મહિન્દ્રા એન્ડ મહિન્દ્રાએ ભારતીય બજાર માટે પોતાની નવી લાઈફસ્ટાઈલ પિકઅપ ટ્રક ‘સ્કોર્પિયો લાઈફસ્ટાઈલર’નું અનાવરણ કર્યું છે. સ્કોર્પિયો-એન પરથી વિકસાવવામાં આવેલી આ નવી પિકઅપને મજબૂત દેખાવ, પ્રીમિયમ સુવિધાઓ અને ઓફ-રોડ ક્ષમતાના સંયોજન સાથે તૈયાર કરવામાં આવી છે. કંપનીના જણાવ્યા પ્રમાણે તેનું વેચાણ ભારતમાં એપ્રિલ 2027 સુધીમાં શરૂ થશે અને શરૂઆતની એક્સ-શોરૂમ કિંમત ₹19.79 લાખથી ઓછી રહેશે.
સ્કોર્પિયો-એનના પ્લેટફોર્મ પર તૈયાર થઈ નવી પિકઅપ
સ્કોર્પિયો લાઈફસ્ટાઈલર મહિન્દ્રાની નવી પેઢીની બોડી-ઓન-ફ્રેમ આર્કિટેક્ચર પર આધારિત છે અને સ્કોર્પિયો-એન સાથે તેનું મજબૂત જોડાણ જોવા મળે છે. ડબલ-કેબિન ડિઝાઇનને કારણે તેમાં પરિવાર સાથે પ્રવાસ, સાહસિક સફર અને રોજિંદા ઉપયોગ માટે ઉપયોગિતા જાળવવાનો પ્રયાસ કરવામાં આવ્યો છે.
મહિન્દ્રાએ આ વાહનને માત્ર સામાન વહન કરતી પિકઅપ તરીકે નહીં, પરંતુ જીવનશૈલી અને સાહસ સાથે જોડાયેલા ગ્રાહકોને ધ્યાનમાં રાખીને તૈયાર કર્યું છે. કંપની તેને ‘પેલોડ’ સાથે ‘પ્લેલોડ’નું સંયોજન ગણાવી રહી છે.
આક્રમક લુક સાથે પ્રીમિયમ અંદાજ
નવી પિકઅપનો આગળનો ભાગ ખૂબ જ મજબૂત અને આક્રમક દેખાય છે. તેમાં ઊંચા ભાગે લગાવવામાં આવેલી LED હેડલેમ્પ, L આકારની LED ડે-ટાઈમ રનિંગ લાઈટ, પહોળી ગ્રિલ અને મજબૂત બમ્પર આપવામાં આવ્યા છે. બોનેટના આગળના ભાગ પર ‘સ્કોર્પિયો’ નામ પણ જોવા મળે છે. પાછળના ભાગમાં મોટું કાર્ગો બેડ અને ટેલગેટ પર મહિન્દ્રાની ઓળખ આપવામાં આવી છે. આ ઉપરાંત મોટા વ્હીલ આર્ચ, મજબૂત ક્લેડિંગ અને ઊંચી ગ્રાઉન્ડ ક્લિયરન્સ તેને સાહસિક ઉપયોગ માટે યોગ્ય દેખાવ આપે છે.
અંદર મળશે આધુનિક ટેક્નોલોજી
સ્કોર્પિયો લાઈફસ્ટાઈલરના કેબિનને પણ સ્કોર્પિયો-એન કરતાં વધુ આધુનિક બનાવવામાં આવ્યું છે. તેમાં મોટું ઊભું ટચસ્ક્રીન ઈન્ફોટેનમેન્ટ સિસ્ટમ, સંપૂર્ણ ડિજિટલ ઈન્સ્ટ્રુમેન્ટ ક્લસ્ટર, મલ્ટિફંક્શન સ્ટિયરિંગ વ્હીલ અને ડ્યુઅલ-ઝોન ક્લાઈમેટ કંટ્રોલ જેવી સુવિધાઓ આપવામાં આવી છે. કેબિનમાં બ્રાઉન અને બ્લેક રંગની થીમ જોવા મળે છે.
3 ખાસ આવૃત્તિઓ પણ રજૂ કરાઈ
મહિન્દ્રાએ લાઈફસ્ટાઈલરને અલગ-અલગ સાહસિક થીમ સાથે રજૂ કરવાની તૈયારી બતાવી છે. તેમાં વેલી, રીફ અને ટ્રેલ જેવી વિશેષ આવૃત્તિઓનો સમાવેશ થાય છે.
- વેલી આવૃત્તિમાં આર્ટેમિસ ગ્રે રંગ અને ખાસ ગ્રાફિક્સ
- રીફ આવૃત્તિમાં એક્વારીફ રંગ અને બીચ થીમ
- ટ્રેલ આવૃત્તિમાં સહારા બેજ રંગ સાથે સાહસિક ડિઝાઇન
આ આવૃત્તિઓમાં વિવિધ ડેકલ્સ અને એક્સેસરીઝ પણ આપવામાં આવી શકે છે.
ટોયોટા હાઈલક્સ અને ઈસુઝુ વી-ક્રોસને મળશે ટક્કર
ભારતીય બજારમાં સ્કોર્પિયો લાઈફસ્ટાઈલરનો મુકાબલો મુખ્યત્વે ટોયોટા હાઈલક્સ અને ઈસુઝુ ડી-મેક્સ વી-ક્રોસ જેવી લાઈફસ્ટાઈલ પિકઅપ સાથે થશે. ખાસ વાત એ છે કે મહિન્દ્રા તેની શરૂઆતની કિંમત ₹19.79 લાખથી નીચે રાખવાની વાત કરી રહી છે, જેના કારણે તે આ સેગમેન્ટમાં વધુ આક્રમક વિકલ્પ બની શકે છે. બંને મુખ્ય હરીફોની શરૂઆતની કિંમત ₹25 લાખથી ઉપર છે.
એન્જિનની સંપૂર્ણ વિગતો માટે હજુ રાહ
મહિન્દ્રાએ હાલમાં વાહનની તમામ તકનીકી વિગતો અને પાવરટ્રેનની સંપૂર્ણ માહિતી જાહેર કરી નથી. એટલે એન્જિન, ગિયરબોક્સ અને અન્ય સ્પષ્ટીકરણો અંગે અંતિમ માહિતી કંપની આગામી તબક્કે જાહેર કરશે.
હાલમાં એટલું સ્પષ્ટ છે કે સ્કોર્પિયો લાઈફસ્ટાઈલરનું ભારતીય બજારમાં આગમન એપ્રિલ 2027 સુધીમાં થશે. તેની કિંમત અને ડિઝાઇનને જોતા મહિન્દ્રા લાઈફસ્ટાઈલ પિકઅપ સેગમેન્ટમાં પોતાની અલગ જગ્યા બનાવવાનો પ્રયાસ કરી રહી છે.
