વડાપ્રધાન નરેન્દ્ર મોદીએ (PM Narendra Modi) ગુરુવારે પેલેસ્ટાઈનના (Palestine) રાષ્ટ્રપતિ મહમૂદ અબ્બાસ સાથે વાત કરી હતી. બંને વચ્ચે ઈઝરાયેલ-હમાસ યુદ્ધને (Israel Hamas War) લઈને અનેક મુદ્દાઓ પર ચર્ચા થઈ હતી. પીએમ મોદીએ ટ્વિટ કરીને કહ્યું કે તેમણે પેલેસ્ટાઈનના રાષ્ટ્રપતિ મહમૂદ અબ્બાસ સાથે વાત કરી. ગાઝાની અલ અહલી હોસ્પિટલમાં નાગરિકોના મૃત્યુ પર શોક વ્યક્ત કર્યો. તેમણે કહ્યું કે અમે પેલેસ્ટિનિયન લોકોને માનવતાવાદી સહાય મોકલવાનું ચાલુ રાખીશું. તેમણે આતંકવાદ, હિંસા અને પ્રદેશમાં બગડતી સુરક્ષા સ્થિતિ અંગે તેમની ઊંડી ચિંતા વ્યક્ત કરી હતી. ઈઝરાયેલ-પેલેસ્ટાઈન મુદ્દે ભારતની લાંબા સમયથી ચાલતી સૈદ્ધાંતિક સ્થિતિનો પુનરોચ્ચાર કર્યો હતો.
બીજી તરફ બ્રિટિશ વડા પ્રધાન ઋષિ સુનક ઇઝરાયેલના વડાપ્રથાન નેતન્યાહુને મળ્યા હતા. તેમણે કહ્યું કે મને આવા ભયંકર સંજોગોમાં અહીં આવવાનો અફસોસ છે. છેલ્લા બે અઠવાડિયામાં આ દેશ એવી પરિસ્થિતિમાંથી પસાર થયો છે જે કોઈ દેશ, કોઈ વ્યક્તિએ સહન ન કરવું જોઈએ. આખું ઈઝરાયેલ આવી જ પરિસ્થિતિમાંથી પસાર થઈ રહ્યું છે. હું બ્રિટિશ લોકોની ઊંડી સહાનુભૂતિ શેર કરવા માંગુ છું અને ભારપૂર્વક જણાવવા માંગુ છું કે અમે આંતરરાષ્ટ્રીય કાયદા અનુસાર, પોતાનો બચાવ કરવાના અને હમાસ વિરૂદ્ધ ઇઝરાયેલના અધિકારને સંપૂર્ણ સમર્થન આપીએ છીએ. અમે એ પણ ઓળખીએ છીએ કે પેલેસ્ટિનિયન લોકો હમાસથી પરેશાન છે. ગાઝામાં પ્રવેશવા માટે માનવતાવાદી સહાય માટેની ચેનલો ખોલવામાં આવશે તેની ખાતરી કરવા માટે તમે ગઈકાલે લીધેલા નિર્ણયનો હું સ્વાગત કરું છું. મને આનંદ છે કે તમે આ નિર્ણય લીધો છે. અમે તેને સમર્થન આપીશું. અમે પણ ઈચ્છીએ છીએ કે તમે જીતો.
ઈઝરાયેલના પીએમ બેન્જામિન નેતન્યાહુ અને બ્રિટિશ પીએમ ઋષિ સુનકે તેલ અવીવમાં સંયુક્ત પત્રકાર પરિષદ યોજી હતી. આ દરમિયાન નેતન્યાહુએ કહ્યું કે આ માત્ર અમારી લડાઈ નથી પરંતુ આ સમગ્ર સંસ્કારી વિશ્વની લડાઈ છે. આ અમારો સૌથી અંધકારમય સમય છે. આ વિશ્વનો સૌથી અંધકારમય સમય છે. આપણે સાથે ઊભા રહેવાની અને જીતવાની જરૂર છે.
જણાવી દઈએ કે ઈઝરાયેલ અને હમાસ વચ્ચે સંઘર્ષ શરૂ થયાને હવે 13 દિવસ થઈ ગયા છે. બંને તરફથી થઈ રહેલા હુમલામાં અત્યાર સુધીમાં લગભગ 5000 લોકોએ જીવ ગુમાવ્યા છે. ઇઝરાયેલમાં હમાસના હુમલામાં મૃતકોની સંખ્યા 1400થી વધુ છે. બીજી તરફ ગાઝા પટ્ટીમાં બોમ્બ વિસ્ફોટમાં 3500 લોકોના મોત થયા છે. આમાં એક મોટો આંકડો મંગળવારે હોસ્પિટલમાં થયેલા વિસ્ફોટમાં મૃત્યુ પામેલા લોકોનો છે. દરમિયાન ગુરુવારે પશ્ચિમ કાંઠે ઇઝરાયેલી દળો અને પેલેસ્ટિનિયનો વચ્ચે અથડામણ થઈ હતી. અહેવાલ છે કે જ્યારે કેટલાક ઇઝરાયેલી સૈનિકો શંકાસ્પદ હમાસ આતંકવાદીઓને પકડવા માટે દરોડા પાડી રહ્યા હતા ત્યારે ટોળાએ તેમના પર હુમલો કર્યો હતો. જવાબી કાર્યવાહીમાં બે યુવકો સહિત ત્રણ પેલેસ્ટિનિયનોએ જીવ ગુમાવ્યો હતો.
