દુબઈઃ (Dubai) સંયુક્ત આરબ અમીરાતમાં (UAE) ફરી એકવાર ભારે વરસાદ અને તોફાનને કારણે અરાજકતાનો માહોલ છે. UAEમાં ભારે વરસાદ અને તોફાનને કારણે ગુરુવારે ઓરેન્જ એલર્ટ જારી કરવામાં આવ્યું હતું. આ સાથે ડઝનબંધ ફ્લાઈટ્સ કેન્સલ કરવામાં આવી હતી અને ઈન્ટરસિટી બસ સેવાઓ બંધ કરી દેવામાં આવી હતી. ઓફિસમાં કામ કરતા લોકોને તેમના ઘરની બહાર ન નીકળવાની સૂચના આપવામાં આવી હતી. હાલમાં દુબઈમાં ભારે વરસાદ અને વાવાઝોડું ત્રાટક્યું છે. દુબઈના ઘણા વિસ્તારોમાં મુશળધાર વરસાદ સાથે જોરદાર તોફાન ચાલી રહ્યું છે. જેના કારણે લોકોમાં ભયનો માહોલ ફેલાયો છે.
ગલ્ફ ન્યૂઝ અને ખલીજ ટાઈમ્સના જણાવ્યા અનુસાર છેલ્લા કેટલાક દિવસોથી UAE હવામાનના આ અસ્થિર મોજાનો સામનો કરવા માટે તૈયારી કરી રહ્યું છે. દુબઈમાં આગામી 48 કલાકમાં ભારે વરસાદ અને વાવાઝોડાની આગાહી કરવામાં આવી છે. તમામ વિસ્તારોમાં સલામતી અંગેની સલાહ આપવામાં આવી છે. કંપનીઓને વિનંતી કરવામાં આવી છે કે તેઓ કર્મચારીઓને ઘરેથી કામ કરવા દે. શાળાઓ, પાર્ક અને બીચ બંધ કરી દેવામાં આવ્યા છે. તેની સાથે એરપોર્ટ અને એરલાઇન્સ પણ આ અસર માટે તૈયાર છે. આજે તાત્કાલિક અસરથી ઘણી ફ્લાઈટ્સ રદ કરવામાં આવી છે. રસ્તાઓ પરની અવરજવર પણ બંધ કરી દેવામાં આવી છે.
દુબઈમાં મધરાતથી ભારે વરસાદ ચાલુ છે
નેશનલ સેન્ટર ઓફ મેટીરોલોજી (એનસીએમ) દ્વારા જારી કરવામાં આવેલા એલર્ટ મુજબ યુએઈમાં મધરાતથી ભારે વરસાદ થઈ રહ્યો છે. દુબઈમાં આજે સવારે 2.35 કલાકે વીજળીના ચમકારા સાથે વરસાદ પડ્યો હતો. હવે આગામી 48 કલાક માટે મોટું એલર્ટ જારી કરવામાં આવ્યું છે. જો કે એવું કહેવામાં આવી રહ્યું છે કે આ મહિનાની શરૂઆતમાં દેશમાં થયેલા અભૂતપૂર્વ વરસાદ કરતાં આગામી બે દિવસમાં વરસાદ ઓછો ગંભીર રહેશે. જાહેર જનતાને સાવચેતી રાખવા તાકીદ કરવામાં આવી છે. બાળકોનું શિક્ષણ ઓનલાઈન કરવામાં આવ્યું છે.
