અમેરિકા અને ઈરાન વચ્ચે વધતા તણાવ અને સંઘર્ષ વચ્ચે એક ચોંકાવનારી માહિતી સામે આવી છે. રિપોર્ટ્સ મુજબ, ઈરાનના હુમલામાં અમેરિકાના કેટલાક સૈન્ય મથકોને નુકસાન થયું હોવાની આશંકા છે. આ નુકસાનની સાચી તસવીરો દુનિયા સુધી ન પહોંચે તે માટે અમેરિકી તંત્રએ ખાસ પગલાં લીધા હોવાનું કહેવામાં આવી રહ્યું છે. વાત એમ છે કે, અમેરિકાના સંરક્ષણ વિભાગ પેન્ટાગોનને ડર હતો કે જો સૈન્ય ઠેકાણાઓને થયેલા નુકસાનની સેટેલાઇટ તસવીરો જાહેર થશે, તો તેનાથી અમેરિકાની વૈશ્વિક છબી પર અસર પડી શકે છે. અમેરિકાને સામાન્ય રીતે એક મજબૂત અને અજેય સૈન્ય શક્તિ તરીકે જોવામાં આવે છે, પરંતુ આવી તસવીરો બહાર આવવાથી તેની છબી પર સવાલો ઊભા થઈ શકે. આ કારણે અમેરિકી વહીવટીતંત્રએ ખાનગી સેટેલાઇટ ઈમેજિંગ કંપનીઓનો સંપર્ક કર્યો હોવાનું કહેવાય છે. આજના સમયમાં પ્લેનેટ લેબ્સ અને મેક્સર જેવી કંપનીઓ પૃથ્વીના કોઈપણ ખૂણાની સ્પષ્ટ તસવીરો મેળવી શકે છે. યુદ્ધ કે આપત્તિના સમયમાં આવી તસવીરો ઝડપથી જાહેર થતી હોય છે.
અહેવાલ મુજબ, પ્લેનેટ લેબ્સ નામની કંપનીએ ઈરાન અને મિડલ ઇસ્ટના સંઘર્ષ વિસ્તારોની તસવીરો જાહેર કરવા પર અચોક્કસ સમય માટે રોક લગાવી દીધી છે. આ પગલું અમેરિકી પ્રશાસનની વિનંતી બાદ લેવામાં આવ્યું હોવાનું કહેવામાં આવે છે. અગાઉ આવા સંવેદનશીલ વિસ્તારોની તસવીરોમાં થોડો સમયનો વિલંબ રાખવામાં આવતો હતો, જેમ કે 96 કલાક અથવા 14 દિવસ, પરંતુ હવે તે સમયમર્યાદા વધારીને અનિશ્ચિત બનાવી દેવામાં આવી છે. આ નિર્ણય પાછળ બે મુખ્ય કારણો હોવાનું માનવામાં આવે છે. પ્રથમ, સુરક્ષા કારણો. જો સૈન્ય મથકોની ચોક્કસ સ્થિતિ અને નુકસાનની વિગતો જાહેર થશે, તો તેનો ઉપયોગ દુશ્મન દેશો આગળના હુમલા માટે કરી શકે છે. બીજી તરફ, આ માહિતી બહાર આવવાથી આંતરરાષ્ટ્રીય સ્તરે અમેરિકાની સ્થિતિ નબળી દેખાય તેવી ભીતિ પણ છે.
જોકે, આ પ્રકારના પગલાં પર નિષ્ણાતો અલગ અલગ મત વ્યક્ત કરી રહ્યા છે. કેટલાકનું માનવું છે કે યુદ્ધના સમયમાં માહિતી પર નિયંત્રણ રાખવું સામાન્ય બાબત છે, જ્યારે કેટલાક લોકો આને પારદર્શિતાના અભાવ તરીકે પણ જોઈ રહ્યા છે. હાલમાં આ મુદ્દે અમેરિકી સરકાર તરફથી કોઈ સત્તાવાર વિગતવાર નિવેદન આવ્યું નથી. પરંતુ આ સમગ્ર ઘટનાએ એક ચર્ચા જરૂર ઉભી કરી છે કે આધુનિક ટેકનોલોજીના યુગમાં માહિતી છુપાવવી કેટલી શક્ય છે. આ ઘટનાથી એ પણ સ્પષ્ટ થાય છે કે આજના સમયમાં યુદ્ધ માત્ર મેદાનમાં જ નહીં, પરંતુ માહિતી અને ઇમેજિંગ ટેકનોલોજીના સ્તરે પણ લડવામાં આવે છે. સેટેલાઇટ તસવીરો અને ડેટા હવે શક્તિનું એક મહત્વપૂર્ણ સાધન બની ગયા છે.
