દેશમાં E20 પેટ્રોલને લઈને ચાલી રહેલી ચર્ચા વચ્ચે આમ આદમી પાર્ટીના રાષ્ટ્રીય સંયોજક અરવિંદ કેજરીવાલે સરકાર સામે નવો મોરચો ખોલ્યો છે. તેમણે ‘સ્ટોપ E20 પેટ્રોલ’ નામથી દેશવ્યાપી ઓનલાઈન સહી અભિયાન શરૂ કરીને લોકોને તેમાં જોડાવા અપીલ કરી છે. કેજરીવાલનો આરોપ છે કે કેન્દ્ર સરકાર પૂરતી તૈયારી અને લોકોની ચિંતાઓને ધ્યાનમાં લીધા વિના E20 પેટ્રોલને પ્રોત્સાહન આપી રહી છે, જેના કારણે લાખો વાહનચાલકોને મુશ્કેલીનો સામનો કરવો પડી રહ્યો છે. કેજરીવાલે જણાવ્યું કે છેલ્લા કેટલાક સમયથી દેશના અલગ-અલગ વિસ્તારોમાંથી E20 પેટ્રોલને લઈને અનેક ફરિયાદો સામે આવી રહી છે. ઘણા વાહન માલિકોનું કહેવું છે કે E20 પેટ્રોલનો ઉપયોગ કર્યા પછી તેમની ગાડીનું માઇલેજ ઘટી ગયું છે. કેટલાક લોકો એન્જિન સંબંધિત સમસ્યાઓ, ફ્યુઅલ પંપમાં ખામી અને ઇન્જેક્ટરમાં તકલીફ જેવી ફરિયાદો પણ કરી રહ્યા છે. તેમના જણાવ્યા મુજબ વાહનોના સર્વિસિંગ અને સમારકામનો ખર્ચ પણ પહેલા કરતાં વધી ગયો છે. તેમણે કહ્યું કે આ તમામ ફરિયાદો હોવા છતાં સરકાર સામાન્ય લોકોને વિશ્વાસમાં લેવાને બદલે બધું સામાન્ય હોવાનું દર્શાવવાનો પ્રયાસ કરી રહી છે. સરકારે પહેલા લોકોની સમસ્યાઓ સમજવી જોઈએ અને ત્યારબાદ જ કોઈ મોટો નિર્ણય લેવો જોઈએ.
કેજરીવાલે કહ્યું કે તેઓ છેલ્લા કેટલાક દિવસોથી પેટ્રોલ પંપ, ગેરેજ અને સર્વિસ સેન્ટરોની મુલાકાત લઈ રહ્યા હતા. આ દરમિયાન તેમણે અનેક વાહનચાલકો સાથે વાતચીત કરી હતી. ઘણા લોકોએ જણાવ્યું કે E20 પેટ્રોલ ભરાવ્યા પછી તેમની ગાડી પહેલાં કરતાં ઓછું માઇલેજ આપી રહી છે. કેટલાકે એન્જિનના અવાજમાં ફેરફાર, ગાડીની કામગીરીમાં ઘટાડો અને મેન્ટેનન્સ ખર્ચ વધવાની ફરિયાદ પણ કરી હતી. તેમણે વધુમાં કહ્યું કે દેશના લાખો લોકો પોતાની મહેનતની કમાણીથી વાહનો ચલાવે છે. આવી સ્થિતિમાં જો તેમને ઓછું માઇલેજ મળે અને સાથે જ વાહનના સમારકામનો ખર્ચ પણ વધી જાય તો તેનો સીધો આર્થિક બોજ સામાન્ય અને મધ્યમ વર્ગ પર પડે છે.
