પશ્ચિમ બંગાળના રાજકારણમાં શિક્ષણ ક્ષેત્રે થયેલા કથિત ભ્રષ્ટાચારને લઈને ફરી એકવાર મોટો ગરમાવો આવી ગયો છે. રાજ્યના ઉચ્ચ શિક્ષણ મંત્રી જગન્નાથ ચટ્ટોપાધ્યાયે એક ન્યૂઝ ચેનલને આપેલા ઈન્ટરવ્યુમાં અત્યંત ચોંકાવનારો દાવો કર્યો છે કે, અગાઉની તૃણમૂલ કોંગ્રેસ સરકારના કાર્યકાળ દરમિયાન થયેલી ગેરરીતિઓના મામલે જો આગામી સમયમાં એક કે તેથી વધુ યુનિવર્સિટીના કુલપતિઓની ધરપકડ થાય, તો તેમાં કોઈને આશ્ચર્ય થવું જોઈએ નહીં.
“ભૂતપૂર્વ શિક્ષણ મંત્રી જેલમાં છે, હવે વીસીનો વારો!”
શિક્ષણ મંત્રી જગન્નાથ ચટ્ટોપાધ્યાયે સમાચાર ચેનલ ‘એબીપી આનંદા’ ને આપેલા ઇન્ટરવ્યુમાં સીધું અને આક્રમક નિવેદન આપતા જણાવ્યું કે, “તમે અગાઉ એક પૂર્વ શિક્ષણ મંત્રીને જેલમાં જતા જોઈ ચૂક્યા છો. પરંતુ તમે હજુ સુધી કોઈ યુનિવર્સિટીના કુલપતિઓને જેલના સળિયા પાછળ જોયા નથી. જો ભવિષ્યમાં તમે પ્રેસિડેન્સી, દમદમ કે અલીપુરની જેલોમાં એક કે બે કુલપતિઓને જુઓ, તો હેરાન થવાની કોઈ જરૂર નથી.” જો કે મંત્રીએ કોઈ ચોક્કસ યુનિવર્સિટી કે કુલપતિના નામનો ઉલ્લેખ કર્યો નથી, પરંતુ તેમના આ નિવેદનથી સ્પષ્ટ સંકેત મળે છે કે સરકાર હવે માત્ર રાજકીય હોદ્દા પર બેઠેલા લોકો સુધી જ તપાસ મર્યાદિત રાખવા માંગતી નથી, પણ ભ્રષ્ટાચારના મૂળ સુધી પહોંચવા કટિબદ્ધ છે.
15 વર્ષના શાસનમાં મોટાપાયે ગેરરીતિઓનો આરોપ
નવા શિક્ષણ મંત્રીએ પૂર્વવર્તી સરકાર પર આકરા પ્રહારો કરતા વહીવટી તંત્રને સુધારવાની પ્રાથમિકતાઓ રજૂ કરી. ટીએમસીના 15 વર્ષના શાસનકાળ દરમિયાન શિક્ષણ વ્યવસ્થામાં મોટાપાયે અનિયમિતતાઓ અને દાયકાઓ સુધી રાજકીય હસ્તક્ષેપ થતો રહ્યો હોવાનો આરોપ તેમણે લગાવ્યો. મંત્રીએ સ્પષ્ટ કર્યું કે હાલની રાજ્ય સરકારની સૌથી મોટી અને તાત્કાલિક પ્રાથમિકતા બંગાળની સમગ્ર શિક્ષણ વ્યવસ્થાને ‘ભ્રષ્ટાચાર મુક્ત અને રાજકારણ મુક્ત’ બનાવવાની છે.
તપાસ પણ તેજ ગતિએ ચાલી રહી છે
પશ્ચિમ બંગાળમાં છેલ્લા કેટલાક વર્ષોથી શાળા ભરતી કૌભાંડ અને શિક્ષણ ક્ષેત્રના ભ્રષ્ટાચારના મુદ્દાઓ ખૂબ ગાજ્યા છે. આ અગાઉ કરોડો રૂપિયાના ભરતી કૌભાંડમાં પૂર્વ શિક્ષણ મંત્રી પાર્થ ચેટર્જીની ધરપકડ કરવામાં આવી હતી, જે હાલ જેલના સળિયા પાછળ છે. હવે યુનિવર્સિટીઓના કામકાજ અને વહીવટમાં થયેલી કથિત નાણાકીય કે વહીવટી ગેરરીતિઓની તપાસ પણ તેજ ગતિએ ચાલી રહી છે, જેને પગલે શિક્ષણ મંત્રીનું આ નિવેદન બંગાળના શૈક્ષણિક અને રાજકીય વર્તુળોમાં ફફડાટ ફેલાવનારું સાબિત થઈ રહ્યું છે.
