એલસીબી ઝોન-02 અને અકોટા પોલીસની સંયુક્ત કાર્યવાહી,
ગાંજાનો જથ્થો અને રોકડ રકમ સહિત રૂ.1.99 લાખનો મુદ્દામાલ જપ્ત
વડોદરા તા.8
વડોદરા શહેરમાં નશીલા પદાર્થોના વેચાણ અને હેરાફેરી પર લગામ કસવા પોલીસ દ્વારા સતત કાર્યવાહી હાથ ધરવામાં આવી રહી છે. તેવામાં અકોટા પોલીસ સ્ટેશન હદ વિસ્તારમાંથી ગાંજાનું છૂટક વેચાણ કરતા એક યુવકને એલસીબી ઝોન-02 તથા અકોટા પોલીસની ટીમે ઝડપી પાડ્યો હતો. આરોપી પાસેથી ગાંજો, રોકડ રકમ, મોબાઇલ અને ડિજિટલ વજન કાંટા સહિત કુલ રૂ.1.99 લાખનો મુદ્દામાલ કબજે કરવામાં આવ્યો છે.
એલસીબી ઝોન-2ની ટીમ નશીલા પદાર્થોના નશા યુક્ત પદાર્થોનું વેચાણ કરતા શખ્સોને ઝડપી પાડવા માટે વિસ્તારમાં પેટ્રોલિંગ કરી રહી હતી. ત્યારે બાતમી મળી હતી કે અકોટા ટી-પોસ્ટ પાસે એક યુવક ગાંજાનું વેચાણ કરી રહ્યો છે. જેથી બાતમીના આધારે પોલીસ ટીમ દ્વારા સ્થળ પર રેડ કરવામાં આવી હતી. જ્યાં એક યુવક શંકાસ્પદ હાલતમાં મળી આવ્યો હતો. તપાસ કરતાં તેની પાસેથી 48.58 ગ્રામ ગાંજો મળી આવ્યો હતો. પોલીસે આરોપી જીગર તોનુરામ બિસ્વાસ (રહે. ગોપાલ સોસાયટી, બાજવા) ની ધરપકડ કરી વધુ તપાસ હાથ ધરી છે. જ્યારે ગાંજાનો સપ્લાયર તરીકે મોઇન નામના વ્યક્તિ વોન્ટેડ જાહેર કર્યો છે.
પોલીસે આરોપી પાસેથી રૂ.1.70 લાખનો ગાંજો, રૂ.23,500 રોકડા, ડિજિટલ વજન કાંટો અને સેમસંગ કંપનીનો મોબાઇલ મળી રૂ.1.99 લાખનો મુદ્દામાલ કબજે કર્યો છે.
