી સમૂહોમાં ભારતીય પ્રોફેશનલ્સનો સમાવેશ થાય છે. જોકે હાલની જાહેરાતનો અર્થ એ નથી કે દરેક H-1B વિઝા અરજદારને ફરજિયાત રીતે $1 લાખ ચૂકવવા પડશે; આ શરત ખાસ કરીને અમેરિકાની બહાર રહેલા ચોક્કસ નવા H-1B કર્મચારીઓની એન્ટ્રી સાથે જોડાયેલી છે અને તેમાં અપવાદોની જોગવાઈ છે.
