ટીચર્સ ડેની ઉજવણી વચ્ચે બિહારની પટના યુનિવર્સિટીમાં સૂતળી બોમ્બ ફેંકાતા અચાનક અફરાતફરી મચી ગઈ. શનિવાર, 5 સપ્ટેમ્બરે અજાણ્યા શખ્સે અશોક રાજપથ પર આવેલા ડબલ ડેકર બ્રિજ પરથી યુનિવર્સિટી કેમ્પસમાં સૂતળી બોમ્બ ફેંક્યો હતો. વિસ્ફોટ બાદ જોરદાર અવાજ સંભળાયો અને ધુમાડો છવાઈ ગયો. જોકે, ઘટનામાં કોઈ જાનહાનિ થઈ નથી.
બ્રિજ પરથી કેમ્પસમાં ફેંકાયો બોમ્બ
પ્રાથમિક માહિતી પ્રમાણે આ ઘટના બપોરે લગભગ 12:08થી 12:15 વાગ્યાની વચ્ચે બની હતી. અજાણ્યા શખ્સે અશોક રાજપથના ડબલ ડેકર બ્રિજ પરથી પટના યુનિવર્સિટી કેમ્પસમાં, ભૂગોળ અને મનોવિજ્ઞાન વિભાગ વચ્ચેના વિસ્તારમાં સૂતળી બોમ્બ ફેંક્યો હતો. બોમ્બ પડતાં જ જોરદાર ધડાકો થયો હતો. ત્યારબાદ ઘટનાસ્થળે ધુમાડો જોવા મળ્યો હતો. આ અવાજ સાંભળીને કેમ્પસમાં હાજર વિદ્યાર્થીઓ અને કર્મચારીઓમાં થોડા સમય માટે ગભરાટ ફેલાઈ ગયો હતો.
પોલીસને જાણ થતાં જ ટીમ ઘટનાસ્થળે પહોંચી
વિસ્ફોટની માહિતી મળ્યા બાદ પીરબહોર પોલીસ તાત્કાલિક યુનિવર્સિટી કેમ્પસમાં પહોંચી હતી. પોલીસે ઘટનાસ્થળનું નિરીક્ષણ કર્યું અને તપાસ શરૂ કરી હતી. પોલીસે ઘટનાની તપાસ માટે ફોરેન્સિક સાયન્સ લેબોરેટરી એટલે કે FSLની ટીમને પણ બોલાવી હતી. ફોરેન્સિક ટીમે ઘટનાસ્થળને સુરક્ષિત કરીને વિસ્ફોટ સાથે જોડાયેલા પુરાવા એકત્ર કરવાનું શરૂ કર્યું હતું.
સીસીટીવીથી બોમ્બ ફેંકનારની શોધ
હાલ પોલીસનું મુખ્ય ધ્યાન ડબલ ડેકર બ્રિજ અને તેની આસપાસના વિસ્તારમાં લાગેલા સીસીટીવી કેમેરાના ફૂટેજ તપાસવા પર છે. પોલીસને આશા છે કે ફૂટેજની મદદથી કેમ્પસમાં બોમ્બ ફેંકનાર શખ્સની ઓળખ થઈ શકે છે. પોલીસ એ પણ તપાસ કરી રહી છે કે આ ઘટના પાછળનું કારણ શું હતું અને શું તેનો કોઈ વ્યક્તિગત વિવાદ સાથે સંબંધ છે. પોલીસ અધિકારીઓના જણાવ્યા મુજબ, અત્યાર સુધી વિદ્યાર્થીઓ વચ્ચે કોઈ વિવાદની માહિતી સામે આવી નથી. જોકે, અન્ય એક અહેવાલમાં પોલીસ દ્વારા 2 જૂથો વચ્ચેના સંભવિત વિવાદના એંગલથી પણ તપાસ કરવામાં આવી રહી હોવાનું જણાવાયું છે.
કોઈ જાનહાનિ નહીં, પરંતુ સુરક્ષા પર સવાલ
આ ઘટનામાં અત્યાર સુધી કોઈ વિદ્યાર્થી કે કર્મચારી ઈજાગ્રસ્ત થયો હોવાની માહિતી નથી. તેમ છતાં યુનિવર્સિટી કેમ્પસમાં બોમ્બ ફેંકાયાની ઘટનાએ સુરક્ષા વ્યવસ્થાને લઈને ચિંતા ઊભી કરી છે. પટના યુનિવર્સિટીમાં અગાઉ પણ વિસ્ફોટ અને સૂતળી બોમ્બ સાથે જોડાયેલી ઘટનાઓ બની ચૂકી છે. જાન્યુઆરી 2026માં પણ યુનિવર્સિટીના હોસ્ટેલના વિદ્યાર્થીઓ પાસેથી દેશી બોમ્બ બનાવવા માટેની સામગ્રી મળી આવ્યા બાદ 7 વિદ્યાર્થીઓની ધરપકડ કરવામાં આવી હતી. તે સમયે 2 હોસ્ટેલના વિદ્યાર્થીઓ વચ્ચેના વિવાદ બાદ સૂતળી બોમ્બ ફેંકાયાની ઘટના બની હતી.
હાલની ઘટનામાં પોલીસ સીસીટીવી ફૂટેજ અને ફોરેન્સિક તપાસના આધારે બોમ્બ ફેંકનાર વ્યક્તિ સુધી પહોંચવાનો પ્રયાસ કરી રહી છે. પોલીસે જણાવ્યું છે કે તપાસમાંથી જે પુરાવા સામે આવશે તેના આધારે આગળની કાર્યવાહી કરવામાં આવશે.
