હરિ નગર બ્રિજ નીચે હજારો લીટર પાણીનો વેડફાટ, વગર ચોમાસે નદી વહેતી થઈ
એક તરફ જનતા પાણી માટે તરસે, બીજી તરફ વગર ચોમાસે રસ્તા પર નદીઓ વહી; વાહનચાલકો અને રાહદારીઓ અટવાયા
વડોદરા: સ્માર્ટ સિટી વડોદરામાં એક તરફ ઉનાળાની શરૂઆત થતાં જ શહેરના અનેક વિસ્તારોમાં પીવાના પાણીની તીવ્ર તંગી વર્તાઈ રહી છે, લોકોને પૂરતું પાણી મેળવવા માટે વલખાં મારવા પડી રહ્યા છે, ત્યારે બીજી તરફ તંત્રની ઘોર બેદરકારીને કારણે હજારો લીટર શુદ્ધ પાણી રસ્તા પર વહી જતું હોવાની ગંભીર ઘટના સામે આવી છે. વડોદરાના હરિ નગર બ્રિજ નીચે આજે અચાનક પીવાના પાણીની મુખ્ય લાઇનમાં મોટું લીકેજ સર્જાતા હજારો લીટર પાણીનો વેડફાટ થયો હતો. લાઇન લીકેજ થવાને કારણે બ્રિજ નીચે જાણે વગર ચોમાસે નદી વહેતી થઈ હોય તેવા દ્રશ્યો સર્જાયા હતા.
આ અચાનક સર્જાયેલી લીકેજની ઘટનાને પગલે સ્થાનિક રહીશો અને ત્યાંથી પસાર થતા વાહનચાલકો તેમજ રાહદારીઓને ભારે હાલાકીનો સામનો કરવો પડ્યો હતો. રસ્તા પર ગોઠણસમા પાણી ભરાઈ જવાને કારણે વાહનચાલકોના વાહનો બંધ પડી ગયા હતા અને ટ્રાફિક જામની સ્થિતિ પણ સર્જાઈ હતી. સ્થાનિક લોકોમાં આ અંગે ભારે રોષ જોવા મળી રહ્યો છે. લોકોનો આરોપ છે કે વડોદરા કોર્પોરેશનની પ્રી-મોન્સૂન કામગીરી અને પાઇપલાઇનોની જાળવણી માત્ર કાગળ પર જ રહે છે, જેના કારણે શહેરમાં છાશવારે પાણીની લાઇન લીકેજ થવાના કિસ્સાઓ પ્રકાશમાં આવતા રહે છે.
એક બાજુ સામાન્ય નાગરિકો ટીપાં-ટીપાં પાણી માટે વલખાં મારી રહ્યા છે અને બીજી બાજુ તંત્રની લાપરવાહીના કારણે કિંમતી પાણી ગટરોમાં વહી રહ્યું છે. આ ઘટનાની જાણ થવા છતાં તંત્ર દ્વારા તાત્કાલિક કોઈ નક્કર પગલાં લેવામાં ન આવતા સ્થાનિકોમાં પાલિકાની કામગીરી સામે અનેક સવાલો ઉભા થયા છે. જનતા હવે માગ કરી રહી છે કે તંત્ર કુંભકર્ણની નિંદ્રામાંથી જાગે અને આ લીકેજને વહેલી તકે રિપેર કરી પાણીનો વેડફાટ અટકાવે તેમજ ભવિષ્યમાં આવી ઘટનાઓ ન બને તે માટે કાયમી ઉકેલ લાવે.
