Latest News

તમિલનાડુની રાજનીતિમાં અભિનેતા અને Vijay માટે વર્ષ 2026ની વિધાનસભા ચૂંટણી ઐતિહાસિક સાબિત થઈ છે. તેમની પાર્ટી Tamilaga Vettri Kazhagam (TVK) પ્રથમ જ ચૂંટણીમાં સૌથી મોટી પાર્ટી બની સામે આવી છે, પરંતુ સરકાર રચવાના મામલે હજુ સુધી સ્પષ્ટ બહુમતીનું ગણિત બેસતું નથી. હાલમાં આખું રાજકીય ધ્યાન “5+2+2+2-2”ના આંકડાઓ પર કેન્દ્રિત છે, જે બતાવે છે કે વિજય માટે સત્તાનો માર્ગ કેટલો કઠિન બની ગયો છે.

234 બેઠકોની તમિલનાડુ વિધાનસભામાં બહુમતી માટે 118 બેઠકો જરૂરી છે. TVKએ 108 બેઠકો જીતીને રાજકીય ચમત્કાર સર્જ્યો હતો. જોકે વિજય બે બેઠકો પરથી જીત્યા હોવાથી તેમને એક બેઠક છોડવી પડશે, જેના કારણે TVKની અસરકારક સંખ્યા 107 થઈ જાય છે. એટલે કે સરકાર બનાવવા માટે હજુ 11 ધારાસભ્યોના સમર્થનની જરૂરિયાત ઉભી થઈ.

આ જ સંજોગોમાં “5+2+2+2-2”નું ગણિત સામે આવ્યું છે. કોંગ્રેસે TVKને 5 ધારાસભ્યોનું સમર્થન આપ્યું છે. ઉપરાંત CPI, CPM અને IUML જેવી પાર્ટીઓએ 2-2 ધારાસભ્યોના સમર્થનનો સંકેત આપ્યો. શરૂઆતમાં એવું લાગતું હતું કે વિજય સરળતાથી બહુમતી પાર કરી લેશે, પરંતુ બાદમાં કેટલાક સમર્થન પર સસ્પેન્સ ઊભું થયું. ખાસ કરીને VCK અને AMMK તરફથી મળતા સમર્થન અંગે વિવાદ સર્જાતા ગણિત ફરી ગૂંચવાયું.

કોંગ્રેસે TVKને સમર્થન આપતાં એક મહત્વપૂર્ણ શરત મૂકી હતી. કોંગ્રેસે સ્પષ્ટ કહ્યું કે BJP અથવા NDA સાથે કોઈ સંબંધ નહીં રાખવામાં આવે તો જ તેઓ TVK સરકારને ટેકો આપશે. અહેવાલો મુજબ TVKએ કોંગ્રેસને બે મંત્રીપદ અને એક રાજ્યસભાની બેઠકની ઓફર પણ કરી હતી. તેમ છતાં કોંગ્રેસના 5 ધારાસભ્યો માત્રથી વિજય બહુમતી સુધી પહોંચી શકતા નહોતા.

બીજી તરફ CPI અને CPMએ “સ્થિર અને ધર્મનિરપેક્ષ સરકાર”ના નામે બહારથી સમર્થન આપવાની જાહેરાત કરી. જોકે બંને ડાબેરી પાર્ટીઓએ એ પણ સ્પષ્ટ કર્યું કે તેઓ DMK સાથેના પોતાના રાજકીય સંબંધો ચાલુ રાખશે અને સરકારમાં સામેલ નહીં થાય. આથી રાજ્યપાલ માટે સ્થિતિ વધુ જટિલ બની ગઈ.સૌથી મોટો વિવાદ AMMKના સમર્થનને લઈને થયો.

સોશિયલ મીડિયા અને રાજકીય વર્તુળોમાં એવો દાવો થયો કે TTV દિનાકરણની પાર્ટીએ TVKને સમર્થન આપ્યું છે. પરંતુ બાદમાં AMMKએ આ દાવાને “ખોટો અને નકલી પત્ર” ગણાવીને નકારી કાઢ્યો. પરિણામે વિજયના દાવા પર ફરી પ્રશ્નચિહ્ન ઊભું થયું. રાજ્યપાલ Rajendra Vishwanath Arlekar પણ સ્પષ્ટ બહુમતીના પુરાવા માંગતા રહ્યા છે. મીડિયા અહેવાલો અનુસાર રાજ્યપાલે વિજયને ઓછામાં ઓછા 118 ધારાસભ્યોના લેખિત સમર્થન પત્રો રજૂ કરવાની શરત મૂકી છે. આ કારણસર વિજય ત્રણ વખત રાજ્યપાલને મળ્યા હોવા છતાં સરકાર રચવાની પ્રક્રિયા અટકી ગઈ છે

આ સમગ્ર ઘટનાક્રમે તમિલનાડુની રાજનીતિમાં ભારે અનિશ્ચિતતા ઊભી કરી છે. એક તરફ TVK નવી રાજકીય શક્તિ તરીકે ઉભરી રહી છે, તો બીજી તરફ DMK અને AIADMK જેવી પરંપરાગત પાર્ટીઓ પણ સત્તાની રમતમાંથી બહાર રહેવા તૈયાર નથી. જો વિજય બહુમતી સાબિત કરવામાં નિષ્ફળ જશે તો રાજ્યમાં રાષ્ટ્રપતિ શાસન અથવા ફરી ચૂંટણી જેવી પરિસ્થિતિ પણ સર્જાઈ શકે છે.