પૂર્વ પેસિફિક મહાસાગરમાં આંતરરાષ્ટ્રીય જળસીમા નજીક અમેરિકી સૈન્ય દ્વારા એક નૌકા પર કરવામાં આવેલા હુમલામાં ત્રણ લોકોના મોત થયા હોવાની માહિતી સામે આવી છે. અમેરિકાના દક્ષિણ કમાન્ડ એટલે કે US Southern Command (SOUTHCOM) એ જણાવ્યું કે આ બોટ ડ્રગ ટ્રાફિકિંગમાં સંડોવાયેલી હોવાની શંકા હતી. જોકે, આ દાવાને સમર્થન આપતું કોઈ સ્પષ્ટ પુરાવું જાહેર કરવામાં આવ્યું નથી.
અમેરિકી સૈન્યના નિવેદન મુજબ શુક્રવારે પૂર્વ પેસિફિકમાં એક એવા વિસ્તારમાં કાર્યવાહી કરવામાં આવી હતી, જેને “નર્કો-ટ્રાફિકિંગ રૂટ” તરીકે ઓળખવામાં આવે છે. સૈન્યએ આ ઓપરેશનને “લેથલ કિનેટિક સ્ટ્રાઈક” તરીકે વર્ણવ્યું છે. હુમલામાં ત્રણ પુરુષોના મોત થયા હોવાનું SOUTHCOM એ જણાવ્યું.
આ ઘટના એવા સમયે સામે આવી છે જ્યારે અમેરિકી સરકાર દ્વારા છેલ્લા કેટલાક મહિનાઓથી સમુદ્રમાં સંદિગ્ધ નૌકાઓ સામે કડક કાર્યવાહી કરવામાં આવી રહી છે. માહિતી મુજબ, Donald Trump પ્રશાસન દરમિયાન સપ્ટેમ્બરથી અત્યાર સુધી પૂર્વ પેસિફિક મહાસાગર અને કેરેબિયન સમુદ્રમાં અમેરિકી સૈન્ય દ્વારા લગભગ 43 હુમલાઓ કરવામાં આવ્યા છે. આ તમામ કાર્યવાહી દરમિયાન અત્યાર સુધી ઓછામાં ઓછા 148 લોકોના મોત થયા હોવાનું જણાવવામાં આવે છે.
સોશિયલ મીડિયા પર SOUTHCOM દ્વારા શેર કરાયેલા એક ટૂંકા વીડિયો ક્લિપમાં હુમલાનો દ્રશ્ય પણ જોવા મળ્યો હતો. વીડિયોમાં એક બોટ સ્થિર હાલતમાં દેખાય છે, ત્યારબાદ અમેરિકી ફાયરિંગ બાદ બોટમાં આગ લાગી જાય છે અને તે પાણીમાં ધીમે ધીમે વહેતી નજરે પડે છે.વિશેષજ્ઞોનું માનવું છે કે આંતરરાષ્ટ્રીય જળસીમામાં આવી પ્રકારની સૈન્ય કાર્યવાહી અંગે વૈશ્વિક સ્તરે ચર્ચા ઉઠી શકે છે. ખાસ કરીને ત્યારે જ્યારે હુમલામાં માર્યા ગયેલા લોકો ડ્રગ ટ્રાફિકિંગમાં સંડોવાયેલા હતા કે નહીં તે અંગે કોઈ સત્તાવાર પુરાવા રજૂ કરવામાં આવ્યા નથી.
આ ઘટનાને પગલે માનવ અધિકાર સંગઠનો અને આંતરરાષ્ટ્રીય રાજકીય વિશ્લેષકો દ્વારા પણ સવાલો ઉઠી રહ્યા છે. ઘણા લોકોનો મત છે કે આવી કાર્યવાહી પહેલાં પારદર્શક તપાસ અને સ્પષ્ટ પુરાવા રજૂ કરવું જરૂરી છે.હાલમાં, અમેરિકી સૈન્યએ આ ઓપરેશનને નાર્કો-ટ્રાફિકિંગ સામેની કાર્યવાહી તરીકે ગણાવી છે, પરંતુ ઘટનાને લઈને ચર્ચા અને વિવાદ વધવાની શક્યતા વ્યક્ત કરવામાં આવી રહી છે.
