બોલીવૂડના દિગ્ગજ અભિનેતા પરેશ રાવલે ફિલ્મ ‘OMG 2’ને લઈને એક એવો દાવો કર્યો છે, જેના કારણે ફરી એકવાર ચર્ચાનો માહોલ ગરમાયો છે. પરેશ રાવલે જણાવ્યું છે કે ‘OMG 2’ની મૂળ વાર્તા અને કોન્સેપ્ટ તેમની કલ્પનામાંથી જન્મ્યો હતો, પરંતુ અંતે જ્યારે ફિલ્મ બની ત્યારે તેમને કોઈપણ પ્રકારનો સ્ટોરી અથવા કોન્સેપ્ટનો ક્રેડિટ આપવામાં આવ્યો નહોતો. એટલું જ નહીં, ફિલ્મમાં થયેલા મોટા ફેરફારો બાદ તેમણે પોતે જ આ પ્રોજેક્ટથી અલગ થવાનો નિર્ણય લીધો હતો.
એક ઇન્ટરવ્યૂ દરમિયાન પરેશ રાવલે જણાવ્યું કે તેમણે વિચાર જાણીતા ફિલ્મમેકર અમિત રાય સાથે મળીને વિકસાવ્યો હતો. અમિત રાયની ફિલ્મ ‘Road to Sangam’ તેમને ખૂબ પસંદ હતી, તેથી તેમણે તેમને નવી ફિલ્મ માટે મળવાનું કહ્યું હતું. પરેશે સ્પષ્ટ કર્યું કે તેઓ વ્યાવસાયિક લેખક નથી, પરંતુ સ્ક્રીનપ્લેની સમજ ધરાવતા હોવાથી વાર્તાના વિકાસમાં સક્રિય રીતે જોડાયા હતા.
તેમના જણાવ્યા અનુસાર, શરૂઆતની વાર્તા આજની ફિલ્મથી સંપૂર્ણપણે અલગ હતી. મૂળ સ્ટોરી એક એવા કિશોરની આસપાસ રચાઈ હતી, જેની એક ખાનગી ઘટના સોશિયલ મીડિયા પર વાયરલ થઈ જાય છે. તે પછી સમગ્ર સમાજ તેની મજાક ઉડાવે છે, શાળામાં અપમાન થાય છે અને પરિવાર મુશ્કેલીમાં મુકાઈ જાય છે. બાળકનો પિતા પોતાના દીકરાને ન્યાય અપાવવા માટે સમાજ સામે લડે છે અને આ સમગ્ર કથામાં સેક્સ એજ્યુકેશન જેવા સંવેદનશીલ વિષયને ગંભીરતા સાથે રજૂ કરવાનો પ્રયાસ કરવામાં આવ્યો હતો.
પરેશ રાવલે જણાવ્યું કે શરૂઆતમાં આ ફિલ્મમાં ભગવાન અથવા કોઈ દિવ્ય પાત્ર રાખવાની કલ્પના જ નહોતી. ફિલ્મનો મુખ્ય હેતુ લોકોને સેક્સ એજ્યુકેશન અંગે જાગૃત કરવાનો હતો. વાર્તા શૈક્ષણિક પણ રહે અને મનોરંજન પણ આપે તે માટે તેમણે અને અમિત રાયે અનેક બેઠકો કરી હતી. પ્રક્રિયામાં જાણીતા સેક્સોલોજિસ્ટ ડૉ. પ્રકાશ કોઠારીની પણ મદદ લેવામાં આવી હતી જેથી ફિલ્મનો વિષય વૈજ્ઞાનિક રીતે યોગ્ય અને જવાબદાર રીતે રજૂ થઈ શકે.પરેશ રાવલના જણાવ્યા મુજબ, આ સ્ટોરીને લઈને તેમણે અનેક મોટા ફિલ્મમેકર અને કલાકારો સાથે પણ ચર્ચા કરી હતી. તેમણે અજય દેવગણ, સલમાન ખાન, કરણ જોહર, અક્ષય કુમાર અને નિર્માતા અશ્વિન વર્દે સહિત અનેક લોકોને વિચાર સંભળાવ્યો હતો. કેટલાક લોકોએ વિષયને વિવાદાસ્પદ માનીને તેમાં રસ દાખવ્યો નહોતો.
આ પ્રોજેક્ટમાં અક્ષય કુમાર જોડાયા બાદ ફિલ્મની દિશા બદલાઈ ગઈ હોવાનું પરેશ રાવલે જણાવ્યું. તેમના જણાવ્યા પ્રમાણે, ફિલ્મમાં ભગવાનના પાત્રનો સમાવેશ કરવામાં આવ્યો અને સમગ્ર સ્ક્રિપ્ટમાં મોટા ફેરફારો થયા. આ બદલાવ બાદ તેમને લાગ્યું કે હવે આ તે ફિલ્મ રહી નથી, જેની તેમણે કલ્પના કરી હતી. પરેશ રાવલે કહ્યું કે ત્યારબાદ અક્ષય કુમારે તેમને ફિલ્મમાં કામ કરવાની વિનંતી કરી હતી. જોકે તેમણે સ્પષ્ટ શબ્દોમાં ના પાડી દીધી હતી. તેમનું કહેવું હતું કે, “મેં અક્ષયને કહ્યું હતું કે આ તે વાર્તા નથી, જે આપણે શરૂઆતમાં વિચારી હતી. આ ફિલ્મમાં ભગવાનનું પાત્ર ઉમેરવામાં આવ્યું છે, જ્યારે મારી મૂળ કલ્પનામાં એવું કંઈ નહોતું. હું શરૂઆતથી સ્ક્રિપ્ટ સાથે જોડાયેલો હતો, તેથી મને ખબર હતી કે વાર્તાનું મૂળ સ્વરૂપ શું હતું. આ કારણસર મેં ફિલ્મનો ભાગ ન બનવાનો નિર્ણય લીધો.”
