માછીમારોની નાવડી પર મગરનું બચ્ચું ચડી જતાં દોડધામ, વન વિભાગ પાસે તાત્કાલિક રેસ્ક્યૂની માંગ
10થી 12 ફૂટના વિશાળ મગર સહિત અનેક મગરો નજરે પડ્યાનો દાવો; વીડિયો વાયરલ થતાં કિનારાના રહેવાસીઓ અને માછીમારોમાં ચિંતા, સાવચેત રહેવા અપીલ
સુરત શહેરના ફૂલપાડા અને અમરોલી વિસ્તાર પાસેથી પસાર થતી તાપી નદીમાં એકસાથે 4થી 5 મગરો જોવા મળ્યાની ઘટનાએ સ્થાનિકોમાં ભયનો માહોલ ઉભો કર્યો છે. છેલ્લા કેટલાક દિવસોથી નદીમાં અલગ-અલગ સ્થળોએ મોટા કદના મગરો દેખાઈ રહ્યા હોવાના દાવા કરવામાં આવી રહ્યા છે. આ ઘટનાને કારણે નદીમાં માછીમારી કરતા માછીમારો તેમજ તાપી કિનારે વસતા લોકોમાં સુરક્ષાને લઈને ગંભીર ચિંતા વ્યાપી છે. સ્થાનિકોએ વન વિભાગને તાત્કાલિક કાર્યવાહી કરીને મગરોનું રેસ્ક્યૂ કરવા અને લોકોને સુરક્ષા પૂરી પાડવાની માંગ કરી છે.
સ્થાનિક માછીમાર મનોજભાઈ અંબારામ પટેલ (રાજાભાઈ)ના જણાવ્યા મુજબ, તાપી નદીના આ વિસ્તારમાં છેલ્લા કેટલાક દિવસોમાં કુલ 4થી 5 મગરો અલગ-અલગ સમયે નજરે પડ્યા છે. જેમાંથી એક મગર આશરે 10થી 12 ફૂટ લાંબો હોવાનું જણાવવામાં આવ્યું છે, જ્યારે અન્ય બે મગરો અંદાજે 7થી 8 ફૂટના હોવાનું જોવા મળ્યું છે. આ ઉપરાંત નાના કદના મગરો પણ નદીમાં જોવા મળ્યા હોવાનું સ્થાનિકોનું કહેવું છે.
ઘટનાને વધુ ગંભીર બનાવતો બનાવ ત્યારે સામે આવ્યો જ્યારે માછીમારી કરવા ગયેલા માછીમારોની નાની નાવડી પર આશરે બે થી અઢી ફૂટનું મગરનું બચ્ચું ચડી આવ્યું હતું. અચાનક નાવડીમાં મગરનું બચ્ચું આવી જતાં માછીમારોમાં દોડધામ મચી ગઈ હતી. જોકે, માછીમારોએ હિંમત અને સમયસૂચકતા દાખવી મગરના બચ્ચાને કોઈ નુકસાન પહોંચાડ્યા વિના ફરી નદીમાં ઉતારી દીધું હતું. સદનસીબે આ ઘટનામાં કોઈ જાનહાનિ કે ઇજા થઈ નહોતી.
સ્થાનિકોના જણાવ્યા મુજબ, તેઓએ નદી કિનારેથી અંદાજે 25થી 30 ફૂટના અંતરેથી મગરોના વીડિયો પોતાના મોબાઇલ ફોનમાં કેદ કર્યા છે. આ વીડિયો સોશિયલ મીડિયા પર વાયરલ થતાં તાપી નદીમાં મગરોની હાજરી અંગે શહેરભરમાં ચર્ચા શરૂ થઈ છે. અનેક લોકો આ વીડિયો જોઈને આશ્ચર્ય વ્યક્ત કર્યો છે, સ્થાનિકોમાં ભયની લાગણી વધુ વધી છે. માછીમારોનું કહેવું છે કે તેમનો રોજગાર સંપૂર્ણપણે તાપી નદી પર આધારિત છે. દરરોજ માછીમારી માટે નદીમાં જવું તેમની મજબૂરી છે, પરંતુ હવે મગરોની હાજરીને કારણે તેઓ સતત ભયના માહોલમાં કામ કરી રહ્યા છે. જો કોઈ મોટો મગર નાવડી પર હુમલો કરે અથવા નદીમાં ઉતરેલા વ્યક્તિ પર હુમલો કરે તો મોટી દુર્ઘટના સર્જાઈ શકે તેવી આશંકા વ્યક્ત કરવામાં આવી રહી છે.
ફૂલપાડા અને અમરોલી વિસ્તારના રહેવાસીઓનું પણ કહેવું છે કે તાપી કિનારે સવાર-સાંજ લોકો ફરવા, કસરત કરવા તેમજ ધાર્મિક અને સામાજિક પ્રવૃત્તિઓ માટે આવે છે. ઉપરાંત બાળકો પણ નદી કિનારે રમવા આવતા હોવાથી મગરોની હાજરી અત્યંત ચિંતાજનક બની છે. જો સમયસર જરૂરી પગલાં નહીં લેવાય તો કોઈ ગંભીર ઘટના બનવાની શક્યતા નકારી શકાય તેમ નથી.સ્થાનિકોએ વન વિભાગ અને સંબંધિત તંત્રને તાત્કાલિક સર્વે હાથ ધરવાની માંગ કરી છે. સાથે જ નદીમાં રહેલા મગરોની સંખ્યા અંગે સત્તાવાર તપાસ કરીને જરૂર જણાય તો તેમને સુરક્ષિત રીતે પકડી અન્ય યોગ્ય સ્થળે ખસેડવામાં આવે તેવી માંગ ઉઠી છે. ઉપરાંત તાપી નદીના સંવેદનશીલ વિસ્તારોમાં ચેતવણીના બોર્ડ લગાવવા, જોખમી વિસ્તારોને ચિહ્નિત કરવા અને નિયમિત પેટ્રોલિંગ શરૂ કરવાની પણ માંગ કરવામાં આવી છે.
વન્યજીવ નિષ્ણાતોના જણાવ્યા મુજબ, મગરો સામાન્ય રીતે માનવ વસાહતથી દૂર રહેવાનું પસંદ કરે છે, પરંતુ વરસાદી મોસમમાં પાણીના પ્રવાહ અને જળસ્તરમાં ફેરફાર થવાને કારણે તેઓ નવા વિસ્તારોમાં જોવા મળી શકે છે. તેથી નદી કિનારે જતા લોકોએ સાવચેતી રાખવી, અનાવશ્યક રીતે પાણીમાં ન ઉતરવું અને મગર દેખાય તો તરત જ વન વિભાગને જાણ કરવી જરૂરી છે.હાલ સ્થાનિક લોકો વન વિભાગની કામગીરી પર નજર રાખી રહ્યા છે અને વહેલી તકે યોગ્ય પગલાં લેવામાં આવે તેવી અપેક્ષા વ્યક્ત કરી રહ્યા છે. ત્યાં સુધી તાપી નદી કિનારે રહેતા લોકો, માછીમારો અને ફરવા આવતા નાગરિકોને વિશેષ સાવચેત રહેવાની અપીલ કરવામાં આવી છે.