કેજરીવાલે સરકારને સૂચન આપ્યું કે જો E20 પેટ્રોલ લાગુ કરવું જ હોય તો લોકોને વિકલ્પ આપવો જોઈએ. પેટ્રોલ પંપ પર સામાન્ય પેટ્રોલ, E10 અને E20 – ત્રણેય પ્રકારના વિકલ્પ ઉપલબ્ધ હોવા જોઈએ જેથી ગ્રાહકો પોતાની જરૂરિયાત અને વાહનની ક્ષમતા પ્રમાણે ઈંધણ પસંદ કરી શકે. તેમણે કહ્યું કે હાલમાં ઘણા લોકો પાસે કોઈ વિકલ્પ નથી અને તેમને મજબૂરીમાં E20 પેટ્રોલનો ઉપયોગ કરવો પડી રહ્યો છે. તેમણે E20 પેટ્રોલની કિંમત અંગે પણ સવાલ ઉઠાવ્યો. તેમના જણાવ્યા અનુસાર E20 પેટ્રોલની ઊર્જા ક્ષમતા સામાન્ય પેટ્રોલ કરતાં ઓછી હોવાથી વાહનનું માઇલેજ પણ ઘટે છે. છતાં તેની કિંમતમાં કોઈ ખાસ રાહત આપવામાં આવી નથી. પરિણામે લોકો ઓછું માઇલેજ મળવા છતાં પેટ્રોલ માટે લગભગ એટલી જ કિંમત ચૂકવી રહ્યા છે. તેમના મતે આ સામાન્ય ગ્રાહકો માટે બેવડો આર્થિક ફટકો છે.
આ મુદ્દે લોકોનો અવાજ સરકાર સુધી પહોંચાડવા માટે આમ આદમી પાર્ટીએ ‘સ્ટોપ E20 પેટ્રોલ’ નામની ઓનલાઈન સહી ઝુંબેશ શરૂ કરી છે. આ અભિયાન દ્વારા સરકારને ત્રણ મુખ્ય માંગણીઓ કરવામાં આવી રહી છે. પ્રથમ, પૂરતી તૈયારી અને વ્યાપક ચર્ચા વિના E20 પેટ્રોલ લોકોને ફરજિયાત ન કરવામાં આવે. બીજી, પેટ્રોલ પંપ પર સામાન્ય પેટ્રોલ અને E20 બંનેના વિકલ્પ ઉપલબ્ધ કરાવવામાં આવે. ત્રીજી, જો E20 પેટ્રોલ વેચવામાં આવે તો તેની કિંમત સામાન્ય પેટ્રોલ કરતાં ઓછી રાખવામાં આવે જેથી ઓછા માઇલેજનું આર્થિક નુકસાન ગ્રાહકોને ન સહન કરવું પડે. કેજરીવાલે દેશભરના વાહનચાલકોને આ ઓનલાઈન અભિયાનમાં જોડાવા અપીલ કરતાં કહ્યું કે આ મુદ્દો માત્ર એક રાજકીય પક્ષનો નથી પરંતુ લાખો સામાન્ય લોકોના રોજિંદા ખર્ચ અને જીવન સાથે જોડાયેલો છે. સરકારે લોકોની ચિંતાઓ સાંભળવી જોઈએ અને કોઈપણ નીતિ અમલમાં મૂકતા પહેલાં તેની અસરનો સંપૂર્ણ અભ્યાસ કરવો જોઈએ. તેમણે જણાવ્યું કે જો લોકો મોટી સંખ્યામાં આ અભિયાનમાં જોડાશે તો સરકાર પર યોગ્ય નિર્ણય લેવા માટે દબાણ વધશે. તેમના મતે ઈંધણ સંબંધિત નીતિઓ એવી હોવી જોઈએ કે જેનાથી પર્યાવરણનું પણ રક્ષણ થાય અને સાથે સામાન્ય લોકો પર વધારાનો આર્થિક બોજ પણ ન પડે.
હાલ E20 પેટ્રોલને લઈને દેશભરમાં ચર્ચા ચાલી રહી છે. એક તરફ સરકાર ઇથેનોલ મિશ્રણ વધારવાના પગલાને ઈંધણ આયાત ઘટાડવા અને પર્યાવરણ માટે ફાયદાકારક ગણાવી રહી છે, જ્યારે બીજી તરફ કેટલાક વાહનચાલકો અને રાજકીય પક્ષો વાહનોના માઇલેજ, એન્જિનની કામગીરી અને વધતા ખર્ચ અંગે પ્રશ્નો ઉઠાવી રહ્યા છે. આ દરમિયાન અરવિંદ કેજરીવાલે શરૂ કરેલી ‘સ્ટોપ E20 પેટ્રોલ’ સહી ઝુંબેશથી આ મુદ્દે રાજકીય અને જાહેર ચર્ચા વધુ તેજ બની છે. હવે જોવાનું રહેશે કે સરકાર આ માંગણીઓ પર શું વલણ અપનાવે છે અને E20 પેટ્રોલ અંગે આગળ શું નિર્ણય લેવામાં આવે છે.
