ક્રિકેટના ઇતિહાસમાં કેટલાક એવા બેટ્સમેન રહ્યા છે, જેમની ઘરેલુ ક્રિકેટની સિદ્ધિઓ આંતરરાષ્ટ્રીય કારકિર્દી કરતાં ઘણી મોટી રહી છે. ઈંગ્લેન્ડના પૂર્વ ક્રિકેટર માર્ક રામપ્રકાશ પણ આ યાદીમાં સામેલ છે. કાઉન્ટી ક્રિકેટમાં વર્ષો સુધી રનનો ઢગલો લગાવનાર અને સદીના અનેક રેકોર્ડ બનાવનાર રામપ્રકાશ આંતરરાષ્ટ્રીય સ્તરે પોતાની પ્રતિભા પ્રમાણે સફળતા મેળવી શક્યા નહોતા. 5 સપ્ટેમ્બર 2026ના રોજ તેઓ 57 વર્ષના થયા છે.માર્ક રામપ્રકાશનો જન્મ ઈંગ્લેન્ડમાં થયો હતો, પરંતુ તેમની સાથે ભારતનું પણ ખાસ જોડાણ છે. તેમના પિતા દેવેનરેન રામપ્રકાશ ઇન્ડો-ગયાની મૂળના હતા અને તેમના પૂર્વજો ભારતમાંથી જઈને ગુયાનામાં વસ્યા હતા. માર્કે માત્ર 17 વર્ષની ઉંમરે મિડલસેક્સ તરફથી રમવાનું શરૂ કર્યું અને શરૂઆતથી જ પોતાની બેટિંગ પ્રતિભાની છાપ છોડી હતી. ત્યારબાદ તેઓ ઈંગ્લેન્ડની અંડર-19 ટીમના કેપ્ટન પણ બન્યા હતા. મજબૂત ટેકનિક અને લાંબા સમય સુધી ક્રિઝ પર ટકી રહેવાની ક્ષમતા તેમની બેટિંગની ખાસિયત હતી.
રામપ્રકાશે 1991માં વેસ્ટ ઈન્ડિઝ સામે ઈંગ્લેન્ડ માટે ટેસ્ટ ડેબ્યૂ કર્યું હતું. શરૂઆતમાં તેમની પાસેથી મોટી અપેક્ષાઓ રાખવામાં આવી હતી, પરંતુ આંતરરાષ્ટ્રીય ક્રિકેટમાં તેઓ સતત સારો દેખાવ કરી શક્યા નહીં. તેમનું સ્થાન ક્યારેક ટીમમાં બનતું તો ક્યારેક પસંદગીકારોનો વિશ્વાસ ગુમાવતા. 1997-98ની વેસ્ટ ઈન્ડિઝ પ્રવાસ દરમિયાન બ્રિજટાઉનમાં રમાયેલી 154 રનની શાનદાર ઈનિંગ તેમના ટેસ્ટ કરિયરની સૌથી યાદગાર ઇનિંગ્સમાંથી એક બની હતી. જોકે આ પ્રદર્શન બાદ પણ તેઓ ઈંગ્લેન્ડની ટીમમાં લાંબા સમય સુધી પોતાનું સ્થાન નિશ્ચિત કરી શક્યા નહોતા.
ઓસ્ટ્રેલિયા સામે રામપ્રકાશનો દેખાવ અન્ય ટીમોની સરખામણીમાં સારો રહ્યો હતો. કાંગારૂઓ સામે તેમણે ટેસ્ટ ક્રિકેટમાં 42.40ની સરેરાશથી રન બનાવ્યા હતા. 2001માં ધ ઓવલ ખાતે ઓસ્ટ્રેલિયા સામે તેમણે 133 રનની શાનદાર સદી ફટકારી હતી. ઈંગ્લેન્ડની ધરતી પર આ તેમનો પ્રથમ ટેસ્ટ શતક હતો. પરંતુ ત્યારબાદ ભારત અને ન્યૂઝીલેન્ડના પ્રવાસમાં અપેક્ષિત પ્રદર્શન ન કરી શકતા તેમની આંતરરાષ્ટ્રીય કારકિર્દી ફરી મુશ્કેલીમાં આવી ગઈ.પરંતુ જ્યાં આંતરરાષ્ટ્રીય ક્રિકેટમાં રામપ્રકાશ સંઘર્ષ કરતા રહ્યા, ત્યાં કાઉન્ટી ક્રિકેટમાં તેમનું બેટ સતત ધમધમતું રહ્યું. મિડલસેક્સ અને સરી માટે તેમણે હજારો રન બનાવ્યા. ખાસ કરીને 2006 અને 2007ની સીઝન તેમની કારકિર્દીની શાનદાર સીઝન રહી હતી, જેમાં તેમની બેટિંગ સરેરાશ 100થી પણ વધુ રહી હતી. 2006માં સરી માટે તેમણે એકલા હાથે 2,278 રન બનાવ્યા હતા.
2008માં તેમણે પોતાની કારકિર્દીની સૌથી મોટી સિદ્ધિઓમાંથી એક હાંસલ કરી. 99 ફર્સ્ટ ક્લાસ સદી બાદ તેમણે 100મી સદી પૂરી કરી અને ક્રિકેટના એક ખાસ ક્લબમાં સ્થાન મેળવ્યું. આખરે તેમની ફર્સ્ટ ક્લાસ કારકિર્દી 114 સદી અને 35,659 રન સાથે પૂર્ણ થઈ. 461 ફર્સ્ટ ક્લાસ મેચોમાં તેમની બેટિંગ સરેરાશ 53.14 રહી હતી. આ આંકડા દર્શાવે છે કે ઘરેલુ ક્રિકેટમાં તેઓ કેટલા શાનદાર બેટ્સમેન હતા.આંતરરાષ્ટ્રીય આંકડાઓ જોકે તેમની ઘરેલુ સિદ્ધિઓની સરખામણીમાં ઘણાં સામાન્ય રહ્યા. રામપ્રકાશે ઈંગ્લેન્ડ માટે 52 ટેસ્ટમાં 2,350 રન, બે સદી અને 12 અડધી સદી ફટકારી હતી. વનડેમાં તેમણે 18 મેચ રમીને 376 રન બનાવ્યા હતા અને એક અડધી સદી નોંધાવી હતી.
ક્રિકેટ સિવાય રામપ્રકાશે ટેલિવિઝન પર પણ પોતાની અલગ ઓળખ બનાવી હતી. 2006-07માં તેમણે BBCના લોકપ્રિય ડાન્સ શો Strictly Come Dancingમાં ભાગ લીધો હતો. ફાઇનલમાં તેમના સાલસા પ્રદર્શનને ચારેય જજ પાસેથી 10માંથી 10 ગુણ મળ્યા હતા.લગભગ 25 વર્ષ લાંબી ફર્સ્ટ ક્લાસ કારકિર્દી બાદ માર્ક રામપ્રકાશે 2012માં ક્રિકેટને અલવિદા કહી દીધું. એક તરફ 114 ફર્સ્ટ ક્લાસ સદી અને 35 હજારથી વધુ રન જેવી અસાધારણ સિદ્ધિઓ છે, તો બીજી તરફ આંતરરાષ્ટ્રીય ક્રિકેટમાં અપેક્ષા મુજબ સતત સફળતા ન મળવાની અધૂરી કહાની છે. આ જ વિરોધાભાસ માર્ક રામપ્રકાશની ક્રિકેટ સફરને ખાસ અને યાદગાર બનાવે છે.
