નવી દિલ્હી: લેન્ડર વિક્રમ બુધવારે સાંજે 6.04 કલાકે ચંદ્ર પર ઉતરશે. લેન્ડિંગની સાથે જ લેન્ડર વિક્રમ પોતાનું કામ શરૂ કરી દેશે. જો લેન્ડર વિક્રમનું સોફ્ટ લેન્ડિંગ સફળ થશે, તો છ પૈડાવાળું રોવર પ્રજ્ઞાન રેમ્પમાંથી બહાર આવશે અને ઈસરો તરફથી આદેશ મળતાં જ ચંદ્રની સપાટી પર દોડશે. તે 500 મીટર સુધીના વિસ્તારમાં ચાલશે અને ઇસરોને ત્યાંના પાણી અને વાતાવરણ વિશે જણાવશે.
ચંદ્રયાન-3 (Chandrayaan-3) હવે ચંદ્રની સપાટીથી થોડા જ અંતરે છે અને જો બધું બરાબર રહેશે તો તેને સફળતાપૂર્વક લેન્ડ થવામાં થોડા કલાકો લાગશે. ચંદ્રયાન-3 હવે ચંદ્રથી થોડા જ કલાકો દૂર છે. આજે સાંજે 6.04 કલાકે ચંદ્રની સપાટી પર ઉતરાણ (Landing) કરીને તે ઈતિહાસ રચશે જેની આખી દુનિયા રાહ જોઈ રહી છે. અમેરિકા, ચીન અને અગાઉના સોવિયેત યુનિયન પછી ચંદ્રની સપાટી પર સોફ્ટ લેન્ડ કરનાર ભારત (India) ચોથો દેશ બનશે, પરંતુ ચંદ્રના દક્ષિણ ધ્રુવ પર સોફ્ટ લેન્ડ કરનાર ભારત પહેલો દેશ બનશે.
23 ઓગસ્ટની સાંજે આ સેટેલાઇટ ચંદ્રની સપાટી પર પગ મૂકશે. તેના ઉતરાણને લઈને લોકોમાં ઉત્સાહ જોવા મળી રહ્યો છે. ઈન્ડિયન સ્પેસ રિસર્ચ ઓર્ગેનાઈઝેશન (ISRO) જણાવ્યું છે કે ચંદ્રયાનનું વિક્રમ લેન્ડર ચંદ્રની ભ્રમણકક્ષામાં પહોંચી ગયું છે જ્યાં ચંદ્રની સૌથી નજીકનું બિંદુ માત્ર 25 કિલોમીટર છે, હવે તે ધીમે ધીમે સપાટી તરફ આગળ વધી રહ્યું છે. જો બધું બરાબર રહ્યું તો વિક્રમ લેન્ડર સાંજે 6.04 વાગ્યે ચંદ્ર પર સોફ્ટ લેન્ડિંગ કરશે. ભારત સહિત વિશ્વના લોકોની નજર ચંદ્રયાન-3 પર ટકેલી છે.
ઈસરોના વૈજ્ઞાનિકોએ જણાવ્યું છે કે લેન્ડર વિક્રમને તમામ આદેશો આપવામાં આવ્યા છે અને તે આદેશો પણ આજે બપોર પછી લોક થઈ જશે. મળતી માહિતી મુજબ વૈજ્ઞાનિકો લેન્ડરને સાડા 30 કિલોમીટરની ઉંચાઈથી ચંદ્રની સપાટી પર લેન્ડ કરવાનો પ્રયાસ કરશે અને આજે સાંજે 5.45 વાગ્યાથી લેન્ડિંગની પ્રક્રિયા શરૂ કરવામાં આવશે.
ઈસરોએ પહેલા જ કહ્યું હતું કે લેન્ડર ચંદ્રના દક્ષિણ ધ્રુવીય ક્ષેત્ર પર સોફ્ટ લેન્ડિંગ કરશે. ચંદ્રની સપાટી પર ઉતર્યા પછી, વિક્રમ લેન્ડર પૃથ્વીના વાતાવરણ તેમજ ચંદ્ર પર હાજર ખનિજોનો અભ્યાસ કરવા માટે ચંદ્રની પરિક્રમા કરવાનું ચાલુ રાખશે. ઈસરોના જણાવ્યા અનુસાર ચંદ્રયાન-3ના લેન્ડિંગનું લાઈવ ટેલિકાસ્ટ ઈસરોની દરેક ઓફિશિયલ સાઈટ પર કરવામાં આવશે. આમાં ઈસરોની વેબસાઈટ, ઈસરોનું યુટ્યુબ, ઈસરોના ફેસબુક અને ટ્વિટર પેજનો સમાવેશ થાય છે. આ ઉપરાંત, તમે DD નેશનલ ટીવી ચેનલ સહિત ઘણા પ્લેટફોર્મ દ્વારા તેનું લાઈવ ટેલિકાસ્ટ જોઈ શકશો.
ચંદ્રયાન-3ના સફળ ઉતરાણ માટે જ્યાં મંદિરમાં પ્રાર્થના કરવામાં આવી રહી છે, ત્યાં દરગાહમાં પણ પ્રાર્થના કરવામાં આવી રહી છે. ચંદ્રયાન-3ના સફળ ઉતરાણ માટે મધ્યપ્રદેશના ઉજ્જૈનમાં શ્રી મહાકાલેશ્વર મંદિરમાં વિશેષ ‘ભસ્મ આરતી’ કરવામાં આવી હતી.
