ભારતના વડાપ્રધાન Narendra Modi અને ઇટાલીની વડાપ્રધાન Giorgia Meloni વચ્ચે રોમમાં ખાસ મુલાકાત યોજાઈ હતી. પાંચ દેશોના મહત્વપૂર્ણ વિદેશ પ્રવાસના અંતિમ તબક્કામાં PM મોદી ઇટાલી પહોંચ્યા હતા, જ્યાં જ્યોર્જિયા મેલોનીએ તેમનું ઉષ્માભર્યું સ્વાગત કર્યું. બંને નેતાઓની મુલાકાતની તસવીરો સોશિયલ મીડિયા પર ભારે વાયરલ થઈ રહી છે.
“વેલકમ ટુ રોમ માય ફ્રેન્ડ”
ઇટાલીની વડાપ્રધાન મેલોનીએ PM મોદી સાથેની સેલ્ફી સોશિયલ મીડિયા પર શેર કરતાં લખ્યું કે, “Welcome to Rome my friend.” આ પોસ્ટ બાદ ફરી એકવાર “Melodi” ટ્રેન્ડ શરૂ થયો હતો. અગાઉ G7 સમિટ દરમિયાન પણ મોદી અને મેલોનીની સેલ્ફી વિશ્વભરમાં ચર્ચાનો વિષય બની હતી.
ડિનર, કાર રાઈડ અને કોલોસિયમ મુલાકાત
સૂત્રો મુજબ, બંને નેતાઓએ રોમમાં અનૌપચારિક મુલાકાત દરમિયાન સાથે ડિનર કર્યું હતું. તે ઉપરાંત બંને નેતાઓએ ઐતિહાસિક કોલોસિયમની મુલાકાત પણ લીધી હતી. PM મોદી અને મેલોની વચ્ચે કાર રાઈડ દરમિયાન પણ મહત્વપૂર્ણ ચર્ચા થઈ હોવાનું જાણવા મળી રહ્યું છે.
ભારત-ઇટાલી સંબંધો વધુ મજબૂત બનશે
આ મુલાકાત દરમિયાન ભારત અને ઇટાલી વચ્ચેના દ્વિપક્ષીય સંબંધોને વધુ મજબૂત બનાવવા પર ભાર મૂકાયો હતો. વેપાર, ટેક્નોલોજી, કૃત્રિમ બુદ્ધિ (AI), કૃષિ, મેરિટાઇમ સહકાર અને ઇન્ડિયા-મિડલ ઈસ્ટ-યુરોપ ઇકોનોમિક કોરિડોર (IMEC) જેવા મુદ્દાઓ ચર્ચાના કેન્દ્રમાં રહ્યા હતા.
‘સ્પેશિયલ સ્ટ્રેટેજિક પાર્ટનરશિપ’ તરફ આગળ વધતા સંબંધો
અહેવાલો મુજબ ભારત અને ઇટાલી હવે પોતાના સંબંધોને “Special Strategic Partnership” સુધી લઈ જવાની તૈયારીમાં છે. બંને દેશો આગામી વર્ષોમાં વેપાર વધારીને 20 બિલિયન યુરો સુધી પહોંચાડવાનો લક્ષ્યાંક પણ રાખી રહ્યા છે.
PM મોદીના પાંચ દેશોના પ્રવાસનો અંતિમ તબક્કો
PM મોદીનો આ પ્રવાસ પાંચ દેશોની રાજદ્વારી મુલાકાતનો અંતિમ ભાગ છે. આ પ્રવાસ દરમિયાન તેમણે યુરોપ અને પશ્ચિમ એશિયાના અનેક દેશોમાં મહત્વપૂર્ણ બેઠકો કરી હતી. રોમ મુલાકાત દરમિયાન તેઓ ઇટાલીના રાષ્ટ્રપતિ સેરજિયો મટ્ટારેલા સાથે પણ મુલાકાત કરશે અને વિવિધ આંતરરાષ્ટ્રીય મુદ્દાઓ પર ચર્ચા કરશે.
સોશિયલ મીડિયા પર છવાઈ ‘મેલોડી’
PM મોદી અને જ્યોર્જિયા મેલોની વચ્ચેની મિત્રતા અને કેમિસ્ટ્રી સોશિયલ મીડિયા પર ફરી ચર્ચાનો વિષય બની છે. “Melodi” હેશટેગ સાથે લાખો યુઝર્સ તસવીરો શેર કરી રહ્યા છે અને બંને નેતાઓના સંબંધોને લઈને રસપ્રદ ટિપ્પણીઓ કરી રહ્યા છે.
