ડલાસ સ્ટેડિયમ ખાતે રમાયેલી ફીફા વર્લ્ડ કપ 2026 ની રોમાંચક પ્રથમ સેમિફાઇનલમાં સ્પેને ઇતિહાસ રચી દીધો છે. કટોકટીના આ મુકાબલામાં સ્પેને મજબૂત ગણાતી ફ્રાન્સની ટીમને 2-0 થી માત આપીને વર્ષ 2010 પછી બીજી વખત ફૂટબોલ વર્લ્ડ કપના ફાઇનલમાં ભવ્ય પ્રવેશ કર્યો છે. સ્પેનની આ જીતે ફ્રાન્સના સતત ત્રીજી વખત ફાઇનલમાં પહોંચવાના સપનાને ચૂર-ચૂર કરી દીધું છે.
સ્પેનના બે હીરો
આ હાઈ-વોલ્ટેજ સેમિફાઇનલ મેચમાં સ્પેનની જીતના મુખ્ય હીરો મિકેલ ઓયારઝાબલ અને પેડ્રો પોરો રહ્યા હતા. મેચની 22 મી મિનિટે મિકેલ ઓયારઝાબલે પેનલ્ટીને ગોલમાં ફેરવીને સ્પેનને 1-0 ની પ્રારંભિક લીડ અપાવી દીધી હતી. ત્યારબાદ 58 મી મિનિટે પેડ્રો પોરો અને દાની ઓલ્મોના શાનદાર તાલમેલની મદદથી પેડ્રો પોરોએ બીજો ગોલ કરીને સ્પેનની લીડ 2-0 કરી દીધી, જે અંત સુધી નિર્ણાયક સાબિત થઈ હતી.
ફ્રાન્સ માટે સેમિફાઇનલનો ‘ત્રિગુણ‘ ફટકો
વર્લ્ડ રેન્કિંગમાં ટોચના સ્થાને રહેલી ફ્રાન્સની ટીમ અને તેના સ્ટાર સ્ટ્રાઇકર કિલિયન એમ્બાપ્પે માટે આ પરાજય અત્યંત નિરાશાજનક રહ્યો છે. ફ્રાન્સની વર્લ્ડ કપ સેમિફાઇનલમાં આ 8 મી ઉપસ્થિતિ હતી, જેમાં આ તેમની ચોથી હાર છે. સ્પેન સામે સતત ત્રીજા વર્ષે ફ્રાન્સ મોટા ટૂર્નામેન્ટની સેમિફાઇનલમાં હાર્યું છે. આ પહેલાં યુરો 2024 ની સેમિફાઇનલમાં અને નેશન્સ લીગ 2025 ની સેમિફાઇનલમાં પણ સ્પેને જ ફ્રાન્સને બહાર કર્યું હતું.
સ્પેનનો લોખંડી ડિફેન્સ: રચ્યો નવો રેકોર્ડ
આ ટૂર્નામેન્ટમાં સ્પેનનો ડિફેન્સ લાઇનઅપ અભેદ્ય કિલ્લો સાબિત થયો છે. સ્પેને આ વર્લ્ડ કપની 7 મેચોમાં છઠ્ઠી વખત ‘ક્લીન શીટ’ નોંધાવી છે. ચાલુ ટૂર્નામેન્ટમાં સ્પેને અત્યાર સુધી માત્ર 1 ગોલ જ ખાધો છે. ફૂટબોલ ઇતિહાસમાં વર્લ્ડ કપ જીતનારી ટીમ માટે સૌથી ઓછા 2 ગોલ ખાવાનો રેકોર્ડ ફ્રાન્સ (1998), ઇટાલી (2006) અને ખુદ સ્પેન (2010) ના નામે છે, જેને સ્પેન આ વખતે તોડી શકે છે.
હવે રવિવારે ન્યૂ જર્સીમાં ખિતાબી જંગ
આ શાનદાર જીત બાદ હવે આગામી રવિવારે ન્યૂ યોર્ક સિટી નજીક ન્યૂ જર્સીના મેટલાઇફ સ્ટેડિયમમાં ફાઇનલ મેચ રમાશે. સ્પેનનો મુકાબલો વર્તમાન ચેમ્પિયન આર્જેન્ટિના અને ઇંગ્લેન્ડ વચ્ચે રમાનારી બીજી સેમિફાઇનલના વિજેતા સામે થશે. બીજી તરફ, હારેલી ફ્રાન્સની ટીમ શનિવારે ફ્લોરિડાના મિયામી ગાર્ડન્સ ખાતે ત્રીજા સ્થાન માટે મુકાબલામાં ઉતરશે, જ્યાં એમ્બાપ્પે પાસે ‘ગોલ્ડન બૂટ’ જીતવાની રેસમાં આગળ વધવાની તક રહેશે.