પરેશ રાવલે સૌથી વધુ દુઃખની વાત એ ગણાવી કે ફિલ્મ રિલીઝ થયા બાદ તેમને સ્ટોરી અથવા કોન્સેપ્ટ માટે કોઈ ક્રેડિટ આપવામાં આવ્યો નહોતો. તેમણે કહ્યું કે ફિલ્મના ટાઇટલ્સમાં તેમનું નામ ક્યાંય જોવા મળ્યું નહીં, જ્યારે મૂળ વિચાર તેમના તરફથી આવ્યો હતો.તેમણે દાવો કર્યો કે ઇન્ડસ્ટ્રીના ઘણા લોકો જાણે છે કે આ સ્ટોરીની શરૂઆત તેમની કલ્પનાથી થઈ હતી. તેમના શબ્દોમાં, “અમિત રાય, અક્ષય કુમાર, અશ્વિન વર્દે, અજય દેવગણ, કરણ જોહર અને સલમાન ખાન – બધાને ખબર છે કે આ વિચાર મારો હતો. મેં સૌને આ વિષય વિશે સમજાવવાનો પ્રયાસ કર્યો હતો.”
જોકે પરેશ રાવલે આ સમગ્ર મામલે કોઈ વ્યક્તિગત વિવાદ ઉભો કરવાનો પ્રયાસ કર્યો નહોતો. તેમણે માત્ર એટલું જણાવ્યું કે તેમને પોતાના યોગદાનની યોગ્ય નોંધ મળવી જોઈએ હતી. તેમના મત અનુસાર, સર્જનાત્મક ક્ષેત્રમાં જે વ્યક્તિ કોઈ વિચાર અથવા વાર્તાની શરૂઆત કરે, તેને યોગ્ય શ્રેય મળવો જરૂરી છે. ઉલ્લેખનીય છે કે વર્ષ 2023માં રિલીઝ થયેલી ‘OMG 2’માં મુખ્ય ભૂમિકામાં પંકજ ત્રિપાઠી, અક્ષય કુમાર અને યામી ગૌતમ જોવા મળ્યા હતા. ફિલ્મનું દિગ્દર્શન અમિત રાયે કર્યું હતું. ફિલ્મનો મુખ્ય વિષય ભારતમાં સેક્સ એજ્યુકેશન અને સમાજમાં તેના પ્રત્યેના અભિગમ પર આધારિત હતો.
રિલીઝ પહેલાં ફિલ્મને સેન્ટ્રલ બોર્ડ ઓફ ફિલ્મ સર્ટિફિકેશન (CBFC) તરફથી અનેક વાંધાઓનો સામનો કરવો પડ્યો હતો. ફિલ્મમાં ધાર્મિક સંદર્ભો અને સેક્સ એજ્યુકેશન જેવા વિષયોને કારણે અનેક ફેરફારો સૂચવવામાં આવ્યા હતા. ત્યારબાદ ફિલ્મને કેટલાક ફેરફારો સાથે ‘A’ સર્ટિફિકેટ આપવામાં આવ્યું હતું. ખાસ કરીને અક્ષય કુમારના પાત્રને ભગવાન શિવના સ્વરૂપમાંથી બદલીને ‘દિવ્ય દૂત’ તરીકે રજૂ કરવામાં આવ્યું હતું.
વિવાદો છતાં ફિલ્મને દર્શકો અને સમીક્ષકો તરફથી સારો પ્રતિસાદ મળ્યો હતો. સામાજિક સંદેશ, પંકજ ત્રિપાઠીના અભિનય અને સંવેદનશીલ વિષયને રજૂ કરવાની રીતની પ્રશંસા થઈ હતી. બોક્સ ઓફિસ પર પણ ફિલ્મ સફળ રહી અને વિશ્વભરમાં અંદાજે ₹221 કરોડથી વધુનો વ્યવસાય કર્યો હોવાનું કહેવાય છે. હાલ પરેશ રાવલના આ નિવેદન બાદ સોશિયલ મીડિયા પર નવી ચર્ચા શરૂ થઈ છે. જોકે અક્ષય કુમાર અથવા ફિલ્મના નિર્માતાઓ તરફથી આ દાવાઓ અંગે સત્તાવાર પ્રતિક્રિયા સામે આવી નથી. તેથી આ મામલે પરેશ રાવલનો પક્ષ જાહેરમાં આવ્યો છે, જ્યારે અન્ય પક્ષની પ્રતિક્રિયાની રાહ જોવામાં આવી રહી છે.
