અમેરિકાના મિશિગન રાજ્યમાં ગુરુવારે એક મોટો હવાઈ અકસ્માત સર્જાયો હતો. તાલીમ અભિયાન દરમિયાન ટેક્સાસ એર નેશનલ ગાર્ડનું F-16 ફાઈટર જેટ ક્રેશ થયું હતું. અકસ્માત બાદ વિમાનમાં આગ લાગી હતી અને ઘટનાસ્થળ પરથી ધુમાડાના ગોટેગોટા જોવા મળ્યા હતા. જોકે, આ ઘટનામાં મોટી રાહતની વાત એ રહી કે વિમાનમાં સવાર પાઈલટે સમયસર ઈજેક્શન કરીને પોતાનો જીવ બચાવી લીધો હતો. અધિકારીઓના જણાવ્યા મુજબ પાઈલટને સારવાર માટે સ્થાનિક હોસ્પિટલમાં લઈ જવામાં આવ્યો હતો અને તેની સ્થિતિ સ્થિર હોવાનું જણાવાયું છે.
મળતી માહિતી પ્રમાણે આ F-16 વિમાન ટેક્સાસના Joint Base San Antonio-Lackland ખાતે સ્થિત 149th Fighter Wing સાથે સંકળાયેલું હતું. વિમાન મિશિગનના Alpena Combat Readiness Training Center પરથી નિયમિત તાલીમ મિશનમાં સામેલ હતું. તાલીમ દરમિયાન મિશિગનના Grand Traverse County નજીક વિમાન સાથે અકસ્માત સર્જાયો હતો. ટેક્સાસ મિલિટરી ડિપાર્ટમેન્ટે પણ પુષ્ટિ કરી હતી કે F-16 નિયમિત તાલીમ મિશન દરમિયાન ક્રેશ થયું અને પાઈલટે સફળતાપૂર્વક ઈજેક્શન કર્યું હતું.અકસ્માતનું ચોક્કસ કારણ હજુ સુધી સત્તાવાર રીતે જાહેર કરવામાં આવ્યું નથી અને તેની તપાસ ચાલી રહી છે. જોકે, એર ટ્રાફિક કંટ્રોલ સાથે થયેલી વાતચીતના આધારે સંભવિત રીતે પક્ષી સાથે ટક્કર થઈ હોવાની આશંકા વ્યક્ત કરવામાં આવી છે. અન્ય એક પાઈલટે કંટ્રોલરને જાણ કરી હતી કે તેના વિંગમેનના વિમાન સાથે પક્ષી અથડાયું હોવાની શક્યતા છે. જોકે, 149th Fighter Wingના અધિકારીએ જણાવ્યું હતું કે તેમને પક્ષી અથડાવાની વાતની સત્તાવાર પુષ્ટિ મળી નથી. તેથી તપાસ પૂર્ણ થયા બાદ જ અકસ્માતનું સાચું કારણ સ્પષ્ટ થશે.
ક્રેશ બાદ ઘટનાસ્થળ નજીક સુરક્ષાના કારણોસર સ્થાનિક વહીવટીતંત્રે તાત્કાલિક પગલાં લીધા હતા. શરૂઆતમાં નજીકના રહેવાસીઓને ઘરની અંદર રહેવા અને બારીઓ તથા વેન્ટિલેશન બંધ રાખવાની સૂચના આપવામાં આવી હતી. ત્યારબાદ વિમાનના કાટમાળ સાથે સંકળાયેલા સંભવિત જોખમી રાસાયણિક લીકેજને ધ્યાનમાં રાખીને ક્રેશ સ્થળની આસપાસ આશરે એક માઈલના વિસ્તારમાંથી લોકોને ખસેડવાનો આદેશ આપવામાં આવ્યો હતો.પોલીસ અને ઈમરજન્સી ટીમોએ વિસ્તારને સુરક્ષિત કરી રસ્તાઓ પર અવરજવર પણ નિયંત્રિત કરી હતી.સ્થાનિક લોકોના જણાવ્યા અનુસાર ક્રેશ પહેલાં વિમાન ખૂબ જ નીચી ઊંચાઈએ અને ધીમી ગતિએ ઉડતું જોવા મળ્યું હતું. ત્યારબાદ જોરદાર અવાજ સંભળાયો અને થોડી જ ક્ષણોમાં આગની જ્વાળાઓ તથા કાળા ધુમાડાના ગોટેગોટા જોવા મળ્યા હતા. કેટલાક સાક્ષીઓએ ઘટનાસ્થળ નજીક વિમાનનો કાટમાળ અને વિસ્ફોટ જેવા અવાજો સાંભળ્યા હોવાનું જણાવ્યું હતું. જોકે, જમીન પર રહેલા અન્ય લોકોમાંથી કોઈને ઈજા થઈ હોવાની માહિતી સામે આવી નથી.
પાઈલટે સમયસર ઈજેક્શન કરતા મોટી જાનહાનિ ટળી હતી. અધિકારીઓના જણાવ્યા અનુસાર પાઈલટ હોસ્પિટલમાં પોલીસ સાથે વાતચીત કરી શકે તેવી સ્થિતિમાં હતો.સૈન્ય દ્વારા પાઈલટની ઓળખ અથવા ઈજાની ચોક્કસ વિગતો જાહેર કરવામાં આવી નથી. આ ઘટનાને પગલે સૈન્ય અને સ્થાનિક અધિકારીઓએ ક્રેશ સ્થળની તપાસ શરૂ કરી છે. પછીથી સ્થાનિક અધિકારીઓએ જણાવ્યું હતું કે ક્રેશ સ્થળની આસપાસની સ્થિતિ નિયંત્રણમાં આવી ગઈ હતી અને રહેવાસીઓને તેમના ઘરોમાં પરત ફરવાની મંજૂરી આપવામાં આવી હતી. હાલ F-16 ક્રેશ થવાનું ચોક્કસ કારણ જાણવા માટે સત્તાવાર તપાસ ચાલી રહી છે. તપાસ પૂર્ણ થયા બાદ જ અકસ્માત પાછળનું કારણ અને અન્ય વિગતો અંગે સ્પષ્ટ માહિતી સામે આવશે.
